Login

FA’ATALI FAAIUGA FA’AMASINOGA MATAUPU FAASAGA ALI’I FAIFEAU

ausage@samoanews.com

O le aso 3 Aokuso lea ua faamoemoe le faamasinoga maualuga, e tuuina mai ai sana faaiuga pe latou te taliaina le maliliega lea ua sainia e le malo ma le alii Faifeau ia Rev. Aliioaiga Filoiali’i, ona o le faalavelave na lavea ai se teineititi i le taavale a le faifeau i le 2010, ma i’u ina maliu ai o ia.

Na faailoa e le faamasino sili i loia i le vaiaso nei e faapea, o le aso lea o le a tuuina mai ai se faaiuga a le faamasinoga pe latou te taliaina le maliliega ua faia, pe afai e maea ona tapena e le Ofisa Faanofovaavaaia sa latou ripoti e uiga i lenei mataupu.

O Rev. Ali’ioaiga sa mua’i tuuaia e le malo i le moliaga mamafa o lona faafoeina lea o se taavale i se auala faatamala, ma i’u ina maliu ai se isi tagata, o lea moliaga e mafai ona faasala ai se tasi i le toese mo le umi e le sili atu i le 5 tausaga, pe faasala foi i se salatupe e le sili atu i le $5,000, poo le faasala foi i faasalaga uma ia e lua, ae i lalo o le maliliega lea ua latou sainia ma le malo, ua ia tautino ai, e le tete’e o ia i le moliaga muamua lea ua toe suia e le malo, o lona faafoeina lea o se taavale i se auala faatautala, ma i’u ina manu’a ai se isi tagata, mulimuli ane maliu ai o ia.

O le tuuaiga a le malo lea ua tautino le ua molia e le tete’e i ai o ia, o se solitulafono o le vaega A i solitulafonio mama, ma e mafai ona faasala ai se tasi i le toese mo le umi e le sili atu i le tausaga, pe faasala foi i se salatupe e le sili atu i le $1,000, poo le faasala foi i faasalaga uma ia e lua.

I le tautino atu ai o Rev. Aliioaiga e le tete’e o ia i le tagi a le malo, sa ia tautino ai i le faamasinoga e faapea, i se taimi o le aso 19 Setema 2010, sa ia faafoeina ai lana taavale i se auala faatautala, ma ua ia le amanaiaina ai le saogalemu o le tamaitai o Sesilia Teva ma i’u ina manu’a tigaina ai o ia, mulimuli ane maliu o ia ona o manu’a tuga sa a’afia ai o ia.

Na faailoa e le alii faamasino sili ia Rev. Filoialii, tusa lava pe ua ia fai mai e le tete’e o ia i le tagi a le malo, peitai afai e sauni le faamasinoga e tuu atu lana faasalaga, e tutusa lava le faasalaga o le tali e le tete’e ma le faasalaga o le tali ioe i le moliaga sa faia faasaga ia te ia.

O le a saoloto itu e lua o lenei mataupu e finau atu i le faamasinoga, mo se faasalaga mama mo le alii faifeau, peitai ua malamalama le ua molia ma iloa, tusa lava pe finau atu loia i le faamasinoga mo se faasalaga mama mo ia, e pule le faamasinoga pe talia pe teena ia talosaga.

Ua ia malamalama foi, afai e tuuina atu se faasalaga a le faamasinoga ia te ia ae le tau ai lona loto, e le mafai ona toe suia lana tali e le tete’e ua tuuina atu i le faamasinoga.

E tusa ai ma faamaumauga a le faamasinoga o loo taua ai e faapea, o le tamaitai lea na aafia i le faalavelave lenei, sa savavali ma lana uo i luga o le auala i Faleniu, a’o aga’i atu le ta’avale a le alii faifeau ma taia ai o ia i le pito i luma.

I le ulua’i iloiloga o le mataupu lenei i luma o le faamasinoga faaitumalo, na faailoa ai e le tamaitai leoleo o Lt. Malia Leiato i le faamasinoga e faapea, e i le va o le 25 ma le 35 maila na alu ai le taavale a le ua molia, le ituaiga o le Ford F-150, ma taia ai le tamaitai o Siselia ao sauni e kolosi le isi itu o le auala.

Na faanatinati atu le tamaitai na manu’a i le falema’i peita’i i ni nai aso mulimuli ane ai sa maliu ai loa o ia.

O loo tumau pea poloaiga o loo tatala ai Rev. Filoialii i tua e faatali ai le aso lea ua faamoemoe e toe fofogaina ai lana mataupu i luma o le faamasinoga.

O le afioga i le alii faamasino sili ia Michael Kruse sa faafoeina lenei mataupu, i le lagolagosua a afioga i alii faamasino lagolago ia Logoai Siaki ma Faamausili Pomele.

O le alii loia ia Fiti Sunia o loo tulai mo le alii faifeau ae o Cabel Poag o loo tulai mo le itu a le malo.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.