Login

Fa’asala Fa’amasinoga Feterale Pase i le 14 masina toese

O le tina lea sa avea ma pule o le Ofisa o le American Samoa Special Services Commission (ASSSC), ua faasala e le faamasinoga feterale i le falepuipui mo le 14 masina, atoa ai ma le 3 tausaga e nofovaavaaia ai pe a tatala mai o ia i tua mai le falepuipui, ua poloaina foi o ia na te toe totogiina le tupe e $325,408.

O le faasalaga a Mine Pase lea na tuuina mai e le alii faamasino ia Reggie B. Walton, ina ua tausala o ia i le moliaga o lona taupulepule lea ma isi tagata e gaoi tupe a le feterale sa tuuina mai e le AmeriCorps e faatupe ai le Ofisa o le ASSSC.

O Mine, o le tuafafine lea o le Lutena Kovana ia Faoa A. Sunia, na tali ioe i le moliaga ua tausala ai o ia i le masina o Novema na te’a nei, i lalo o se maliliega sa latou faia ma le malo feterale.

E lei i ai nisi faamatalaga na maua mai i le sui sooupu o le Matagaluega o Faamasinoga a le malo tele, poo le loia fautua foi sa tulai mo Pase e uiga i lenei mataupu. E leai foi ni faamatalaga auiliili e uiga i le faasalaga a Pase na mafai ona maua mai i le feterale ina ua maea ona lau lona faasalaga.

Na pau le faamatalaga na mafai ona maua mai, o le poloaiga sa sainia e le faamasinoga na tuuina atu i le vaega a le U.S Marshall, mo le toe faafoiina mai saogalemu lea o Pase i Amerika Samoa pe a tuanai le aso 21 Iuni 2012.

A’o lei lauina le faasalaga a Pase, sa finau le malo feterale ma le Ofisa Faanofovaavaaia e faasala o ia i le 24 masina ae aua nei sili atu ma le 30 masina, peitai i le talosaga a le loia a Pase o Michelle Peterson sa ia fautuaina ai le faamasinoga ina ia faamama se faasalaga o Pase, ona ua salamo moni o ia mai le solitulafonio sa ia faia.

Na finau le malo i le faamasinoga ina ia faasalaga Pase i le 27 masina i le toese, ma ia poloaina o ia na te totogiina le tupe e $325,408.

O Pase, lea sa faauluulu ia i le Ofisa o le ASSSC mai le masina o Mati 2001 seia oo atu ia Oketopa 2010, sa ia faailoa i le feterale, o ia ma nisi o lona aiga sa latou auai faatasi i le faia o gaioiga ina ia mafai ai ona latou maua mai le ASSSC.

O nisi o tupe sa faaaoga e pei ona taua i faamaumauga a le faamasinoga, e aofia ai le $109,532 mo malaga i Apia e ui e lei i ai se malaga na alu, o le $78,889 mo malologa i Apia, $89,313 na totogi mo meaai o le malaga i Apia, $19,665 mo le lisiina o le taavale a le tama a Pase, $28,009 mo mea sa faafou o le ofisa sa faaleagaina.

fa’aliliu Ausage Fausia



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.