Ads by Google Ads by Google

Alalaga pagota ua le lavava ai pilikaki ma saimini

WARDEN: O LO’O AI FO’I MOA, MAMOE MA FASIPOVI A PAGOTA

O le leo o le uio ma le pologa ua toe faalogoina fo’i i le nofoaga o le toese i Tafuna, ona ua le lavava e nai pagota ai sua pilikaki, pepa saimini faavela atoa ai ma le polesi i le taeao, auaoli ma le afiafi mo pagota e toa 170 o loo i ai, peitai na taua e le pule o le falepuipui, e ono ituaiga meaai o loo faasoasoa mo pagota i le vaiaso atoa mo le tai tolu ‘aiga i le aso.

I se tusi na tuuina mai e se alii pagota o loo tuli sona faasalaga i le falepuipui i le taimi nei na ia taua ai faapea, e na o le pilikaki lava lea o loo fafaga ai i latou i aso uma, e aofia ai ma aso faamanatu faapitoa e pei o le kerisimasi 2011, tausaga fou 2012 atoa ai ma le aso Peresetene na te’a nei.

 Fai mai le alii pagota lea, o le polesi e ‘ai i le taumafataga o le taeao, o le pilikaki i le aoauli ae o le pepa saimini faavela i le po.

“E na o le tolu apa polesi mo le meaai o le taeao, ae lua pusa pepa saimini mo le meaai o le po e fafaga ai pagota e toa 170 i le toese,” o le tomumu lea a Agasiva e pei ona faailoa lana tusi sa tuuina mai i le Samoa News.

Soo se taimi e fesiligia ai e le faamasino sili ia Michael Kruse nisi o pagota pe a oo i taimi o a latou iloiloga poo a latou meaai sa ai i le po, e lua lava tali e masani ona tuuina mai, a le o le kaleve pilikaki o le saimini.

Ae ina ua fesiligia e le Samoa News le pule o le toese i Tafuna ia Lumana’i Maifea, sa ia teena malosi ai faasea mai pagota e na o le pilikaki lea o loo fafaga ai i latou.

“E sa’o e ai le pilikaki ae le faapea o aso uma e fafaga ai, a tele lava aso e ai ai le pilikaki i le vaiaso o le faalua, ae o isi aso e eseese uma lava meaai o loo fafaga ai le nofoaga, e 6 ituaiga meaai lea e faaaoga e fafaga ai pagota i aso e 7 o le vaiaso ae tolu ‘aiga i le aso e tasi,” o le saunoaga lea a Maifea.

Na maua le avanoa e asia ai e le Samoa News le container ma le fale o loo teuina ai taumafa mo pagota, ma maitauina ai le anoanoa’i o taumafa eseese o loo teuina ai e pei o pusa moa, pusa sosisi, pusa pipi, pusa tauau pipi, pusa fasipovi vili, ma le anoanoa’i o isi mea fai meaai mo pagota.

Na taua e Maifea, o le pilikaki e ai i le aso aso Gafua, ona toe ai foi lea i le aso Toonai lea e sosoo ma le aso Sa e tele ai meaai mai asiga a aiga.

“O isi aso Gafua e le aia ai le pilikaki ae fai ai le kale sosisi, aso Lua o le mamoe, aso Lulu o le fasipovi vili, aso Tofi o le tauau pipi ma le aso Faraile o le si’usi’u pipi, ae mo le meaai o le taeao i le vaiaso atoa, e suisui ai lava le fuamoa falai, falaoa poo le masi faapata, ae salani e le ipu ti, o isi foi taimi e sui ai le pata i le siamu, ae masani foi ona faaaoga le polesi ae le faapea o aso uma,” o le saunoaga lea a Maifea.

O meaai o loo fafaga ai le nofoaga i Tafuna, e felanulanua’i lava kuka e faia i aso taitasi, o nisi foi aso e faaaoga ai pagota o loo tuli a latou faasalaga ae i ai le taleni kuka ia te i latou, mo le kukaina lea o meaai i le po aua pagota i le taeao e sosoo ai, e pei ona saunoa Maifea.

“O isi aso ua faakale le moa i le kapisi, pe faa kaleve foi ina ia sui ai le ai a pagota, a le o lena foi, e tao pagi, sikogi ma kogaki i le po e sauni ai mo le meaai o le taeao, ona o le faanaunauga lava, ia lelei meaai e fafaga ai i latou o loo nonofo i le nofoaga,” o le saunoaga lea a Maifea.

Na faamaonia mai foi e Maifea, e silia ma le $30,000 le tupe e faaalu i le faatauina mai o meaai mo pagota i kuata taitasi (tolu masina). O le masina lenei e mae’a ai le isi kuata, ae ua maea ona tuuina atu le oka mo meaai o le isi kuata e ui e lei taitai uma ona faaaoga meaai o loo teu.