Login

AISEA UA TUAI AI TOE FA’AFO’I ALI’I PAGOTA TONGA?

ausage@samoanews.com

Ua i luga nei o le fua fa’atautau a le au maitau le mataupu e uiga i alii pagota e to’alua mai Tonga, ia o loo taofia i le toese i Tafuna i le taimi nei, e le’i toe fa’afo’iina atu lava i Tonga e pei ona poloaina ai i laua e le Fa’amasinoga Maualuga.

O se tusi na tuuina mai i se pagota o loo taofia i le toese o loo ia fesiligia ai le mafuaaga ua tuai ai ona toe faafoi alii pagota nei i lo la atunuu.

Na taua e le alii pagota i lana tusi sa auina mai i le Samoa News e faapea, o le nonofo ai pea o alii pagota ia i le toese i le taimi nei, ae ua tuana’i le taimi na poloaina i laua e le faamasinoga e tuli ai a laua faasalaga, e le gata ua soli ai le tulafono i le taofia faapagota lea o se tagata i se auala sese, ae o loo alu ai foi ma tupe a le malo e tausi ma fafaga ai i laua nei.

Ina ua fesiligia le pule o le falepuipui i Tafuna e uiga i lenei mataupu, na faamaonia mai ai e Lumana’i Maifea le mataupu e pei ona faasea i ai le alii pagota, peitai sa ia taua, e le o se faaletonu e mafua mai i lona ofisa ua mafua ai lea faafitauli, ae ona o le tuai lava ona maua mai o tusi folau e toe malaga ese atu ai alii ia e toalua i lo la atunuu.

“O loo i ai alii pagota e toalua o loo aafia i le tulaga lena, ma o loo faatalitali pea i le taimi e maua mai ai a laua tusi folau, ona faatoa mafai lea ona malaga ese atu ma le atunuu,” o le saunoaga lea a Maifea.

O alii pagota e toalua o loo aafia i le faaletonu lea e aofia ai Latu Noa ma Samasoni Tautai.

N taua e Maifea, o loo faia pea a latou fesootaiga ma aiga o i laua nei i Tonga, ina ia vave maua se auala e lafo mai ai tusi folau ma vave ai ona toe foi atu i laua nei i o la aiga.

“E ui e le o sa’u galuega o le faia o fesootaiga ma aiga o alii pagota, peitai o lea foi ou te fesoasoani atu i le galuega a loia, ina ia vave ona maua mai pepa malaga a i laua nei ma toe foi atu i o la aiga,” o le saunoaga lea a Maifea.

E le fou le mataupu lenei i luma o le faamasinoga, i soo se taimi lava e taulimaina ai mataupu a i latou mai fafo e leai ni pepa nofomau, ona e alu se taimi o tau faatali le taimi e taunuu mai ai tusi folau e toe foi atu ai i latou nei i o latou atunuu.

E lei manuia taumafaiga a le Samoa News i le tau sailiina mai lea o se faamatalaga mai loia e uiga i lenei mataupu, ae na taua e le alii pagota sa tusia le tusi lea na tuuina mai i le Samoa News, e tatau ona taofia le mea lenei ona o loo alu ai tupe a le malo i le tausiga o i latou nei i le falepuipui.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.