FA’AMAONIA TU’UAIGA O LE SOLI TOFAGA USO LONA TO’ALUA

 Ua fa’amaonia e le Fa’amasinoga Fa’aitumalo moliaga o le fa’atupu vevesi fa’asaga i le alii o Mapu Leota, ona o se fa’alavelave lea na tula’i mai i le masina o Mati 2012, ina ua ia tago tago i le itutinosa a le uso o lona to’alua a’o moe.

Na matua teena e Leota lea tuuaiga, ma mafua ai loa ona faataunuuina lana faamasinoga iloilo e pei ona faia i le taeao ananafi, i luma o le alii faamasino ia John Ward II, peitai ina ua mae’a ona faafofoga le faamasinoga i molimau a le malo, na tuuina mai ai loa lana faaiuga e nofosala Leota i le moliaga o le faatupu vevesi i nofoaga faitele.

E le’i lelei se molimau a le tina sa aafia i lenei mataupu ona o le tagi ao ia nofoia le nofoa molimau i le taeao ananafi.

O nisi o molimau a le malo e aofia ai le tina sa aafia ma lona to’alua, o ia foi o se ali’i leoleo su’esu’e i le Matagaluega o le Puipuiga o le Saogalemu Lautele.

I faamaumauga a le faamasinoga sa taua ai e faapea, na faateia le tina na aafia a’o momoe ma si ona to’alua ma le la fanau i le potu malolo o le latou fale i Nuuuli, ina ua ia faalogoina se tagata o tago tago atu i lona itutinosa (tulou).

Na te’i le tina ma nofo a’e i luga, ma ia vaaia ai le ua molia i loo tu mai i ona vae, o le taimi lava lea na ia fafaguina ai lona to’alua, peitai e ala a’e lona to’alua ua fuli mai le tua o le ua molia ua savali aga’i atu i fafo o le fale.

Na faailoa e le tina na aafia i leoleo, e le o se taimi muamua lea ua faia ai e Mapu uiga nei ia te ia.

E le’i nofo lelei le mataupu i le va o le ua molia ma le toalua o le uso o lona to’alua i le po na tulai mai ai le faalavelave, ina ua taumafai le toalua o le tina na aafia e fesiligia le ua molia i le mafuaaga ua ia faia ai lenei gaioiga, peitai na oso mai foi le ua molia ma ia teena tuuaiga faasaga ia te ia.

O loo tumau pea poloaiga o loo tatala ai le ua molia i tua, e faatali ai le aso Gafua lea ua faatulaga e lau ai lona faasalaga.

O le moliaga o le faatupu vevesi i nofoaga faitele, e mafai ona faasala ai se tasi i le toese mo le umi e le silia ma le 6 masina, pe faasala foi i le salatupe e le silia ma le $500, poo le faasala foi i faasalaga uma ia e lua.