Talosaga Pope Penetito mo le Filemu
Ua fa’ailoa mai e le BBC le faia se talosaga mai le agaga atoa o le afioga le Tupusa o Pope Penitito i ana saunoaga fa’apitoa i le Vatikana ina ia fa’autagia mai, ia taofia le tele o sauaga fa’ateratisi o lo’o fa’asagatau i tagata Kerisiano i totonu o Nigeria.
O le tele o pomu sa tatao i totonu o lotu Kerisiano i le setete o Kaduna i le aso Sa ua te’a, ua fa’ailoa mai na tatao e i latou e i le fa’atuatuaga a le Isilami o Boko Haram, na fasiotia ai le to’a 16 o tagata.
E le gata i lena, ae ua fa’ailoa mai le fetaua’i fo’i o Kerisiano ma tagata Musalema i totonu lava o Kaduna ma toe fasiotia ai le isi lua taseni o tagata. O le ala lea o le talosaga o le Tupusa o le Ekalesia Katoliko Roma i lenei vaitaimi, “Nigeria, taumafai tou te fausia se malo e ala i le nofo filemu ma le fealofani!”
O lana saunoaga fa’alaua’itele i le alaleo i le Vatikana sa ia fa’apea ai le saunoaga a le Tupusa, “Nigeria, o lo ua ou va’ai toto’a i le fa’agasologa o le vevesi i totonu o lou lotoifale, talofa, o lo ua fa’asolo pea osofa’iga fa’aterarisi, ma ua matele ina fa’asagatau i tagata Kerisiano.”
“Ou te talosaga atu ia te outou uma o lo’o fa’ataunu’uina nei faiga, alofagia, taofi le fasiotia pea o tagata e le o sala.” Ua fa’ailoa mai e nisi o i latou o lo’o fa’atuatua i le Atua Soifua ma Iesu le fa’aola i totonu o Nigeria, “O lenei faiga ua fa’asolo nei ona fasiotia ai o i matou, ua fa’aigoaina e le vasega o nei fa’atuatuaga o le Isilami ma le Musalema, o le fa’amamaina o le fa’atuatuaga!”
Ua fa’amalosia mai e le Malo o Nigeria se taofiga fa’apitoa ona toe faia o ni osofa’iga fa’apea i le itu i matu o le atunu’u i Damaturu ma ua fa’ao’o mai fo’i i Kaduna lea lava puipuiga malu a le Malo. Peita’i ua fa’ailoa mai e le vasega o leoleo Nigeria, e tusa ma le 80 le aofaiga o soifua ua maumau talu mai le aso Gafua i nei osofa’iga fa’aterarisi.
E moni e toe savalia e i tatou Kerisiano le laina fita o sauaga i ona toe taimi o le lalolagi nei, ae ua nofo sauni i ai i tatou, ma ia tumau se’ia o’o mai le fa’amamaina o le faiga tuai o mea i lenei lalolagi!
saunia: Leua Aiono Frost
THE NEW COMMENTS PROCESS
To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com
You currently are not logged in, please LOGIN to post comments.
