Login

Avea le nofoaga tuai VA fai ma Ofisa autu ASRU

ausage@samoanews.com
Le sui o Samoa i le IRB, afioga Lefau Tauiliili Harry Schuster (itu agavale), o le afioga i le kovana sili ia Togiola Tulafono, o ia foi lea o le taitaifono o le Iuni lakapi a Amerika Samoa, faapea ai ma le peresetene o le Iuni ia Te’o J. Fuavai i se fonotaga sa faia a le ASRU i le aso Faraile na te’a nei i le potu fono o le Fale Laumei i Utulei. (ata AF)

O le vaiaso na te’a nei na tatala aloaia ai le ofisa fou a le Iuni Lakapi a Amerika Samoa (ASRU) i le nofoaga tuai sa i ai le Asosi o Fitafita Tuai a Amerika Samoa (ASVA).

O le fonotaga a le ASRU i le Aso Faraile na te’a nei na faailoa aloai mai ai e le alii kovana lea tulaga, ae o le Aso To’ona’i na mafai ona tatala aloa’ia ai lea nofoaga, i se tauvaga tausala aua se sailiga tupe a le Iuni.

O le fonotaga i le vaiaso na te’a nei na faatasi ai le afioga i le peresetene o Faalapotopotoga o Taaloga Lakapi a le Pasefika (FORU), o ia foi lea o le sui o Samoa i Faalapotopotoga o Taaloga Lakapi a le Lalolagi (IRB), ia Lefau Tauiliili Harry Schuster, mo le faaooina mai o nisi o fautuaga ma faagaioiga, aua le agai i luma o le lakapi i Amerika Samoa.

O le tele o mataupu o le fonotaga, o le tuuina atu o fautuaga mo tapenaga a le Iuni, ina ia mulimulitai i tulafono a le IRB, ave le faamuamua i le atina’eina o le lakapi ma ia avea le taaloga lakapi o se mea e moni i manatu o tagata uma, ae aua nei avea o se taaloga e faapasi ai le taimi i le faaiuga o le vaiaso, ma faaiu ai i inugapia ma BBQ.

FA’AMALOSIA TULAFONO IRB

Na fautuaina e Lefau ia le ASRU ina ia tausisi ma mulimulita’i i tulafono ua faatula’i mai e le IRB, ina ia mautinoa e sologa lelei le faatinoina o a latou gauega, a’o fa’anofova’ava’aia ai i lalo o le IRB mo le lua tausaga.

Ina ua talia e le IRB le talosaga a Amerika Samoa e avea ma totino tumau, sa tuuina mai ai ma le tuutuuga, o le a nofovaavaaia Amerika Samoa mo le lua tausaga, aua le mata’ituina o ana galuega ma polokalama, pe o gatasi ma manaoga ma tulafono a le IRB.

Na saunoa Lefau, o faiga masani lava ia a le IRB i soo se Iuni fou e ofi atu i totonu, ona o tulaga sa maitauina i taimi ua te’a i nisi o Iuni, o le taimi lava e talia ai e avea ma totino tumau, e le toe manatu mamafa i le faatinoina o a latou tiute tauave.

“O isi Iuni e i ai Asia ma Aferika i taimi ua te’a, e maua loa le avanoa e avea ai ma totino a le IRB, ona nofonofo loa lea ua le faia ni taamilosaga, ae na o le taua’imisa lava ma fela’ua’i solo pulega ma taitai, ae le o le mea lena na mafua ai ona talia i latou e le IRB, na talia ina ia atia’e le taaloga lakapi,” o le saunoaga lea a Lefau.

SAILIGATUPE MA TULAFONO

Ua fautuaina e le alii kovana le Loia Sili ina ia taga’i toto’a i tulafono e aofia ai auala e faia ai sailigatupe, ina ia mautinoa o lo o mulimulita’i gaioiga uma nei i tulafono a le malo.

Saunoa Togiola i le taimi na talanoaina ai le mataupu e uiga i sailiga tupe a le Iuni, e tele auala e mafai ai ona faia sailiga tupe, e pei o bingo ma pepa valuvalu ia e faaaoga e isi faalapotopotoga, peitai o le atugaluga, ia faia mea uma e tusa ma ala o le tulafono.

MAEA ONA TOFIA FAIAOGA MO AU FILI E LUA

Ua maea nei ona tofia e le Iuni, faiaoga mo ‘au fili e lua a le atunuu, lea ua faamoemoe e tauva i taamilosaga a le IRB i le Pasefika ia Aokuso ma Novema o le tausaga nei.

O le ‘au fili ta’ito’a 7 lea ua faamoemoe e tausinio i le taamilosga taito’a 7 e faia i Ausetalia ia Aokuso ua filifilia i ai le susuga a Setefano Fata e avea ma faiaoga, ae o Eddie Manuma le taitai malaga.

Mo le ’au e i lalo o le 19 tausaga le matutua, ua filifilia i ai le susuga ia Jerry Chang e avea ma faiaoga, ae o Vui Alesana Tagaloa ua filifilia e avea ma taitai malaga.

Na taua e le Failautusi a le Iuni lakapi ia Falefata Moli Lemana, o i latou ia ua tofia e galulue i tofiga nei, sa filifilia faapitoa i se fonotaga a le Iuni lakapi sa faia, ma tuuina atu ai e faamaonia mai e le taitaifono ia Togiola.

O le ulua’i taamilosaga a le Oceania lea na faatasi atu i ai le Talavalu, sa maua ai e Amerika Samoa le tulaga 6 mai ‘au e 10 sa tausinio.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.