Login

Tala mai Samoa

Saasaa le minisita o le matagaluega o fesootaiga ma faamatalaga televavave faaonaponei, le afioga Tuisugaletaua Sofara Aveau i le fiafia a le matagaluega i le aso Faraile o le vaiaso na tea nei ina ua maea ma le manuia le faamanatuina o le 50 tausaga o le malo tutoatasi o Samoa sa gapatia ai le matagaluega. [ata: Naenae Productions]

FAAMAONIA MOLIAGA O LE TAUFAAMATAU FAASAGA I LE TU’UA O AFEGA

Ua faamaonia nei e le Faamasinoga Faaitumalo ia moliaga o le taufaamata’u faasaga i le afioga Fata Pemila Young. o ia lea o le Tu’ua o le afioaga o Afega.

O lea moliaga e mafua i se feeseeseaiga na tulai mai i le tausaga 2004 i le vaitau o aso fiafia, i le va o le ua molia ma se isi matai o Afega, le susuga ia Savea Sano Malifa, o se alii faipisinisi, o ia foi o le pule o le nusipepa o le Samoa Observer.

E tusa ai ma tolaulauga o lenei mataupu, o le oo atu o Savea e faatalatalanoa le mataupu e faatatau I se fanua o lo latou aiga sa talia ai le iuga a le faamasinoga, na ia vaaia ai se faleoo ua fausia e Fata Pemila i luga o lea fanua.

Na oo atu Savea i lana taavale, ma nonoa ni manoa ma toso ai i lalo le faleoo, ae o ni upu faamatau la na lalafo e le tama ia Fata, lea ua mafua ai ona tulai i luma o le faamasinoga.

Na faaalia i luma o le faamasinoga e faapea, sa ‘e’e leotele Fata Pemila ia Savea Sano Malifa, “Faakali mai gei oe ua e oki, o le a ou fagaiga oe!” Na saunoa le tamaitai faamasino o Mata Tuatagaloa, i le ogaoga o le moliaga o le lafo o ni faamatalaga taufaamatau e fasioti se isi tagata.

Fai mai a ia, o lenei moliaga e faasalaina i le faasalaga e oo atu i le tolu tausaga i le toese. Ua faatulaga nei le aso 20 o Iuni e lauina ai le faasalaga o Fata Pemila Young.

TOE SAOASAOA LE ATINAE NONU, LEA O LE A UTU FAGU I SAMOA

Ua faailoa aloaia mai e le kamupani gaosi oloa o le ‘Pure Pasifika’ le toe amata malosi o le atinae o le nonu ma le faiga fou o le a agai i ai le faatinoina o lea atinae i Samoa.

O lea suiga fou o le a utu fagu ai i Samoa le sua o le nonu pe a maea ona aoina mai i le au faifaatoaga nonu ma tatau, faatoa auina atu ai lea i Saina. Ina ua faatoa amata faatinoina nei galuega i le tausaga na te’a nei, na auina atu ai e le kamupani na o le sua o le nonu i Saina.

Peitai ua faaalia e le fofoga fetalai, le afioga Laaulialemalietoa Leuatea Polataivao Schmidt, o se tasi o tamalii o lo o tulai malosi i le taumafaiga o lea atinae, o se taimi lata mai lava o le a faatauina atu ai i fafo le sua o le nonu mai le au faifaatoaga i le motu tele i Salafai.

Fai mai a ia, o le a lafo atu le sua o le nonu ua uma ona tuu fagu i le susuga Tupailelei Jack Chen, o se alii fai pisinisi faavaomalo mai Saina o lo o fai paaga ma le malo Samoa.

E pei ona lipotia e le au tusitala ma le au faasalalau i se taimi e le i mamao atu, sa tuuaia lea alii faipisinisi i ni faiga faaalatua. Peitai ua ia faaalia, ua maea ona foia lea faafitauli sa tuuaia sese ai o ia, ma ua mama lona suafa mai tuuaiga o ni solitulafono faaalatua, ma o se fiafiaga tele foi lea mo le taitai o le malo aemaise o le au faifaatoaga nonu i le atunuu.

Na saunoa Laauli, sa telegese lava le faatinoina o lea atinae i nai masina ua mavae ona o lenei mataupu, ae o lea ua maea ona faaleaogaina ia tuuaiga ma o le a toe faatino i le malosi e gata ai.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.