Ads by Google Ads by Google

$3.2 miliona fausia ai falemai mo gasegase o le mafaufau

Na pau le itu lea ua tuuina atu i luma o le Faamasinoga Maualuga, o le $3.2 miliona mai i le Ofisa o le Initeria, e fausia ai se falema’i mo i latou e a’afia i le gasegase o le mafaufau, peitai e le o mautinoa le taimi tonu e amata ai lenei galuega e ui o lea ua maea ona faia le sauniga faapitoa e faapaia ai le amataga o le galuega.

O le taeao ananafi na toe valaauina ai i luma o le faamasinoga le mataupu lenei, lea na amata finau e le Loia Fautua mo tagata lautele, i le silia ma le 4 tausaga talu ai, peita’i ua toe laga ona o le mataupu faasaga i le tamaitai o Agnes Milovale, lea e aafia i le gasegase o le mafaufau, ae na taofia i le falepuipui ona o tuuaiga i lona faaoolima i se isi tamaitai e aafia foi i le gasegase o le mafaufau.

E tolu molimau na valaau e le malo i luma o le faamasinoga, mo se fa’amatalaga i le tulaga ua i ai lenei galuega. O le tamaitai o Sandy Tonumaipe’a mai le Ofisa o le TOFR, lea o lo o tauaaoina le tupe o lo o fuafua e fausia ai lenei galuega, o le susuga ia Joe Pereira lea o lo o pulea le Vaega a le Ofisa o Galuega e pasia ata mo galuega tetele, faapea ai ma le alii fomai ia Dr. Saipale Fuimaono mai le Soifua Maloloina.

Na faamaonia e Tonumaipea e faapea, o nai vaega laiti o lo o manaomia mai e le Central Medical Service(CMS) o lo o mafua ai ona tuai le galuega i le taimi nei, ae afai loa e pasia le talosaga ua tuuina atu i le CMS, ona tuuina atu loa lea o le galuega mo tauofoga, ma sosoo atu ai lava ma le filifilia o se konekarate latou te faatino le galuega.

Saunoa Tonumaipea, o manaoga mai le CMS e aofia ai tulaga o tupe ma gaioiga i lalo o le polokalama o le Medicare ma le Medicaid.

O lo o i ai le fuafuaga a le malo o se taimi lava o le tausaga nei e tatau ai ona amata lenei galuega.

Na tutulu le tamaitai loia fautua ia Ruth Risch-Fuatagavi a’o ia faailoa i le faamasinoga lona atugaluga o lo o i ai i lenei mataupu, ona o lo o toatele pea tagata o lo o aafia i le gasegase o le mafaufau, o lo o taofia i le falepuipui, ae foliga mai e le o mautinoa po o afea tonu e amata ai lenei falemai mo i latou.

Fai mai Fuatagavi, ua tele tausaga o taumafai pea lona ofisa e una’i lenei mataupu, ina ua tuuina atu se fautuaga mai le alii fomai o le mafaufau lea o lo o galue i le LBJ, ia Dr. Peni Biukoto e uiga i le le saogalemu o i latou uma e aafia i le gasegase o le mafaufau o lo o taofia i le falepuipui.

Na ioe le alii faamasino ia Michael Kruse i le atugaluga o le loia fautua, peitai i lona talitonuga, e le mafai ona iloilo faatasi e le faamasinoga i le taimi e tasi, mataupu a isi foi o lo o aafia i le gasegase o le mafaufau, sei vagana ai le tamaitai o Milovale lea e ana ia le mataupu o lo o i luma o le faamasinoga.

Saunoa Kruse, o le tele o taeao e usu mai ai i le galuega, na te vaaia ai i latou nei e aofia ai ma Milovale o lo o momoe solo i polotito o le fale faamasino, ma ua avea ai le fale faamasino ma nofoaga e faamautu mai i ai latou nei.

Na soisoi le alii faamasino ina ua ia toe manatua le sauniga lea na faia i le masina o Aperila e amata ai lenei galuega, peitai e foliga mai o lea lava e le’i mautu gaioiga o lo o manaomia.

Na taua e le loia a le malo, o Mitzie Folau, na mafua ona vave faia le sauniga lea i le masina o Aperila, ona o le taimi tonu lava lea na malaga mai ai sui o le Ofisa o le Initeria i le fu’a a le teritori, ma manatu ai loa le malo o se avanoa lelei lea e faia ai lea sauniga aua o lea ua auai mai le sui failautusi a le Initeria ia Anthony Babauta.

Na faamaonia e Pereira i le faamasinoga le maea lea ona tusia ma pasia le ata atoa o le galuega, ma ua latou tuuina atu foi i le konekarate ua latou filifilia e fausiaina le fale.

Ina ua fesiligia le alii fomai ia Dr. Fuimaono na ia taua ai e faapea, e tusa ma le toatolu i latou e aafia i le gasegase o le mafaufau o loo latou togafitiina i le taimi nei, ae talu ai e leai se fomai o le mafaufau o galue i le Soifua Maloloina, o le mafuaaga lea latou te faaaogaina ai le alii fomai o loo galue i le LBJ ia Dr. Biukoto, peitai o le faamatalaga e nofo lelei i le finagalo o le faamasino sili, ona o lona talitonuga o le Soifua Maloloina lea o loo i ai le matafaioi i lalo o le tulafono, latou te tuuina atu ai le tautua mo le tausia lelei o gasegase nei.

O le aso 20 Iulai lea ua toe tolopo i ai lenei iloiloga ma le faatonuga a le alii faamasino sili, o le aso lea e tatau ona oo atu ai le Faatonu le tumau o le Soifua Maloloina mo le taliina o nisi o fesili o loo fia malamalama i ai le faamasinoga.