Login

AUSIA PASI MATALASI MANAOGA TULAFONO

frostlehualani@yahoo.com
O se va’aiga i le faipisinisi pasi o lo ua usita’i i le fa’atonuga a le Komisi o Feoa’iga i le atunu’u ina ia faia fusipa’u o avepasi ma ia faia fo’i faitoto’a i keli o pasi ma ua mae’a pasia ana pasi e lua “Le Samoa Matalasi mai Mapusagafou, Moli & Tammy Fa’alogo & Emma Fa’alogo. [ata: Leua Aiono Frost]

Ua vaaia le usitaia e nisi o le au fai pasi o se tasi o manaoga o le tulafono, ina ia fai fusipa’u o ave pasi ma ia i ai foi ni faitoto’a i le pito i tua o le pasi, e faaagaga ai mo taimi o ni faalavelave faafuase’i.

O le vaiaso nei na vaaia ai i pasi a le kamupani fai pasi o le Le Samoa Matalasi Transportation lo latou ausia o nei manaoga, lea e pei ona faalauiloa i se fonotaga sa faia i le masina o Mati na te’a, a le Matagaluega o Fefaatauaiga ma Alamanuia mai le aufai pasi i le atunuu.

Na taua e Moli Faalogo lea e anaia pasi a le Matalasi, o lona faanaunautaiga ia usitaia pea tulafono e pei ona tuuina atu e le matagaluega a le malo.

Ona o lea aiga o le a umi se taimi e malaga ai i fafo, ma e tatau ona lelei atoatoa lea itu o le auaunaga, o lea ua mafuli ai ina ia faia suiga fou o fausaga o pasi ae le’i tu’ua laufanua o Amerika Samoa.

“Ina ia le taofia fo’i le auaunaga ona o le fa’atamala ma ua le usita’ia lenei tulafono ua fa’amamafa mai e le DOC, o lea ua manatu ai, e sili ona usita’i ma fausia suiga nei, ona fa’aauau ai lea o le auaunaga ali’i ave pasi.” O se tala lea a Tamara Roberts Fa’alogo, le Admin. Officer o Le Samoa Matalasi.

Ina ua va’aia suiga nei ua fa’atino, sa saunoa le ali’i loia o le Komisi lea a le DOC, Sean Morrison, “I la’u va’aiga i le faitoto’a lea e i tua, ua mae’a usita’ia le aiaiga, peita’i, e vaiti ma e tauau e le ofi mai ai le to’atele o le pasese!”

Ua fa’apea fo’i se fanoga o le sui o le komisi o feoa’iga i alatele, Vai’ausia Yandall, peita’i ina ua fesiligia, “Na muamua fa’ao’o le lautele ma le umi e ao ina fausia ai nei faitoto’a i le keli o pasi i ali’i faipase pe leai?” Na tali i latou uma, e leai, sa na ona fa’atonu, ae le’i fa’ailoa ni ona aiaiga tamau mo lea suiga i le fausaga o pasi la’u pasese.

Fesiligia fo’i le susuga le Faipasi, Moli Fa’alogo ma le faletua i se totogi o nei suiga ua faia i a la pasi e lua nei ua taumafai e pasia nei, ae fa’aalia e i la’ua, “E ta’i $500. i le pasi e tasi, na suia ai nei aiaiga fou o fausaga o pasi la’u pasese, e aofia ai ma le totogi o le Kamuta na faia le galuega.”

Ina ua feutaga’i i le tulaga pe pasia le tele o le faitoto’a i le keli o nei pasi ua mae’a aumai e pasi, ae fa’ailoa ai e sui o le komisi, “E pei lava e le taitai mafai ona ofi mai ai tagata tino lapopo’a mai lea faitoto’a!”

Peita’i, na fa’ailoa se manatu o le tusitala sa i ai i le taeao ananafi, “Afai e tutusa le lautele o le faitoto’a i tua ma le faitoto’a i luma o le pasi, e le mafai ona fai mai e le lava lea tele o i ai le faitoto’a i le keli.”

Ina ua fuaina, e tutusa le lautele, ae o le umi o lo’o lua futu ma la afa le umi o faitoto’a nei i pasi uma e lua, ma ua toe fetu’una’i ai, e taofia i le taimi nei, le toe fa’amalosi o nei suiga e lua i fausaga o pasi la’u pasese, se’ia toe fono le Komisi ma toe tu’u sa’o mai ai fa’atonuga tamau e fa’amalosia ai fusipa’u o avepasi ma faitoto’a i keli o pasi.

O se mea lelei le usita’i, ma ua fa’atino, lea ua iloga ifo, e i ai lape o le fa’atonuga ia faia nei suiga, ae o lona lelei, ua talia fo’i e feoa’i pea nei pasi ma suiga ua i ai, atonu e le ofi ai le vaega mamafa tele ma tino lapopo’a, ae ofi lava le to’atele.



Related



Comment Here