Ads by Google Ads by Google

Matagofie taumafaiga alii 10 tausaga i tauvaga si’isi’i u’amea mamafa

O le alii o Anahkena Willie Faagu mai le au siisii u’amea mamafa a Amerika Samoa, na malaga atu i le taamilosaga a le Oceania (Oceania & Commonwealth Championship) sa talimalo ai Samoa, o se ulua’i ali’i talavou lea ua tausinio i ni taamilosaga fa’avaomalo i totonu o le Pasefika.

O le alii o Anahkena, e 10 ona tausaga ma o lo o aoga o ia i le Aoga Tulaga Muamua a Tafuna i le taimi nei, sa tauva o ia i le paga o le 50kg ma sui mai atunuu e pei o Niu Sila, Ausetalia ma Kiripati.

Na faaalia e lona tama, o ia foi lea o le faiaoga a le au siisii a Amerika Samoa, susuga Lopesi Faagu, e 12 tausaga e amata ai ona tauva se tasi i taaloga siisii, peitai sa talia e le pulega o le taamilosaga ia Anahkena, ona o lo’o ia te ia le faanaunauga e fia avea ma tama siisii i le lumanai.

“O Anahkena lava le ulua’i ali’i laititi ua faamauina le tauva ai i taamilosaga siisii u’amea mamafa i le Pasefika, ma o se tulaga fo’i lea e mitamita ai lo tatou atunuu, ona o le alualu i luma o le taleni a ana tama fanau,” o le saunoaga lea a Faagu.

Na taua e le alii faiaoga, sa manaia le tulaga na i ai le sii a Anahkena i Apia, sa to’atele foi nisi o le pulega na molimauina ana  taumafaiga, e ui e le’i manuia sana taumafaiga mo se pine.

Mai i le to’afitu na si’i malaga atu, e to’alua alii na maua a la pine apa memea.  O i laua na maua a la pine e aofia ai James Satila lea na sii i le aupaga o le 85kg ma Vainuupo David Jungblut na tauva i le aupaga o le 105kg.

O le taamilosaga lenei na tau saili ai ni sui o le Pasefika e aveina atu i le Olimipeka i Lonetona i le fa’ai’uga o le tausaga nei.