Login

Tala mai Samoa

MOLIA LE SUPAVAISA O LE INTER ISLAND I LE GAOI

Na tulai foi se mafine e 29 tausaga I le faamasinoga I le moliaga lava lea o le gaoi ao avea ma tagata faigaluega. O ia lea o Kilisitina Tevaga Sio mai le afioaga o Afega ma sa galue muamua o ia o se supavaisa I le kamupani vaalele o le Inter Island Airways I le vaega e faatoai I ai tagata lautele mo avanoa e malaga ai I faigamalaga a le Inter Island I le va o Samoa ma Amerika Samoa.

 Na faaalia I faamaumauga a le faamasinoga e faapea, o le aso 20 o Aperila sa faigaluega ai lea tamaitai ma ia toesea ai se tinoitupe e tusa ma le $1,311 o tupe a tagata sa totogi o latou pasese. O le aso na sosoo ai na oo atu ai le pule e ao ma faapaleni tupe maua a le kamupani I lena vaiaso ma sa ia maua ai ua leai lea tinoitupe. Sa fesiligia e le pule le ua molia ma sa ioe o ia ua ia avea le tupe, ma sa faapea loa ona oo atu lea mataupu I le ofisa o leoleo. Peitai ua toe oo atu I luma o le faamasinoga le tusi a le alii pule o le kamupani ina ia toe tatala I tua lea mataupu, ma ua uma foi ona toe totogi e lea tamaitai le tinoitupe atoa. Na faaalia foi e le tamaitai ua molia lona salamo.

Peitai na saunoa Faamasino Vui Clarence Nelson, e le toe foi se faaiuga ua faia e le faamasinoga, aemaise ai o se tasi lenei o solitulafono ua matauina le faatupulaia I totonu o le atunuu. Fai mai a ia, o le tusi a le alii pule a le kamupani o le a aoga lea mo le tamaitai e faailoa ai ona itu lelei, ae o se iuga e faia ona o le solitulafono ua faia, e ao lava ona faatino. O le faaiuga o le vaiaso nei o le a lauina ai lona iuga.

MOLIA ALII E TOALUA I LE GAOI O TA’AIGA IE MAI LE FALEOLOA O FRANKIE

E toalua ni alii sa faigaluega muamua I le faleoloa o Frankie I Taufusi sa tulai I luma o le faamasinoga I le moliaga o le gaoi ao avea ma tagata faigaluega. O I laua ia o Thomas Kanogata, e 27 tausaga mai Taufusi ma Avei Mauigoa, e 22 tausaga mai Vailoa-tai. O lo o molia I laua nei I lo la ave faagaoi o ni ta’aiga ie se tolu ua maea ona lolomiina, o se mea totino a le kamupani a Frankie, e aunoa ma se faatagaga.

O le tau aofai o nei oloa e $972. Na faailoa e le itu a leoleo e faapea, o le aso na ave faagaoi ai e I laua ua molia ia ta’aiga ie, sa lipoti atu e nisi sa molimauina lea solitulafono ma sa faapea ona tuliloa I laua e se taavale a leoleo. Peitai na maua e le faamasinoga maualuga, e le o se taimi muamua lea ua tulai ai I laua ua molia I luma o le faamasinoga. Na faaalia, o Thomas Kanogata na molia muamua I se faalavelave sa tulai mai lea na iu ina maliu ai se tasi, ae o Avei Mauigoa sa molia muamua o ia I le faaoolima, ma o le taimi nei o lo o nofo faavaavaaia pea I laua mo le tasi le tausaga. Na faamaualalo ma talosaga ia alii mo se avanoa mo I laua. Peitai na saunoa Faamasino Vui Clarence Nelson e faapea, e le o se taimi muamua lenei ua molia ai I laua ma e faigata tele ona talitonuina e le faamasinoga maualuga o I laua ua salamo. O lo o taofia nei I laua e leoleo seia lauina o la iuga I le faaiuga o le vaiaso nei.

FAI LE FAAIUGA A LE FAAMASINOGA O APILI E TOE LOKA LE TAMA MATAIFALE

Ua faatonuina e le faamasinoga o apili le faafalepuipuiina o se tama e 57 tausaga le matua na faamaonia I luma o le faamasinoga maualuga ona moliaga o le faiaiga ma lona lava afafine moni, lea sa faatonuina e le faamasinoga maualuga e totogi na o se salatupe e silia ma le $10,000. Peitai, o le faaiuga a le faamasinoga o apili ua toe suia ai le iuga na faia e le faamasinoga maualuga, ma ua faasalaina ai nei lea tama I le falepuipui mo le umi e 12 masina.

O le iuga foi ua tuanai sa faia e le faamasinoga maualuga, e totogi ai e lea tama le afa o lea seleni I lona afafine e 36 tausaga lea na aafia, lea foi na faasalaina I le falepuipui I le moliaga lava e tasi. E ui I lea, ua faataatia ese e le faamasinoga o apili lea faaiuga o le totogiina atu o le seleni, ae faatonuina le tatala mai I tua mai le falepuipui o le tamaitai na aafia, ina ua maea ona tuli le valu masina o lona faasalaga e tolu tausaga. I le faaiuga a le faamasinoga o apili o lo o taua ai lo latou silasila I le tele o itu e aofia ai le tuua e le tama o le na aafia ina ua faatoa soifua mai, ma mulimuli ane faaaoga e lea tama o ia ina ua matua. E le gata I lea, ua ioe lea tamaitai I le mea na tupu ma faaalia pea lona lagolago I lona tama I le taimi na fofogaina ai lona faasalaga e ui I gaioiga sese sa faia ia te ia. Sa faapea foi ona silasila le faamasinoga I le taimi na ia tuliina I le falepuipui atoa ai ma le faate’aina ese o ia mai lona afioaga.

NANA E LE TINA LE FAAMALOSI E LANA TANE O LANA TAMA TEINE

O lo o talia nei e le faamasinoga maualuga le taunuuga o le fautuaga ma se poloaiga a le afioga Faamasino Vui Clarence Nelson, sa ia fesiligia ai le itu a leoleo pe le ua alagatatau ona faatino ni moliaga faasaga I se tina e le o mafai ona faalauiloaina lona igoa, ona ua maua I suesuega a le faamasinoga le tele o lona aafiaga I le nanaina lea o se solitulafono matuia. O lea mataupu ua faasalaina ai nei e le faamasinoga le tama o lea aiga e 43 tausaga le matua mai se afioaga I Savaii, ina ua faamaonia lona mataifale ma le faiaiga faamalosi I lona afafine fai. Na faaalia I faamaumauga a le faamasinoga e faapea, na loka e lea tama le potu ma ia taumafai e faamalosi lona afafine fai, ae sa tetee malosi lea teineititi.

Sa iu ina tu’i e lea alii le teineititi ma matapogia ai o ia. E toe te’i ifo le teineititi, o lo o taliaga tau I luga o le moega, ae ua leai ni ona ofu ma ua leai foi le ua molia. Sa logo e ia lona tina ma ia faamatala I ai le mea na tupu, ae fautua I ai lea tina le alofa, e aua nei iloa e se tasi o lo latou aiga le mea na tupu. O lea faalavelave na tulai mai I le tausaga e 2005. Peitai o le tausaga na tea nei na toe vevesi ai foi lea tama ma lona afafine fai I le maketi I Salelologa ma sa toe alia’e ai lea mataupu ina ua taumafai le tama e so’a lona afafine fai I le taavale sa ia faafoeina. Sa lipoti e lea teineititi lea faiga I leoleo ma sa ia toe faamatalaina ai loa ma le faiaiga faamlso o le ua molia ia te ia I le 2005.

Ua faasalaina nei e le faamasinoga lea tama I le 15 tausaga I le falepuipui mo le solitulafono na ia faatinoina I lona afafine fai I le 2005 ae faatoa 15 tausaga o lea teineititi. Na saunoa tuusa’o le afioga Faamasino Vui Clarence Nelson I le tina o lea teineititi ma ia faaalia, e le aoga ona toe ta’u o ia o se tina ona o lona nanaina o lenei solitulafono matuia na faia I lana lava tama moni.

MAUA LE VAA FOU O TOELAU MAI LE MALO NIU SILA

O le a faamanuiaina nei atumotu o Toelau I se vaa la’u pasese ma se vaa la’u oloa fou lava mai le malo Niu Sila, I le tuanai ai o le fitu tausaga talu ona amata mai sailiiliga ma suesuega I auala eseese e suia ai le vaa o lo o faaaogaina I le taimi nei. O le sa o lo o faaaogaina nei e oo atu I le lua aso faatoa taunuu I motu o Toelau pe a malaga atu I Samoa, ma o le sa fou o le a faaaogaina e felauai tagata atoa ai ma oloa. O le faasilasilaga I le faatauina o lenei sa fou o le a faaaogaina e tagata Toelau, na faalauiloa aloaia lea e le kovana aoao o Aotearoa, o Sir Jerry Mataparae, I lana uluai asiasiga I Toelau ina ua malaga ese atu ma Samoa I le maea ai o le faamanatuina o le 50 tausaga o le malo tutoatasi o le atunuu.

TAUNUU ALII SUESUE FAAPITOA MAI NIU SILA E SUESUE LE FAALAVELAVE I FALEATIU

E toatolu ni alii suesue faapitoa mai Niu Sila ua taunuu mai I Samoa e fesoasoani I galuega suesue a le matagaluega o leoleo ma falepuipui o lo o faagasolo nei I le mataupu e faatatau i taugafana na faia I le va o leoleo ma nisi mai Faleatiu lea na maliu ai se tasi o lea aiga I Faleatiu.

E pei ona lipotia muamua I a tatou tala, na maliu le alii o Togia Rapi I le pulu o se laau malosi o lo o masalomia mai se laau malosi a malu o le malo po o se isi lava o le aiga I le taimi na oo atu ai malu o le malo e faatino a latou suesuega faapitoa I le sailia o maota o le aiga na aafia, lea sa masalomia I laau faasaina. Na talosagaina e le matagaluega o leoleo ma falepuipui le malo Niu Sila e ala atu I se tasi o a latou polokalama fesoasoani, ina ia auina mai nei tagata suesue faapitoa e taumafai e saili se tali mautu o lenei mataupu.

O le amataga o le vaiaso nei na amatalia ai suesuega a nei alii suesue mai Niu Sila I le afioaga o Faleatiu. E oo mai I le taimi nei, e lei maua mai lava le mafuaaga tonu o le maliu o le na aafia I le taotoga faapitoa sa faia I lona tino maliu e pei ona moomia I lalo o le tulafono. E leai foi se isi ua molia I le faaaogaina o laau malosi I lea faalavelave.

TOE TOLOPO LE FAATUINA O SUAFA E FILIFILI MAI AI LE AO MAMALU O LE MALO

Ua pasia nei le lafo I luma o le palemene e toe tolopo ai le faatuina o suafa o I latou e filifilia e tauaveina le tofi o le ao mamalu o le malo Samoa. O le afioga I le ao mamalu o le malo, le afioga Tuiatua Tupua Tamasese Efi ua ia tauaveina le tofi mo le umi e lima tausaga e pei ona aiaia mai I lalo o le faavae, ina ua tuumalo le susuga Malietoa Tanumafili II. O lo o taua foi I le faavae, e mafai lava foi e le palemene ona toe filifilia soo se tasi o lo o tulai mai I le tofi mo se isi paeaiga.

E lima vaiaso ua pasia nei e toe tolopo atu I ai le faatuina o suafa e filifilia mai ai le ao mamalu o le malo. Ua tuumalo I laua sa filifilia ae le o ni Tama a Aiga I le fono a sui tofia, le afioga Vaai Kolone ma le afioga Matai’a Visesio Europa. Ua toe nei na o le Tama a Aiga, le afioga I le Tui Aana Tuimalealiifano Sualauvi II o lo o seei nei I le fono a sui tofia.

Saunia: Lilomaiava Andrew Fa’asau/Naenae Productions



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.