Login

Tele mataupu na laga i le iloiloga a le falema’i

ausage@samoanews.com

O le mafuaaga autu e talitonu le falema’i ua mafua ai ona to’atele tagata mama’i, tele vailaau ma fualaau e mana’omia mo togafitiga o gasegase, o le soona tausami o tagata o le atunuu i taumafa e le tatau mo le tino, ma ua avea ai Samoa o le atunuu numera tasi i le lalolagi i le lapopo’a o ona tagata.

I le ulua’i folasaga a le Taitaifono o le Komiti Faafoe a le Falemai o le LBJ i le fonotaga lea sa faia i le aso Faraile na te’a nei, e faamalamalama ai e le falemai a latou siitaga i le atunuu, sa saunoa ai Moananu Va e faapea, i suesuega sa faia e le Vaega o le Soifua Maloloina i le lalolagi, ua manino mai, o Samoa e numera tasi i le lalolagi i le lapopo’a ma mamafa ona tagata.

“Aisea e mafua ai ona lapopo’a, mamafa ma aafia gofie tagata Samoa i ma’i, e mafua mai i le sese o meaai o loo tatou faaaogaoina, e fiafia tele i apa inu, o nai mea suamalie ae ua le naunau e faaaoga taumafa e maua ai le soifua maloloina,” o le saunaoga lea a Moananu.

O nisi o faamaumauga na faailoa e Moananu i le fonotaga i le vaiaso na te’a nei sa ia taua ai e faapea, mai le toa 117 o tagata o lo o togafitia i le gasegase o le faamama toto i le taimi nei i le LBJ, o lo o aofia ai ma se tamaititi e 14 tausaga le matua.

Na taua e Moananu, o le mafuaaga autu o nei faafitauli, o le le fuafua lelei e le atunuu o taumafai tatau mo i latou.

I tulaga o pepe na fananau mai i le uluai 5 masina o le tausaga, o lo o taua ai le toatele o pepe na fananau mai ia Ianuari seia oo mai ia Me na te’a nei.

I le masina o Ianuari, e 94 pepe na fananau ai, o Fepuari e 89, o Mati e 91, o Aperila e 92  ma Me e 97.

“Ua to’atele naua pepe o loo faananau mai i lea masina ma lea masina, ma ua tele naua ai togafitiga e manaomia e le falemai mo le atunuu, ae o loo feagai le falemai ma faafitauli tau tupe i le taimi nei, ma ua avea ai lea o se tasi o to’atuga i le auaunaga a le falemai mo le atunuu,” o le saunoaga lea a Moananu.

E lata i le toa 30 i latou na faatasi atu i le iloiloga lea sa valaauina e le pulega a le LBJ i le aso Faraile na te’a nei, e faamanino atili ai tulaga o siitaga i ana tautua ia ua fuafua e faamamaluina i se taimi o le masina fou.

Na taua e le pulesili o le LBJ ia Michael Gerstenberger e faapea, o le tautua autu a le LBJ, e le aofia ai le sailiga o tupe e faatupe ai ana tautua.

O nisi na auai i lenei iloiloga e aofia ai tagata taitoatasi, o se alii faipule mai le fono faitulafono ia Faimealelei A. Allen, o alii ma tamaitai fomai o le LBJ, atoa ai ma se sui o lo o tauva i le faiga palota o loo lumanai nei mo le tofi lutena kovana, le tofa ia Lei S. Thompson.

O le mataupu na lagalaga ai finagalo o le toatele, o le tulaga i totogi o tagata faigaluega a le falemai, lea na taua e Gerstenberger e faapea, o le 52% o le latou paketi e $37 miliona e alu i totogi o tagata faigaluega.

Saunoa le alii faipule ia Faimealelei, e tatau i le pule o le falemai ona faamanino atili lana faamatalaga i tulaga o totogi, ina ia manino lelei pe fia le tupe o lo o alu i le totogiina o tagata o loo galulue i le aso ma le po e tautua le atunuu, ae fia foi le tupe o loo totogi ai le vaega lea e nofonofo i totonu o le ea malulu, ma ta’i to’alua pe ta’i to’atolu foi i le faatinoina o le galuega e tasi.

Na taua e Gerstenberger e faapea, o le faafitauli o le paketi a le LBJ o loo i ai, o le 80% e faalagolago i tupe mai le feterale, peitai o lea ua faaalia e le malo tele nisi o ana fuafuaga e aofia ai le faaitiitia o tupe o loo faaalu i nisi o ana polokalame, ona o le tulaga faaletonu ua i ai le tamaoaiga o le lalolagi i le taimi nei.

Fai mai Gerstenberger, afai ae faaitiitia tupe o loo aumai i le feterale mo le LBJ, o lona uiga o le a faapea foi ona faaauau pea ona feagai le LBJ ma faafitauli tau tupe.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.