Login

Mana’omia ona sii totogi ae tele foi sona lavelave

ausage@samoanews.com

E ui o lea ua toe o se aga mae’a le nofoaiga a le afioga i le matua ia Togiola Tulafono i le tofi Kovana Sili o le malo, peita’i ua ia faatula’ia se lu’itau malosi, ina ia toe si’i totogi o tagata faigaluega uma i le teritori, ina ia o gatasi ma le tulaga maualuga ua i ai le tau o le soifuaga i le taimi nei.

O le mataupu i le taugata o pili a le falema’i, ASPA faapea ai ma le maualuga o le tau o oloa ua i ai nei, na taua ai e nisi i luga o le polokalama a le alii kovana i le tele o masina ua sola e aofia ai ma le vaiaso na te’a nei, e leai lava se isi auala e mafai ai ona foia le faafitauli o lo o fetaia’i ma le atunuu i le taugata o pili ma le tau o oloa nai lo le sii i luga o totogi, ina ia gafatia ai e tagata uma ona tali manaoga tau tupe i totonu o aiga.

O lea mataupu na toe mapuna a’e i luga o le polokalama a le alii kovana sili ia Togiola Tulafono i le faaiuga o le vaiaso na te’a nei, ina ua laga e nisi o tootoo le tulaga o sii a le falemai o le LBJ lea foi ua toe faaolioli mai.

Fai mai le manatu a se tasi o tama matua, o le faafitauli o lo o ia maitauina, o loo agai pea i luga tau o pili a le falemai ae le o mafai lava ona sii totogi o tagata faigaluega, peitai na taua e le isi tootoo e faapea, afai e le toe mafai se isi siitaga i totogi o tagata, e tatau lava i le malo ona saili se auala e taoti ai le sii pea i luga o le tau o oloa i le atunuu.

“O le mea lea ua i ai e le taitai gafatia e la’u siaki o loo maua mai i le vaiaso ona totogi pili a le falemai, ASPA ma faasoasoa fo’i i lo’u aiga, ua matua pagatia lava le tulaga lea ua i ai le atunuu ona o le taugata o le soifuaga atoa ai ma pili a le falema’i,” o le tomumu lea a le isi tama i luga o le polokalame a le kovana i le aso To’ona’i na te’a nei.

I le tali fuaitau atu ai a le alii kovana i finagalo faaalia na ia taua ai e faapea, e le gata e le fou mataupu nei i lana faalogologo, ae o ni manatu foi e sili ona matagofie ma taua mo ia o le ta’ita’i, aua o moomooga fo’i ia o lona loto ia vave mai se taimi e toe faia ai nisi siitaga i totogi o tagata faigaluega, ‘peita’i’ e ao fo’i ona silafia e le atunuu, e le la’ititi le upu lea o le “si’i o totogi” pe a oo ina aapa mai le malo e faatino.

“Afai o le a sii totogi o tagata faigaluega, e le na o totogi amata e si’i ae si’i uma ai lava ma soo se totogi e aofia ai tagata e maualuluga o latou totogi o loo i ai, ina ia tagafeagai ai ma manaoga o le tulafono, ma o le isi la lena faafitauli e tula’i mai pe afai ae sii totogi amata,” o le saunoaga lea a Togiola.

O le isi faafitauli na taua e le alii kovana e tatau ona fuafua i ai le siitaga o totogi, e tatau ona fuafua siitaga o totogi i le malosi o loo i ai le tamaoaiga o le atunuu, ina ia gafatia e le tamaoaiga le maualuluga o totogi.

E ui e le o se mataupu e fou lenei i le faafofoga a le atunuu, peitai na saunoa Togiola, o se tasi lea o mataupu e ao lava pea ona faamanino i taimi uma, ona o loo i ai lava nisi o loo faia faasalalauga sese ma tuuaiga le sa’o fai mai o le malo lea e mumusu e sii totogi amata.

Ae na faamanino e Togiola e faapea, soo se taitai lava o se malo e pei fo’i o ia, e vaavaai muamua lava i le faaiuga o le a fai, pe o se faaiuga e manuia ma lelei ai tagata ma le malo, e pei fo’i la o le mataupu i le sii o totogi.

“O le a le faafitauli sa tatou maitauina ina ua sii totogi i le taimi ua te’a, e le gata na aafia pisinisi ae na oo lava foi i le toa 1,800 lea na galulue i le Samoa Packing na faamuta uma a latou galuega ina ua le gafatia e le kamupani le maualuluga o le siitaga o totogi, ma e oo mai lava i le taimi nei ua matua leai lava ni galuega a le to’atele o i latou nei,” o le saunoaga faatupu manatu lea a le alii kovana.

E ui o se mataupu ua leva lenei mataupu peitai e talitonu le alii kovana, e ao pea lava ona faamanino ma faatalanoa, ina ia matua malamalama lelei le atunuu i le pogai e ala ai ona ia naunau e faateletelegese siitaga o totogi i le taimi nei.

Saunoa Togiola, na te lagolagoina le sii o totogi, a ia fuafua i le tamaoaiga o le teritori.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.