O le Mau e ao ina Tusia - “Anava Fetalai!”

Ina ia taoto fa’amaene le i’a o le tai loloto i finagalo fa’ailo ae maise o le silafia i le au faitau, o le galuega tusitusi, e sili ona mausali ona fau! E le’i moemoe noa le au faitau laulu o le atunu’u, le vaega ua fa’asino a’ao i ai le Tusi Pa’ia, o le au Tusiupu! Mai le 50 tausaga o tau fau ao fau po le malo taliilagi o Samoa, fa’afetai sa i ai i latou na moe miti i le atoaga o lona 50 tausaga, e fa’amati’a ai se galuega tapena mo le lumana’i o fanau i le gagana fetalai fa’atulafale ma failauga o le upu fa’a-Samoa, lana anava fetalai.

Fa’afetai lea i le Toa mai A’ana, sa moe manatunatu i lona lava taimi e tali ai ona fa’amanuiaga! O oe o ‘Ape’ i le taimi nei, lau tofa Teleia’i Fanaea Christian Ausage, i lou sao ua ta’ua ai Mu ma Ve’a i faigamea a lo ta’ua malo Tuto’atasi.

O le tusi o lou sao, ua autasi i ta’ua i lo ta ala fita i le tai o’oo’o o le faigata ona tautala o le fanau i le gagana, ae maise o le mafai ona latou fa’amatala ai o latou lagona i ni tusi fa’amaumau. Tau ina ou pi’iama i lou va’a, a’o e folau, e fa’afetaia ai taeao o fa’aeaga, ia mafai ona toe ea mai la ta’ua gagana i ona paega i a’ai ma finagalo o tatou tagata.

O le tusitala o lenei Tusi “Anava Fetalai” o le tofa Teleia’i Ausage, ma ua ia fa’ailoa mai e tolu lelei tausaga o ia taumafai ia mae’a lea tapenaga mo failauga o le Gagana Samoa. O ia o le Faia’oga Ulu o le Gagana Samoa i le Kolisi Tu’ufa’atasi, sa a’oa’oina fo’i i le gagana i le Iunivesite o Samoa ma maua ai ona fa’ailoga maualuluga BA Gagana Samoa, MSS Gagana Samoa ina ua mae’a au a’oa’oga i Amerika Samoa e afua mai le Kolisi Tu’ufa’atasi ma le Iunivesite o Hawaii i Manoa.

O le ‘au’au o lana galuega lea ua mae’a fa’atauina atu, “Ia avea lana tusi “Anava Fetalai” ma to’omaga mo tagata e fia sailiili atili i lauga fa’asamo i so’o se fa’alavelave atoa ai ma le fesoasoani i faia’oga o lo’o a’oa’oina le aganu’u Samoa.”

O le Lavea’i Samoan Language Institute i Malaeloa, o lo’o ua mafai ona fa’afeso’ota’ia mo se kopi o lenei tusi aoga mo failauga o le upu Samoa, fa’atasi ai ma le fanau talavou ua naunau ia mau’oa i le anava fetalai.