Login

Maua se alii Saina o maliu i luga o lona moega

ausage@samoanews.com
Se vaaiga atu lena i le taimi na tatala ai e alii leoleo suesue le taavale a le alii Saina lea na maua o maliu i totonu o lona fale, ma ua i lalo nei o le vaavaaiga a le Ofisa o leoleo le taavale a le alii ao faagasolo ai a latou suesuega i le taimi nei. (ata AF)

O lo o faagasolo i le taimi nei suesuega a le Vaega Suesue o le Ofisa o Leoleo, i le faalavelave lea na maua atu ai se alii Saina o lo o maliu i lona fale i Satala, i le faaiuga o le vaiaso na te’a nei.

Na faamaonia e le Taitai o le Vaega Suesue a le Leoleo ia Cpt. Lavatai Taase Sagapolutele e faapea, o lenei alii Saina e 56 tausaga lona matua ma “o le taimi nei o loo faagasolo suesuega a le Ofisa o leoleo e uiga i lenei mataupu, ma e le mafai ona ou talanoa atu i le mafuaaga o le maliu o lenei alii sei vagana ua maea suesuega o lo o faagasolo i le taimi nei”.

“O le taeao nei na maua ai e leoleo le tino maliu o le alii Saina lenei, ma ua auina atu nei lona tino i le falemaliu i le falema’i i Fagaalu.”

Ina ua asia e le Samoa News le nofoaga na tulai mai ai lenei faalavelave i Satala i le aoauli ananafi, na vaaia ai leoleo e to’alima o lo o faia a latou su’esu’ega.

E toatasi le molimau na mafai ona fesiligia e le Samoa News e uiga i lenei mataupu, o ia lea o Tiana Tamaseu, o le tausoga o le tamaitai lea e ana ia le fale na mautotogi ai le alii Saina ua maliu, lea e sosoo lava ma le fale kalapu a le Karaoke i Satala.

Na taua e le tina o Tamaseu i le Samoa News e faapea, o le alii Saina lenei ua tele tausaga o mau totogi i le fale lea, lea foi o loo faatautaia ai lana pisinisi o le faleoloa ma le faleaiga.

Na taua e le molimau e faapea, o le aso Tofi na te’a nei na agai atu ai le tama a lona tausoga e piki mai le tupe mo le totogi o le fale, peitai na fiu e tu’itu’i le faitoto’a e le’i tatalaina lava, sei vagana ai le taavale o loo tu i luma o le fale.

“Na toe alu atu le teine i le aso Faraile ma le aso Toonai e toe siaki le Saina mo le tupe o le rent, peitai na fiu foi e tuitui le faitotoa e lei tatalaina lava, o lea na ia viliina ai loa le ofisa o leoleo ananei i le taeao (taeao ananafi), ma o mai ai loa leoleo ua tatala le fale ma o i totonu, ma latou maua atu ai le alii Saina o loo maliu ai,” o le tala lea a le molimau.

Na taua e Tamaseu e faapea, o le alii Saina ua mali e na o ia lava lona aiga, ona ua tete’a ma lona toalua ma ua alu lava le fafine ma ave le la fanau e toalua.

“O le aso Sa na te’a nei na ma talanoa ai ma si tamaloa, ona ou fesili lea i ai poo a mai o ia, ae fai mai o ia ua ma’i, o le taimi mulimuli lena na gata mai ai le ma talanoaga ma le tamaloa,” o le molimau lea a Tamaseu.

Na taua e Tamaseu, o nisi o faafitauli sa ia maitauina i le aiga o le alii Saina lenei, e aofia ai le tapuni o lana faleoloa ina ua le mafai ona toe faafou le laisene, tipi le pili eletise, ma atonu o nisi ia o faafitauli ua mamafa i lona mafaufau ao nofo toatasi ai na o ia i lona aiga.

“O se tagata e filemu ma loto alofa i tagata, e iu ua faatele ona talepe e tagata lana faleoloa ma gaoi oloa ae finau pea o ia e fai lana pisinisi,” o nisi ia o uiga e manatua ai e Tamaseu le alii Saina ua maliu.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.