Login

35 masina fa’asala ai Paul Solofa Falepuipui Honolulu

reporters@samoanews.com

E 35 masina lea ua faasala ai e le Faamasinoga Feterale le alii sa avea ma pule o le polokalame o le School Lunch a le Matagaluega o Aoga a le malo, susuga Paul Solofa, e nofosala ai i le falepuipui, ina ua faamaonia e le vaega iloilo iuga lona aafia ai i le faatauina faasolitulafono o totoga o pasi aoga.

O le alii o Solofa, lea ua 50 ona tausaga na tausala i moliaga e lua o le faalavelave lea i molimau a le malo atoa ai ma lona faalavelave i galuega a le faamasinoga.

Ina ua ta’usalaina Solofa e le vaega iloilo iuga ia Ianuari na te’a nei, na taua ai e le itu a le malo le ono faasala o ia i le toese mo le 20 tausaga atoa ai ma le salatupe e $250,000 i le moliaga o le taumafai e faaleaga mea molimau a le malo, ae 10 tausaga e falepuipui ai ma le salatupe e $250,000 mo le moliaga o le faalavelave lea i galuega a le faamasinoga.

Ae i le ripoti sa saunia e le Ofisa Faanofovaavaaia i le masina na tea nei, sa latou taua ai le ono mafai lea ona faasala Solofa i le toese mai le 41 masina e oo atu i le 51 masina le umi, o le mafuaaga lea na talosaga ai Solofa tauala atu i lana loia ina ia faamama lana faasalaga, ona e i ai aafiaga o lona soifua maloloina e manaomia ai lona i ai pea i lona aiga.

O moliaga ua ta’usala ai Solofa na afua mai i le taimi ao avea o ia ma faauluuluga i le vaega o le Tupe a le Ofisa o Aoga. Sa toe tofia o ia na te vaaia le isi vaega i totonu lava o le Ofisa o Aoga, ao lei taofia faapagota o ia i le 2010, ao avea o ia ma faauluuluga o le polokalame o le School Lunch.

Na amata taofia mai o ia i le masina o Fepuari na te’a nei i le falepuipui a le feterale i Honolulu, e faatali ai le lauina o lona faasalaga i le vaiaso na te’a nei.

Na taua e le sui sooupu a le matagaluega o Faamasinoga a le malo tele ia Alisa Finelli e faapea, e leai se tupe na poloaina e le faamasino o Reggie B. Walton Solofa na te totogiina.

E lei maua mai foi se faamatalaga mai lana loia fautua o Michelle Peterson, ina ua fesiligia e le Samoa News e tusa ai o le faasalaga a le ua molia.

I le lauina ai o lona faasalaga na taua ai e le malo feterale e faapea, e tusa ma le $300,000 le tupe na gau ai le Ofisa o Aoga a le malo o Amerika Samoa, ona o le gaioiga faasolitulafono lea na aafia ai Solofa.

Fai mai le malo, ina ua amata ona suesueina e le FBI lenei mataupu, sa fai Solofa i le molimau autu a le malo ina ia pepelo i sui o le feterale, ma ia tago foi e faaleaga faamaumauga ina ia aua ai nei aliali mea sa latou faia.

O le molimau autu a le malo i lenei mataupu, o le alii lea o Oscar Mayer, o ia lea o le pule a le kamupani o le Pacific Products.

Fai mai foi le malo feterale, e oo mai lava i le aso na lau ai le faasalaga o Solofa o loo tumau pea lona tete’e na te lei faia se mea sese.

O le alii lea na toalua ma Solofa i lenei mataupu, le susuga ia Gustuv Nauer, na faasala e le faamasinoga i le vaiaso na tea nei i le umi e 25 masina i le toese, i le maea ai lea ona ia tali ioe i le moliaga o le taupulepule e faataunuu le solitulafono o le faia o uiga tau faasese i polokalame a le feterale.

E le o manino mai i le taimi nei pe faila e le malo feterale ni moliaga faasaga i le susuga Mayer.

(fa’aliliu Ausage Fausia)



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.