Login

Tala o Fa’amasinoga

ausage@samoanews.com

IOE NA FA’AO’OLIMA I LONA AFAFINE

O le alii lea na tuuaia e le malo i lona taumafai lea e faafefe lona afafine e ala i lona faalala i ai o se fana, atoa ai ma lona faaoolima ia te ia, ua ia tautino i luma o le faamasinoga maualuga e faamaonia tuuaiga faasaga ia te ia.

E le o mafai ona faalauiloa le igoa o le ua molia ona o puipuiga lava ina nei faigofie ai ona iloa le na aafia i lenei mataupu.

O le ua molia na uluai tuuaiga i moliaga o lona faaaoga faasolitulafono lea o se aupega, faaoolima i le tulaga tolu, umia faasolitulafono o se fana e lei lesitalaina, faapea ai ma le faatupu vevesi i nofoaga faitele, ae i lalo o le maliliega lea sa ia faia ma le malo ma ua talia foi e le faamasinoga, ua solofua ai e le malo le moliaga pito i mamafa o le faaaoga faasolitulafono o se a’upega mata’utia, ae tali ioe o ia i moliaga mama e tolu o loo totoe ai.

I le tali ioe ai o lenei alii sa ia tautino ai i le faamasinoga e faapea, i se taimi o le aso 1 Aperila, sa ia faaoolima ai i lona afafine e ala i lona tapoina o ia i ona lima, atoa ai ma lona faia o ni amioga e faafefe ai o ia ina ua ia umia se fana le ituaiga o le pulutasi e le’i laiseneina i le Ofisa o Leoleo.

Ua manatu loia o le a tuuina atu ni a laua fautuaga mo se faasalaga o lenei alii, pe afai e maeai ona saunia e le ofisa faanofovaavaaia se ripoti e uiga i le mea sa tupu, ae ua malamalama le ua molia, tusa lava pe finau loia i le faamasinoga mo se faasalaga mama mo ia, e pule le faamasinoga pe talia pe teena.

Ua ia malamalama foi, e le mafai ona toe suia lana tali ioe ua tuuina atu i le faamasinoga, pe afai e tuuina mai se faasalaga a le faamasinoga ae le tusa ai ma lona manao.

O tuuaiga faasaga i le ua molia na afua mai ina ua vili atu se tagata i lana telefoni, ma manao e fia talanoa atu i lona afafine, ma avea ai loa ma itu na ita ai le ua molia ma alu atu loa i le fale ma ia fesiligia lona afafine e uiga i le tagata na telefoni atu ia te ia.

Na taua e le malo le faaoolima o le ua molia i lona afafine atoa ai ma lona faalala i ai o se fana.

O loo tuma pea tuutuuga o loo tatala ai lenei alii i tua, e faatali ai le aso lea ua faamoemoe e lau ai lana faasalaga.

MAPU LEOTA

O le alii lea o loo tuuaia e le malo i lona faia lea o ni uiga mataga i le uso o lona to’alua, ua faatulaga e le faamasinoga lana iloiloga faapitoa e faia lea i le aso 22 Iuni i luma o le alii faamasino ia John Ward II. O Mapu Leota lea o loo tuuaia i le faatupu vevesi i nofoaga faitele.

I faamaumauga a le faamasinoga o loo taua ai e faapea, a’o moe le uso o le to’alua a le ua molia, na faafuasei ona ia faalogoina se tagata o loo tago atu ia te ia, ina ua ia ala i luga sa ia vaaia ai Leota.

Na fafagu e le tina na aafia lona toalua o loo latou momoe e faailoa i ai le mea ua tupu, ae o le taimi lea ua toe savali ese atu le ua molia i le faitotoa ma agai atu ai i fafo.

Ina ua fesiligia e leoleo le ua molia, sa ia matua teena ai lona faia o lea gaioiga i le uso o lona toalua, peitai na faaalia e le tina o loo aafia i leoleo, e le o se taimi muamua lea ua faia ai e le ua molia uiga nei ia te ia.

O loo tumau pea tuutuuga o loo tatala ai Leota i tua e faatali ai le aso lea ua faatulaga e faia ai lana faamasinoga iloilo.

DAVE TUPUA

O le alii faiaoga mai le aoga a le Manumalo lea o loo tuuaia i lona tago i se tamaitai aoga, ua sauni o ia ma lana loia e tuuina atu le la mataupu e faatulaga se aso e faia ai lana faamasinoga iloilo i luma o le faamasinoga faaitumalo.

O le aso 22 Iuni lea ua toe tolopo i ai e le alii faamasino ia John Ward II le mataupu a le susuga Dave Tupua, e iloilo ai poo tumau pea lona manatu e faataunuu sona faamasinoga iloilo, afai e tumau pea lea manatu ona faatulaga loa lea o se aso e faia ai lea faamasinoga.

O loo tuuaia Tupua i moliaga o lona taofia faapagota o se tagata i se auala sese, faapea ai ma moliaga e lua o le faaoolima i le tulaga tolu.

O tuuaiga faasaga ia Tupua na afua mai i se faalavelave na tulai mai i le masina o Tesema 2011ina ua ia tago ma taumafai e faapipi’i atu le tino o le tamaitai aoga o loo aafia ia te ia.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.