Login

TO’A 35 PAGOTA SAMOA UA MAGALO AOFIA AI MA LEAFA VITALE

ausage@samoanews.com

O le susuga ia Leafa Vitale, lea sa avea ma Minisita o le Palemene a Samoa, lea na faasala e soloatoa i le falepuipui i Tafa’igata ina ua faamaonia lona aafia i le tagatavaleina o le alii Minisita ia Luagalau Levaula Kamu, ua aofia lona igoa i le toa 35 o pagota lea sa faa sa’oloto e le malo o Samoa i le aso ananafi.

O se sauniga faapitoa sa faia i le aso ananafi i le laumua i Apia na faalauiloa aloaia ai e le afioga i le alii Palemia o Samoa, susuga Tuilaepa Sailele Malielegaoi suafa uma o pagota e toa 35 ua sa’oloto e le malo.

Ina ua fesiligia e le au faasalalau le alii Palemia e uiga ia Leafa na saunoa ai Tuilaepa e faapea, “o loo aofia ai lona igoa i le lisi o pagota o le a magalo.”

Na faamanino atili e Tuilaepa e faapea, talu ona tatala i tua Leafa mai se faaiuga a le Komiti o le Palola, o loo saini o ia i le Ofisa o leoleo i vaiaso taitasi, peitai o le faaiuga lea ua faia e le malo, o le a sa’oloto ai loa o ia e le toe saini e pei ona masani ai.

I se ripoti na lomia e le Samoa Observer i le aso Tofi na te’a nei, na faaalia ai e le susuga Leafa lona fiafia ma le faafetai i le Atua ina ua tali i ana tatalo i le aso ma le po ina ia faamagalo o ia mai mea sese sa ia faia.

Na faailoa e Leafa i le sui o le Samoa Observer, ua ia lagona o le tali ua tuu atu e le malo o se faamanuiaga mai le Atua mo ia, ma ua talia e le Atua lana tatalo mo sona saolotoga.

“Soo se taimi lava ou te faalogoina ai se sipuni o tatagi i luga o le fola o le sima, e toe faamanatu mai ai i lo’u mafaufau taimi o meaai i le sela pogisa sa loka ai a’u i le falepuipui, afai foi ou te faalogoina ni tagata o talanoa i le pogisa, ona ou iloa lea ua o atu leoleo e  asiasi atu i lo’u sela,” o le tala lea a Leafa i le sui o le Samoa Observer.

O le susuga Leafa lea ua 70 nei tausaga o lona soifua, na faasala i le oti faatasi ma le isi foi Minisita mai le vaega faaupufai a le HRPP ia Toi Aokuso ma lona atalii o Alatise Vitale, ona o le faalavelave lea na tagatavaleina ai le alii Minisita o Luagalau.

O le faaiuga e faasala i latou i le oti na suia e le Ao o le Malo ua tuumalo ia Malietoa Tanumafili II, ma faasala ai loa i latou uma i le olaga  atoa i le falepuipui, peitai na palola i tua Leafa ma Toi ina ua maea ona la tuliina tausaga tai 10 o le la faasalaga. E lei umi lava ona palola i tua i laua ae maliu loa Toi.

O Leafa ma Toi na faa falepuipui i Tafaigata ae o lona atalii o Alatise o loo loka i le falepuipui i Vaiaata i Savaii i le taimi nei, ma, e le o manino mai poo aofia ai lona igoa i le lisi o pagota e toa 35 ua faasaoloto.

I le saunoaga faapitoa a le Ao o le malo o Samoa ia Tui Atua Tupua Tamasese Efi i le famanatuina o le 50 tausaga o le tutoatasi a le atunuu i le vaiaso na tea nei, sa ia faalauiloa ai se tasi o gaioiga ua faia e le malo e faailoa ai lona loto faamagalo, o le faasaoloto lea o pagota e toa 35 mai le toese.

Saunoa Tui Atua e faapea, o le agaga moni o le faamanatuina o le Iupeli Auro a Samoa i lenei tausaga, ua vavala mai ai lagona moni o le salamo ma le loto faamagalo, e pei ona faamagalo ai e le malo nisi o pagota o loo tuli a latou faasalaga mai mea sese sa latou faia.

O le a mafai ona faalauiloa atu e le Samoa News i se taimi o i luma suafa o i latou o loo aofia i le lisi e toa 35 ua faasaoloto mai le toese i Tafaigata.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.