Login

Lua pine apamemea a le au siisii uamea mamafa

O sui na o Amerika Samoa na maua pine apa memea i le tauvaga siisii uamea mamafa faavaomalo a le Oceania ma le Commonwealth na talimalo ai Samoa i le vaiaso nei, o James Satila (agavale) ma Vainuupo David Jungblut. (Ata: Naenae Productions)

E lua pine apamemea na maua e le au siisii uamea mamafa a Amerika Samoa sa tauva i le tauvaga siisii uamea mamafa a le itulagi o le Oceania lea sa fai faatasi ma le tauvaga a atunuu o le taupulega a Peretania, le Commonwealth.

O pine a le teritori na maua lea e James Satila i le vaega o le 85kg ma Vainuupo David Jungblut i le vaega o le 105kg. E to’afitu le au siisii mai Amerika Samoa ma e lei manuia taumafaiga a le isi toalima. Peitai na faaalia le agaga fiafia o le alii faiaoga o Lopesi Faagu i le taumafaiga a alo ma fanau sa fai ma sui o Amerika Samoa i nei faagatama faavaomalo. Fai mai a ia, ua tele tulaga siitia o ausia e ia alo ma fanau i le faatinoina o le taaloga.

Na ia faaalia foi, o se au talavou le latou au ona na o tamaiti na fananau i Amerika Samoa o lo o faatagaina ma e tele le lumanai o nei alo ma fanau pe a faamaoni i a latou koleniga ma tausisi i le tausia pea o le soifua maloloina lelei. O le alii aupito i laititi lava o le au a Amerika Samoa o le taulealea o Anahken Faagu nao le 10 tausaga le matua.

Na taitaia le aumalaga a Amerika Samoa e le afioga Toetagata Albert Mailo lea sa avea ma se tasi o faamasino, ao isi sui o le pulega e aofia ai Manuele Sitagata ma Faafouina Popoalii.

O faagatama faavaomalo o lo o talimalo ai Samoa o lo o tausinio ai alii mai tamaitai e toa’a 320 mai atunuu e 31.

O ananafi na sii ai le tamaitai lauiloa i lea taaloga mai Samoa o Ele Opeloge ma sa ia manumalo i pine auro i le sii malele (snatch) ma le sii malolo (clean and jerk) ma ua mautinoa nei le tausinio o ia i taaloga o le Olemipeka i le faaiuga o le tausaga i Lonetona, Egelani.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.