Login

Tuumalo susuga Faifeau Toeaina Masalosalo Sopoaga

ausage@samoanews.com
Susuga i le Faifeau Toeaina Masalosalo Sopoaga [ata: SN]

O se tala faanoanoa ua ufitia ai le atunuu, tainane le galuega paia a le Atua, ina ua tuua le malo e le susuga i le alii Faifeau Toeaina ia Rev. Elder Masalosalo Sopoaga, ona o le valaau paia a le Atua, i le tuana’i ai o tausaga e 73 sa tautua ai mo lona aiga, nuu, atunuu aemaise le galuega paia a le Atua.

O Rev. Sopoaga na maliu i le maota gasegase o le LBJ i Fagaalu i le taeao o le aso Lulu na te’a nei, e pei ona faamaonia mai e lona alo tamaitai ia Menorah, a’o i ai i ona tafatafa lona faletua ia Simoe ma nai ona alo e toalua o Menorah ma Hesedh.

O ni lagona e faigata ona faamatala taimi o le mafutaga aemaise ai o le soifuaga auauna i le Atua ma le atunuu, ao taumafai lona aiga e faailoa sini tetele na mafai ona ausia e lenei auauna ao tautua ai i le galuega a le Atua.

Na amata mai le soifuaga aoaoina o Rev. Sopoaga i le aoga faa faifeau i lona nuu o Salelologa i Savai’i na soifua a’e ai, ona sosoo ai loa lea ma le aoga a Maluafou, ma aga’i atu ai le kolisi a Leulumoega Fou ma faaauau atu ai i le Iunivesite i Suva i Fiti.

Na maea lana aoga i Fiti ona agai atu loa lea i le aoga a St. John NZ, sosoo atu ai ma le Hebrew University i Ierusalema, o le Iunivesite a Chicago i Illinois ma agai atu ai i le Iunivesite a London i Peretania mo le faalauteleina o lona olaga aoaoina, ma ia maua mai ai faailoga tetele sa avea ai o ia o se tasi o sikola o le Tusi Paia.

“O aoga uma ia sa aoga ai le toeaina ma maua mai ai nisi o ana faailoga sa fesoasoani i le galuega faafaifeau na galue ai mo le tele o tausaga,” o le saunoaga lea a Menorah.

Ina ua taliu mai o ia i Samoa mai ana aoaoga i fafo, sa amata galue Rev. Sopoaga o se faiaoga i le Kolisi Faafaifeau i Malua Theological College, ma tofia ai o ia e avea ma pule aoga mo le tolu tausaga mai le 1976 e oo atu i le 1979.

“Sa galue muamua o ia i le ekalesia EFKS i Solosolo i Samoa, a’o le’i tofia na te vaaia le  ekalesia EFKAS i Pago Pago mai le 1981 seia oo atu i le 2010 na malolo ritaea ai,” o se faamatalaga lea a Menorah.

O le susuga Rev. Sopoaga na malolo litaea mai le galuega faa faifeau i le mae’a ai o le fonotele a le Ekalesia i le 2010, i le tuana’i ai lea o tausaga e 30 sa tautua ai i le ekalesia EFKAS i Pago Pago.

Ao galue o ia i le ekalesia i Pago Pago, sa avea o ia ma faiaoga i le Kolisi Faa Faifeau i Kanana Fou. Sa avea foi o ia ma taitaifono o le Komiti o le Palola mo le tele o tausaga i taimi o le nofoaiga a Kovana Lutali.

E tele uiga ma amioaga e faagalo gata ai e lona aiga le alii faifeau i aso o le latou mafutaga.

“O lenei tama, e faamuamua lava lana galuega faa faifeau nai lo se isi lava mea o lenei olaga, o se tama e onosa’i, e talitiga, e tiga lava ona tigaina i lona gasegase ae a fesili atu i ai poo a mai o ia, e tasi lava lana tali o loo manuia,” o nisi ia o uiga e manatua ai e Menorah lona tuaa.

“O le alii faifeau o se tagata e ese le loto mau i ona lagona, o se tagata e tautala soo, e loto fiafia, e faigofie foi lona olaga, e faamasani gofie i soo se tagata, na te le faailogaina foi se tagata e talanoa ma mafuta i ai, e agamalu ae sili ai i na uiga uma o ia o se tama e loto alofa ma tausaafia,” o nisi ia o uiga e manatua ai e le faletua ia Simoe le susuga ia Rev. Sopoaga i le la mafutaga.

O lo o i ai pea le tino maliu o le alii faifeau i le maota gasegase i Fagaalu e faatali ai se isi fuafuaga mo ona toe sauniga mai lona aiga.

O lo o soifua mai pea i le taimi nei lona faletua ia Simoe, o ona alo e toalua atoa ai ma ana fanau fai.

Ia faamaise le Agaga Paia o le Atua i le paia o aiga loto faavauvau.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.