Ads by Google Ads by Google

Tete’e se alii na te le’i fa’amalosia lona to’alua

O le alii lea o lo o loka e le malo i le falepuipui ona o tuuaiga i lona faamalosia o lona toalua la te faiaiga e aunoa ma le malie i ai o le fafine, atoa ai ma lona taumafai e ave faamalosi le fafine i totonu o le taavale, sa ia faailoa i luma o le Faamasinoga Maualuga i le vaiaso nei, e le moni tu’uaiga a le malo.

O lea ua toe tolopo ai le fofogaina o se maliliega sa sainia e lenei ali’i ma le malo, ae ua fautuaina e le faamasino ia loia ina ia toe talatalanoa i le ua molia, e uiga i lana tali ua tuuina atu, afai e tumau ai, o lona uiga o le a faatulaga loa le aso e faia ai lona faamasinoga autu.

Ua toe tolopo ai i le Aso Lua o le vaiaso fou lenei mataupu.

E talitonu le faamasinoga, e foliga mai e le o malamalama lelei le ua molia, i le moliaga lea na tali ioe i ai, o le isi lea mafuaaga ua toe tolopo ai e le faamasinoga lenei mataupu.

E tusa ai o faamaumauga a le faamasinoga, o le mataupu ua tuuaia ai le ua molia na afua mai i se vevesi na tulai mai i le la va ma lona toalua, ina ua fesiligia e le ua molia lona toalua i se la faanunumi ma se isi tagata i le nofoaga o lo o faigaluega ai le fafine.

Na avea le alu atu o le ua molia ma fesiligia lona toalua i le nofoaga e faigaluega ai ma itu na tuuina atu ai le fafine i lalo o le vaavaaiga a le malo, ma auina atu ai loa o ia e nonofo ma nisi o lona aiga, peitai na i’u lava ina oo i ai le ua molia i le fale sa nofo ai lona toalua, ma o iina lea o lo o tuuaia na alia’e mai ai le faalavelave ua molia ai nei lenei ali’i.

Na faailoa e le fafine i leoleo e faapea, na mafua ona ia le teena le gaioiga a lona toalua sa faia ia te ia, na musu ina ne’i ona faia se isi mea leaga ia te ia, aemaise ai o lea sa faailoa atu e lona aunty o lo o alu atu le ua molia ma se samala ma se naifi.

Ina ua maea ona faamalosi e le ua molia lona toalua i totonu o le potu, e pei ona tuuaia ai o ia e le malo, sa ia fai i le fafine la te talatalanoa e uiga i le la mafutaga.  Sa tagi le fafine ma faatoese ma fai ai e taofi lana mea o loo fai, lea foi na usitai i ai le ua molia ma ia fai loa i lona toalua la te o i le la fale la te talanoa ai e uiga i le la mafutaga.

A’o savavali atu le ua molia ma le fafine i luma o le faletupe o le ANZ i Fagatogo, sa taumafai le fafine e alu i le ofisa o leoleo, peitai na toso atu e le ua molia o ia ma taumafai e toso i totonu o  le taavale a se tasi o ana uo.

Fai mai le fafine, ao taumafai e e’e i luga mo se fesoasoani, na pupuni e le ua molia lona gutu i lona lima.

E $35,000 le tupe o lo o taofia ai le ua molia i le toese e faatali ai  le isi ana iloiloga lea ua faatulaga mo le vaiaso fou.