Login

Fia fa’atupe sau Poloketi mo Fanau i le Tu’uaga?

frostlehualani@yahoo.com

 O lo ua i ai le meaalofa sili ua saunia e le Matagaluega o Alamanuia Lautele a le tatou Malo, i lana Polokalama o le Matua Faitama o Tautua mo Fanau ua fa’aigoaina o le “I CARE” ua mafai ona tu’uina atu ai se fesoasoani tupe e faatino fa’atasi ai e i latou ma so’o se fa’alapotopotoga lava ua mae’a lesitalaina, ma ua ai fo’i lana “EIN” Number ma ua mae’a taua’aoina i ai e le Malo o Amerika Samoa le latou tusi pasi e le totogia ai se latou Lafoga fa’aletausaga.

O le isi lea mea e tatau ona agava’a ai lau fa’alapotopotoga, o le aofa’i o le fanau e i le va o le 7-13 tausaga e mafai ona e fa’apotopotoina mo lau poloketi i lenei tu’uaga o a’oga.

Ua fa’atulaga le foa’i tupe lea mai le Polokalama a le “I CARE” i le aofa’i o le fanau lea e mafai ona e tautuaina i aso atofa o le poloketi fa’apitoa e tatau ona atoa lelei le 30 aso, ae le tatau ona itiiti atu i le 3 aso o le vaiaso e tasi, ae ta’i 4 itula le umi o le vasega e tasi.

Ua fa’ailoa mai o le Fa’apotopotoga e mauaina le 150 tamaiti e fa’atasia i lana Poloketi mo le 30 aso o le tu’uaga lenei, ua atofaina ia te i latou le $7,500. E lua avanoa mo lea ituaiga o talosaga o lo’o ua i ai mo so’o se fa’alapotopotoga o mo’omia se fa’atupega.

O avanoa e lua mo le 125 tamaiti e auai i le poloketi mo le 30 aso o lenei tu’uaga ua fa’atulaga le tinoitupe e $7,000. O avanoa fo’i e lua e mafai ona talosaga mai ai ni fa’alapotopotoga e maua le 100 tamaiti mo le 30 aso e faia ai latou aoaoga fa’apitoa i lenei tu’uaga ua atofaina i ai le $6,500.

E lua fo’i avanoa mo ni talosaga a ni fa’alapotopotoga o maua le 75 tamaiti mo le latou poloketi i le 30 aso o le tu’uaga ma e maua le $6,000.

Ma tinoitupe e lua ta’i $5,500 mo ni fa’alapotopotoga e mafai ona latou tautuaina le ta’i 50 o tamaiti mo le 30 aso o lenei vaitu’uaga. O le aofa’i o nei avanoa e talosaga ai e 10, ma o se mea sili lea ona lelei mo so’o se fa’alapotopotoga o lo’o taumafai e tautuaina le fanau iti i vaitaimi o le tu’uaga nei tinoitupe ua atofaina mai e le “I Care”.

E tusa ai ma lisi o agava’a mo ituaiga o fanauiti e mafai ona aofia i lau poloketi fa’apitoa, ua mana’omia oe le fa’alapotopotoga ona fa’amaumau mai igoa o le fanau, latou tausaga ma aso fanau, fa’apea fo’i ma latou numera saogalemu, ma nu’u o lo’o alaala ai le fanau iti ua aofia i lau poloketi 2012.

O lo ua mana’omia lava ona aumaia e lau poloketi le fanau mai aiga o lo’o vaivai le tamaoaiga, ma e alagatatau ai ona e fa’amauina mai fo’i le aofa’i o le tupe maua a aiga o le fanau i le tausaga. E mafai ona maua lea tulaga, i se ulusiaki a le sui faigaluega o aiga ta’itasi o le fanauiti o auai i lau polokalama.

E le gata la ina aumaia le tinoitupe mai le “I Care” e fa’atautaia ai lau polokalama, ae ua ofoina mai fo’i mea’ai mama, vaiinu suamalie e alagatatau ma mea’ai paleni e i latou mo lau poloketi i aso e fa’atautaia ai.

Ua fa’amauina, o lenei polokalama o le lona tolu ai lea o tausaga o latou fa’atautaia, ma ua iloga le matagofie fo’i o poloketi fa’atautaia na latou pa’aga i tausaga ua tuana’i e lua. O lo’o ua fautuaina mai, ia taumafai so’o se fa’alapotopotoga lava e talia a latou talosaga mo nei tinoitupe e fa’atautaia ai, ina ia latou fiafia e fa’aulufale mai tamaiti o aiga o e o lo’o tautua i le militeri, aua o lo’o mo’omia e nei fanau le auaunaga lenei e mafuta i ai i latou a’o tatalia le toe taliu mai o latou tama po’o tina o lo’o tautua i le tafa o taua.

Ua fa’ailoa mai e i ai polokalama matagofie e mafai ona fa’atautaia i nei poloketi fa’atupe e le “I Care” ma e fa’afiafia ai lava le fanau iti e feso’ota’i ma isi a latou uo fou, po’o e fo’i ua loa o latou mafuta ma fa’amasani.

Ua fa’amamafa mai lava e le “I Care” o lau gaoioiga ma le fa’atinoina o lau Poloketi Fa’apitoa Tu’uaga o Aoga 2012, e le tatau ona fa’amoemoe tasi i le tinoitupe lea e taua’aoina mo lona fa’atupega, ae tatau fo’i ona e sauni oe le fa’alapotopotoga mo sau vaega fai i le galuea’ina ia manuia lau taumafaiga i lenei tausaga.

O lou lelei fo’i i lenei tausaga, e mafai ona toe fa’amanuiaina fo’i sau talosaga i nisi tausaga o lumana’i, ina ia so’o ai le fau ma le fau i lenei lava polokalama “I Care.”

Manatua o lau talosaga e ao ina faia a’o le taina le 12:00 i le aoauli o le aso Faraile nei Iuni 8, 2012, aua le fa’atali, ae saili sau fesoasoani mo lou fa’amoemoe.



Related



Comment Here