Talosaga loia Tone Pulou fa’a falepuipui o ia 8-10 tausaga

O le taeao ananafi, na folasia ai e le loia a Tone Pulou, i luma o le Fa’amasinoga Maualuga, se talosaga, ina ia fa’asala Pulou i le va o le 8 ma le 10 tausaga, i le to’ese i Tafuna.

O le vaiaso na te’a nei na fa’atulaga e lau ai le fa’asalaga a Pulou, ae peita’i na toe tolopo mai i le aso ananafi, lea na fa’afofoga ai le fa’amasinoga, i se molimau mai i le Sa’o o le aiga o le teineititi o lo o a’afia i lenei mataupu, ma o lea na toe tolopo mai ai le lauina o le fa’asalaga a Pulou, i le taeao nei.

O Pulou o lo o ta’usala i moliaga i lona faiaiga ma se teineititi talavou, ma i’u ai lava ina ma’itaga lenei tama’ita’i.  O fa’asalaga mo ia moliaga, e i le va o le 5 ma le 15 tausaga.

I le molimau a le Sa’o o le aiga o le teineititi, le afioga Muagututia Tupusemanuiaaeaualetupusemalaia Muaivasa Tauoa, na ia ta’ua ai e fa’apea, ua talia e lona aiga le ifoga sa faia e matua o Pulou, ma ua maea ona teuteu ma faamatafi le ao pogisa sa ufitia ai aiga e lua ona o lenei faalavelave.

Na fa’amanino e Muagututia, o le ifoga o se tasi lea o tu ma aga maualuga a Samoa e uia e se aiga pe afai ua i ai so latou sese. O le ifoga e pulolou ai tagata o le aiga ua sese i le ietoga i luma o le aiga sa faia faasaga i ai se sese ina ia magalo ai.

Fai mai le molimau, na faalua ona fono lona aiga e aofia ai ma matua o le teineititi na aafia, e uiga i le ifoga ma sa latou faaalia ai lo latou taliaina o le ifoga.

Na fesiligia e le loia a le malo, o Mitzie Folau ia Muagututia, pe na talia e le tamaitai na a’afia, le ifoga.  Na tali le molimau, “Na talia e a’u, o lo’u tuafafine, o matua o le teine, o le teine atoa ai ma le matou aiga potopoto.”

Na toe fesili Folau i le molimau pe faamata ua mafua ona ia taliaina le ifoga ina ia faaauau ai le nonofo filemu o aiga e lua i totonu o le nuu, na tali le molimau, o le isi mafuaaga na mafua ai ona talia le ifoga, e le utuva lava le o atu o matua o Pulou ma avatu meaai, lavalava ma tupe e fesoasoani ai i le tausiga o le pepe, ma o iina e iloa ai le alofa moni o matua o Pulou i le tama a le teineitiiti na aafia.

Na toe fesili Folau i le molimau pe na te iloa ua lava le ifoga e magalo ai le sala a Pulou, na tali le molimau, “o lea lava.”

Na taua e le alii loia a Pulou i lana faafinauga e faapea, o le mataupu ua ta’usalaina ai Pulou, e le tasi sona aafiaga, aua e le gata o lea ua aafia le olaga teinemuli o se teineititi 13 tausaga, ae ua i’u lava ina ma’itaga ai o ia ma ia fanauina ai se pepe. Sa ia taua foi le iloa lelei e Pulou o le matuia ma le leaga o le mea sa ia faia.

Fai mai Michael White, o Pulou o se alii faiaoga sa galue malosi i le aoaoina o fanau aoga, peitai sa sese le faaiuga na ia faia ma i’u ina ta’usala ai o ia i le tulafono.

Na faailoa foi e White i le faamasinoga le la talanoaga ma le tina o le teineititi na aafia i lona ofisa i le tolu vaiaso talu ai, lea sa ia talosaga ai ina ia faasala Pulou i le toese mo se taimi umi, ina ia aua ai nei toe mafai ona ia toe fesootai i lana tama na aafia, ona o lo o naunau o ia ma le  tama o le aiga e faaauau le aoga a lana tama ma faau’u o ia.

“Sa talosaga mai foi le tina ia te a’u ina ia aua nei toe maua se avanoa e fesootai ai Pulou i lana tama,” o le tala lea a White ma ia talosagaina ai loa le faamasinoga ina ia faasala Pulou i le  toese mo le 8 e oo atu i le 10 tausaga, o le taimi lea e tatau ona oo atu i ai ua i’u le aoga a le teineititi na aafia ma maua sona lumana’i lelei.

I le faafinauga a le malo, na talosaga ai le tamaitai loia ia Folau ina ia faasala Pulou i le faasalaga pito i maualuga o loo faatulai mai i le tulafono, (15 tausaga i le toese) ona o le matuia o le gaioiga sa ia faia.

Fai mai Folau, o Pulou o se faiaoga sa tuu atu i ai le avanoa na te aoaoina ai tamaiti aoga ma ua avea ai o ia o se matua i tamaiti aoga e aofia ai ma le teineititi e 13 tausaga na aafia, peitai sa ia faaaoga sese lea malosi ma ia liliu ai i se isi itu ma i’u ina ma’itaga ai lenei teineititi.

Na taua foi e Folau e faapea, o le ifoga lea na talia e le Sa’o o le aiga, na faia ina ia teuteu ai le nofo lelei o aiga e lua i totonu o le nuu, peitai e i ai lona talitonuga e lei malilie i ai matua ma le teineititi na aafia, ma o le taimi nei, o loo nonofo lava  pea  le aiga o le teineititi na aafia ma ona matua i le nuu ma tautua le aiga, e ui o loo aafia o latou lagona i le faalavelave na tulai mai.

Ua talosagaina foi e Folau i le faamasinoga ina ia poloaina le ua molia na te toe totogiina tupe sa faaalu e le malo e toe faafoi mai ai o ia i le teritori, i le maea ai lea o lona sola ese ina ua ia iloa ua suesue e le malo le mataupu.