Mae’a fa’amanatuina 50 tausaga Tutoatasi Samoa

Sa’asa’a le afioga i le kovana sili o Amerika Samoa, le matua ia Togiola Tulafono, i faafiafiaga a le itumalo Alataua i le faamanatuina o le 50 o le malo tutoatasi o Samoa i le malae o Tiafau i Mulinuu. [Ata; Naenae Productions]

“FA’AFETAI AMERIKA SAMOA MO LOU SAO I LO’U ASO FANAU”

I le tapunia aloaia ai o polokalame mo le fa’amanatuina o le fu’a a Samoa e pei ona fa’amanatuina ai le 50 tausaga o lana Iupeli Auro, na momoli fa’apitoa mai ai le fa’afetai ma le fa’amalo a le malo o Samoa i le afioga i le kovana sili ia Togiola T.A Tulafono ma le malo o Amerika Samoa, ona o le tatou sao e tusa ai o le lagolagoina o le latou sisiga fu’a.

O le afioga i le ali’i Minisita o le Matagaluega o Tina ma Tama’ita’i, o ia fo’i lea o le Ta’ita’ifono lagolago o le Komiti sa tapenaina polokalame o le fu’a, tofa Tolofuavalelei Leiataua Falemoe na fai ma sui o le malo o Samoa e fa’afetaia malo valaaulia mai atunuu o le Pasefika sa auai atu, aemaise ai i latou uma sa tuuina atu la latou sao mo lenei aso fa’apitoa.

Sa ia fa’afetaia fa’apitoa fo’i le afioga i le kovana sili ma aumalaga uma mai Amerika Samoa nei e tusa ai o la latou tapenaga i pese ma siva faaleaganu’u.

“Fa’afetai atu Tutuila ma Manu’a mo lou sao i lo’u aso fiafia i lenei tausaga, ua mataina au tapenaga i au siva ma lau pese faaleaganuu, ua leai se mea e paole ae ua manaia ma matagofie i la’u vaavaai atu, fa’afetai fai uso lelei, o lau pule lea...” o nisi ia o saunoaga a le tofa ia Tolofuavalelei e fai ai o ia ma sui o le Ao o le malo ia Tui Atua Tupua Tamasese Efi faapea ai le alii palemia ia Tuilaepa Lupesoliai Sailele Malielegaoi ma tagata uma o Samoa.

O loimata o le fiafia ma i’uleo o le faafetai na vaaia i tulimanu e fa o le Malae i Tiafau i le aso mulimuli o le fu’a a Samoa, mai lava i le amataga o faafiafiaga seia oo atu i le taimi na tuuina ifo ai i lalo le tagavai a le atunuu ina ua latalata i le itula e 8:00 i le po o le aso Gafua na te’a nei, ae o le aso Lua lea taimi Samoa.

O le pese faaleaganu’u mai le itumalo o Alataua i lalo o le taitaiga a le afioga i le Fofoga Fetalai ia Savali Talavou Ale, na tatalaina faafiafiaga faai’u o le aso e 5 i ai aso o le fu’a, sosoo ai loa ma le siva faaleaganuu lea na tapena i ai le afioga o Aasu, i lalo o le taitaiga a le afioga i le alii Senatoa ia Lualemana Faoa ma lona afioaga.

I le maea ai o le faafiafiaga a Alataua, na tatalo ai le fofoga o le itumalo i le alii Palemia o Samoa, afai e tuuina atu ni valaaulia mo le fu’a a Tutuila ma Manu’a i le tausaga fou, ia ave lana faamuamua i le afioaga o Vaimoso se’i malaga mai ai i Sasa’e nei, ona ua gapatia le afioga i le taliina o i latou.

O nisi o tulaga sa mataina i fa’afiafiaga a Amerika Samoa, o fa’aaloaloga sa faia e Alataua ma Aasu i le mae’a ai o a laua fa’afiafiaga, lea e aofia ai fa’aaloaloga masani fa’aleaganu’u i le Ao o le Malo o Samoa ia Tui Atua Tupua Tamasese Efi, o le Palemia ia Tuilaepa Sailele Malielegaoi, atoa ai ma le Kovana Sili ia Togiola Tulafono, atoa ai ma le Peresetene o le Ekalesia Metotisi i Samoa lea sa avea ma taitai o le sauniga i le aso, ma e silia i le tai $10,000 na faaalu e Alataua ma Aasu mo teutusi i le taimi o a laua fa’aaloaloga.

E ta’i $40,000 na fai meaalofa mai ai le malo o Samoa i au faafiafia a Aasu ma Alataua, ae $20,000 mo le au siva mai le afioaga o Vailoa-tai, lea na taitaia e le afioga ia Satele Galu Satele, ma o le afiafi ananafi na taunu’u mai ai le ulua’i malaga a le Lady Naomi mai Apia mo lenei vaiaso mo le amata toe momoliina mai lea o au malaga a le teritori sa autova’a atu i le fu’a.

O se tasi o vaega na maofa ai le to’atele i le taimi na tufatufa ai faailoga mo tauvaga uma sa fa’atautaia, o faailoga tupe sa tapena e le malo mo tuuga ma ta’amilosaga mo le fu’a, ona o le tetele o le aofai o faailoga tupe sa ofoina atu i soo se tauvaga e aofia ai tuuga paopao, tuuga va’a alo atoa ai ma tuuga Tulula, e pei ona i ai le $15,000 mo le tulaga muamua.

O le maea ai o le saunoaga faafetai a le alii Minisita e fai ai o ia ma sui o le malo, na lagiina ai loa e le faili pu a leoleo sa latou viiga a’o tu’uina ifo i lalo le tagai o le malo o Samoa e malu o le malo, a’o molimauina fo’i e ta’ita’i o malo e lua fa’apea ai sui o malo valaaulia.

O le aso ananafi na amata toe fo’i atu ai i o latou atunu’u ta’ita’i o atumotu o le Pasefika sa valaaulia i le aso fa’amanatuina o Samoa, e aofia ai fo’i ma au malaga uma a lo tatou atunu’u.