Login

FALEPUIPUI TA’ITA’I AU TALEPE FALE MO LE 28 MASINA

ausage@samoanews.com

O le ula lea na autu i ai le vaega talepe fale e to’atolu ia na o latou osofaia ni faleoloa i le masina o Ianuari 2012 i Leone, ua faasala e le faamasinoga maualuga e nofosala i le toese mo le 28 masina, ina ua ia ioeina moliaga o le talepe fale i le tulaga muamua ma le lua, atoa ai ma le gaoi i lalo o se maliliega sa ia sainia ma le malo ma talia e le faamasinoga maualuga.

E lua osofaiga sa tuuaia ai e le malo le alii o Ryan Pite, o le osofaiga muamau lea na tulai mai i le po o le aso 8 Ianuari i Leone, ina ua la osofaia ma Chris Aumua le faleoloa o le Captain Mart, ma le osofaiga lona lua na tupu i le po na sosoo ai, lea na o la talepe ma gaoi ai ma Siaosi Va’a Jr ni faleoloa se tolu i le po e tasi.

Fai mai le faamasinoga, i le osofaiga muamua sa taitaia e Pite, na amata mai ina ua alu e faatau mai se pusa pia peitai sa fai i ai le faatauoloa e faaali muamua atu lana ID ona faatoa mafai lea ona faataga o ia e faatau le pusa pia, peitai na tali le ua molia i le faatauoloa, o lona ID o loo i totonu o le taga o lona ofu.

Na te’i le faatauoloa ina ua alu i le atoa Pite i fafo ma le faleoloa ma ave le katuni pia e le’i totogiina, atoa ai ma lona tuleiina lea o le faatau oloa ma manu’a ai lona vae. Ina ua fesiligia e le alii faamasino Pite, sa ia faamaonia ai, o le pusa pia o le Steinlarger na alu ma ia e le’i totogiina.

O le po lava foi lea sa la osofaia ai loa ma Chri Aumua le faleoloa lava lea ina ua la toe manaomia  nisi pia se tele, ona talepe lea e Pite le faleoloa ma alu i totonu ma gaoi mai ni oloa e pei o chips, pia ma sikaleti, ae tu tu Aumua i fafo e vaai se tagata e alu atu.

O le osofaiga lona lua na aafia ai Pite na tulai mai i le po na sosoo ai, ina ua la osofaia ma Siaosi Vaa Jr ni faleoloa se tolu i totonu lava o Leone, ma la gaoi mai ai oloa i se auala faasolitulafono.

O le faleoloa o le Super Star na muamua osofai e Pite ma Vaa i le po lea, ina ua taumafai Pite e talepe le faitotoa pito i tua o le faleoloa, peitai e lei mafai ona la ulufale ona sa la vaaia le pule o le faleoloa o loo tu mai totonu ma vaavaai atu i la gaioiga o loo fai.

Ina ua le manuia a laua taumafaiga i le faleoloa muamua, na la faasolo atu ai loa i le faleoloa o le Lemau’s Store, ona taumafai lea o Pite e tolotolo i totonu ma le faamoemoe e gaoi mai ai ni oloa i totonu, ae te’i ina ua ia iloa atu le faatauoloa o loo tu mai ma le samala e faatali mai ai lona taunuu atu, o lea na toe solomuli mai ai loa i tua ma toe foi.

Fai mai Pite, ina ua le taunuu lana osofaiga lea, sa ia aapa atu ai loa i le masini pu’eata a le faleoloa o loo pipi’i mai i le isi itu ua fafa’i i lalo ona la o lea ma ave ma Vaa.

O le faleoloa lona tolu na osofaia e Pite ma Vaa o le Leone Store, ina ua la faaaoga ni maa e tata’e ai tioata ma mafai ai loa ona la aapa atu i totonu ma gaoi mai lole ma pulukamu lea e silia i le $100 le tau aofai.

Fai mai Pite, o le taimi atoa lea na loka ai o ia i le falepuipui, ua ia aoaoina mai ai se lesona e aoga mo ia i le lumana’i. Na faatoese Pite i le faamasinoga e tusa ai o le solitulafono sa ia faia, atoa ai ma lana talosaga ina ia tuu atu se isi avanoa se tasi mo ia. Sa ia faatoese foi i pule o faleoloa uma na aafia ona o lana solitulafono.

Na taua e le loia a Pite o Mike White, e manaomia e lenei alii talavou le sui o le auala e ui ai, aua o le falepuipui lava le taunuuga o gaioiga ia o loo ia faia. Na talosaga lana loia i le faamasinoga ina ia faanofovaavaaia le ua molia, ina ia maua ai se isi avanoa e toe faaleleia ai lona olaga.

Na taua foi e le uncle a Pite e faapea, o lenei alii o se tagata e agamalu ma le gaoia, ae ina ua ia tagofia le ava malosi, o iina na amata sese mai ai ana faaiuga fai aemaise ai o le malosi o faaosoosoga mai ana uo.

Fai mai le loia a le malo o Cabel Poag, e fai lava si matuia o le gaioiga na faia e le ua molia, ina ua musu le faatauoloa e faatau atu ia te ia le pusa pia, ae na avea ma itu na alu ai i le atoa ma gaoi le pusa pia e lei totogiiina.

“Ina ua toe manaomia e ia nisi pia se tele, sa ia alu ai ma talepe le isi faleoloa ae gaoi mai pia ma isi oloa, ina ua manao foi i lole ma pulukamu, sa ia faaaoga le maa e tata’e ai le tioata o le faleoloa ae gaoi oloa sa mana’o i ai,” o le finau atu lea a le malo.

Na fautuaina e le alii faamasino lagolago ia Mamea Sala Jr le ua molia ina ia faaaoga fautuaga o loo avatu e le faamasinoga, o lona aiga ma loia, ma ia taumamao ese mai le solitulafono.

“E 49 tausaga sa tatau ona e falepuipui ai, pe afai e fuafua atu i moliaga na tuuaia ai oe e le malo, ae ua manatu le faamasinoga e tuu atu se isi avanoa ia te ia ina ia toe fuata’i ai se isi ou taeao fou ma avea ai oe o se tagatanuu lelei mo le atunuu ma le aiga,” o le saunoaga lea a Mamea.

Na fautuaina foi e le alii  faamasino le ua molia ina ia faalogo lelei i ona matua ma usitai i ai, aua poo fea lava e alu i ai le tagata, o lona aiga lava e tua i ai.

E 7 tausaga na manatu le faamasinoga e faasala ai Pite i le toese, peitai ua faamalumalu lona tuliina o lea faasalaga, ae ua faanofovaavaaia o ia mo le 7 tausaga i  lalo o poloaiga a le faamasinoga, ma o se tasi o ia poloaiga e aofia ai lona tuliina o le 28 masina i le toese.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.