Login

35 PAGOTA FAI MAI SAMOA O LE A TATALA I TUA

ausage@samoanews.com

O se tasi o faailoga o le loto faamagalo e pei ona tautalagia e le Ao Mamalu o le malo Samoa i lana lauga, i le faamanatuina o le atoaga o le 50 tausaga o lona malo tuto’atasi, e aofia ai le tatalaina lea i tua o pagota e toa 35 mai le falepuipui i Tafaigata.

E lei faamanino auiliili mai e le afioga i le Tama Aiga ia Tui Atua Tupua Tamasese Efi poo ai igoa o pagota nei, o a solitulafono ua mafua ai ona faafalepuipui i latou ae pe ta’i fia fo’i tausaga ma masina o loo faasala ai i latou i le toese.

E lei manuia taumafaiga a le Samoa News e saili mai se faapupulaga auiliili o lenei mataupu mai le Komesina o Leoleo a Samoa i le aso ananafi e uiga i lenei mataupu, pau le manatu na faaalia e se tasi o leoleo sinia e faapea, e leai se pagota e nofonofo magalo i tua mai le toese, sei vagana ua uma ona tuli lona faasalaga, poo i latou foi e agavaa i lalo o le palola.

“Afai e magalo se pagota mai le toese ae lei maea ona tuli lona faasalaga, o lona uiga o le pagota lea ua agavaa o ia i le palola, ma ua tuu atu i ai poloaiga mai le Komiti o le Palola e usitai i ai mo le umi o loo totoe o lona faasalaga,” o le saunoaga lea a se tasi o leoleo sinia e lei finagalo e faailoa lona suafa, ona e le o i ai se faatanaga ia te ia e talanoa mai ai i le vaega faasalalau e uiga i mataupu faapenei.

Sa ia taua foi e faapea, faatoa fono lava le komiti o le palola i le faaiuga o le tausaga, e iloilo ai talosaga mai pagota ua agavaa ma talafeagai i lenei faamanuiaga.”

“Ae afai la o se saunoaga lena a le Ao o le malo, ou te le’i faalogo la a’u i lana lauga ou te le iloa foi poo fea e oso mai ai ana pagota e 35 ia o le a tatala mai i tua, tailo i ai po agai lana saunoaga i ni faamaumauga a le matagaluega o leoleo i pagota  ua magalo i lenei tausaga ma ua maea foi ona tuli a  latou faasalaga.”

Ina ua fesiligia le alii leoleo sinia pe na te silafia pe toafia ni pagota na magalo mai i le toese i Tafaiga i uluai masina e 6 o lenei tausaga, na tali le alii leoleo, “ou te le iloa le mea lena, ou te le iloaina foi ni pagota magalo, afai ete fia maua atili na faamaumauga, vili mai i le aso Gafua i le komesina o leoleo ete maua atu ai se tala atoa o lena mataupu,” o le saunoaga mulimuli lea a le alii leoleo sinia ona ia tuu lea o le telefoni i lalo.

Mai le silia i le toa 194,000 le aofai o tagatanuu o Samoa i le taimi nei, e na o le tasi lava le falepuipui o loo tuli ai faasalaga a i latou ua faamaonia a latou solitulafono, o le nofoaga lea i Tafaigata.

O le feau na momoli e le Ao o le Malo ao faafofoga malo valaaulia ma le mamalu o le atunuu, na faaautu i upu o le loto faamagalo ma  le alofa.

E tele ni faataitaiga lelei o le loto faamagalo na faaiiloa e Tui Atua i lana lauga e faailoa ai le autu o lana lauga, ma o nisi o ia faataitaiga e aofia ai mea na tutupu i le tele o tausaga ua mavae, e pei o le alaga a Tupua Tamasese Meaole ia Samoa ina ia fifilemu, ma ia aoga lona toto mo Samoa, ia maua foi e ona tagata le loto faamagalo.

O le sisiga fu’a i le tausaga e 2002 na malaga faapitoa mai ai le palemia a Niu Sila i lena vaitaimi o Helen Clerk e momoli mai le faamaualaloga a lona  atunuu ma  ona tagata ia Samoa, e tusa ai o ni fatia ua te’a ma vevesi na tulai mai ai.

O le Tia o loo lagomau ai Tupua Tamasese Meaola i Lepea na agai atu i ai le tamaitai palemia mo le momoliina atu o se teu fugalaau, ao siomia o ia e le mau a le afioaga o Vaimoso atoa ai ma le lalolagi o le atunuu ma ona taitai sa latou molimauina lea sauniga taua.

E tasi lava le upu na faaaoga e le tamaitai palemia e faaoo mai ai le faatoesega a le malo o Niu Sila, o le “Im sorry,” ma o se upu na gugulu ai le toatele faapea ai nisi o tusitusiga sa lomia i Samoa i lea vaitaimi, pe faamata e lava le “I’m sorry” na malaga mai ma le  tamaitai palemia e magalo ai le mea sese sa latou faia, peitai na saunoa Tui Atua i lana lauga, “e taua le loto faamagalo, o iina e iloa ai o Samoa o le aiga ma le uso ae le o se malo.”



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.