Login

MANA’O TOGIOLA E TALANOA LE ATUNU'U

ausage@samoanews.com

Ua talia e le alii kovana se fautuaga a le alii Faipule o le Konekeresi, ina ia talo se talanoaga a le atunuu e talanoaina ai le mataupu e uiga i le lumanai o Tutuila ma Manu’a, i upu fai o malo ma le malo tele o Amerika.

O lea fonotaga o le a sasa’a ai le tofa ma iloilo ai se faautaga a tupu ma faauluuluga o le atunuu, poo fea o loo taoto ai o latou finagalo i se ituaiga faigamalo e talafeagai ma fetaui mo Tutuila ma Manu’a ma lona lumana’i.

Saunoa le matua ia Togiola Tulafono i luga o lana polokalame i le faaiuga o le vaiaso na tea nei e faapea, o loo i ai le fuafuaga o le a talo se feiloaiga tu’u faatasi a le atunuu pe a toe tauaofia le tauaofiaga lona fa o le Nofoaiga lona 32 a le Fono Faitulafono ia Iulai, ma vaavaai ai loa i se auala e mafai ai ona feiloai faatasi le atunuu mo le talanoaina o lenei mataupu.

Na teena e Togiola faamatalaga e faapea, o le palota a le atunuu sa tuuina mai i le taimi o le Faavae, o le faaiuga lava foi lena i le fesili sa faatula’i, pe o le a se ituaiga faigamalo e finagalo i ai Tutuila ma Manu’a mo i latou.

“E sese le manatu lena, e le’i aofia ai lava le mataupu i le faigamalo i le taimi o le Faavae,  o le mafuaaga lena ua ou manatu ai, e lelei pe a amata se talanoaga a le atunuu, maua le avanoa e faasoa mai ai finagalo o tupu ma tamalii, faapea tupulaga i se ituaiga faigamalo e talafeagai mo tatou i le lumanai,” o le saunoaga lea a Togiola.

Saunoa Togiola e faapea, o se tasi o mea ua faateia ai tele o ia i lenei vaitau, o nisi o tagata matutua o loo latou teena pea lenei mataupu, ona o le manatu fai mai afai ae tupu le mea lea, o le a le toe maua faamanuiaga o loo latou maua mai le malo tele e pei o le Saogalemu ma siaki o le Medicare.

O nei talaiga sese o loo faasalalau e nisi o i latou o loo faia molimau pepelo i le atunuu e pei ona saunoa Togiola, ma ua avea ai ma auala ua taitai sese atu finagalo o tagata i lenei mataupu.

Na faamaonia e Togiola e faapea, o le toatele o tagata sa tautua i vaega au a le malo ua malolo litaea, faapea ai ma nisi sa galulue i galuega lautele a le malo tele ua malolo litaea foi, o loo nonofo ma aumau nisi o i latou i totonu o Samoa, peitai e le o avea lo latou aumau ma nonofo i Samoa, le malo Tutoatasi ma itu ua taofia ai faamanuiaga ma penefiti o loo latou maua mai i le malo tele, ae o loo faaauau pea ona o latou taliaina nei faamanuiaga.

 O se tasi foi o manatu ua tele ina faafefe ai tagata o le atunuu, fai mai afai ae tutoatasi Amerika Samoa o lona uiga o le a motusia faamanuiaga tau tupe o loo maua mai i le malo tele.

Saunoa Togiola, e le moni ia faamatalaga, ona o loo faaauau pea ona tuu atu e le malo tele lana fesoasoani tau tupe i nisi o teritori o loo pulea lava e i latou a latou faigamalo e pei o Palau, CNMI, Guam ma le Marshall Island, e tutusa lava foi ma faamanuiaga tau tupe o loo sasa’a mai mo Amerika Samoa, e ui e eseese le tulaga o loo i ai tatou ma isi teritori a le malo tele.

Na taua e le alii kovana e faapea, e le mafai ona manuia taumafaiga o loo agai atu i ai le atunuu pe afai e faavae manatu ma lagona o tagata i talaiga sese ma upu faatupu o loo faasoa  atu e nisi o tagata, ae ua tatau ona tulai mai lenei tupulaga e fai sona sao mo isi tupulaga o loo mulimuli mai.

“O lea ua 110 tausaga o tatou ae ae i manuia sa faatulai mai e tupulaga ua mavae atu, ae o le fesili, ua i ai ea se mea lelei ua faia e le tatou tupulaga mo isi tupulaga o loo mulimuli mai,?” o le saunoaga lea a le alii kovana.

“O le tali, e leai ma se tatou mea o faia o tupulaga o loo mulimuli mai, o lona uiga, ua tatau nei ona tulai ma fai so tatou sao mo tatou fanau o loo agai mai, aua foi tatou te loto fua ia Samoa pe a latou faailoa mai manuia ua latou maua ona o le tulaga ua latou i ai, ae saili so tatou ai mo le lumanai,” o le saunoaga faaiu lea a le alii kovana.

I lana saunoaga i le faamanatuina o le aso tuugamau mo fitafita na maliliu i le taua, atoa ai ma tuaa ua afu la latou tautua, na faamamafaina ai foi e le alii kovana le tatau lea ona fesili le augatupulaga lenei, pe o le a sa latou mea ua fai mo le isi augatupulaga o loo mulimuli mai.

Saunoa Togiola, o le tupulaga alofa ma lelei latou te faatula’i ni mea lelei ma aoga mo tupulaga o loo mulimuli mai.

O le mataupu e uiga i se faigamalo talafeagai mo Amerika Samoa, e le fou i le faafofoga a le atunuu, ona ua tele i ai manatu ma ua oo lava foi ina siisii ai le tai i nisi o saunoaga mai tamalii ma taitai o le atunuu, ona o lenei lava mataupu, peitai na saunoa Togiola, e le mafai ona silafia e Tutuila ma Manu’a le taua o nei mataupu sei vagana ua nonofo i lalo ma talanoa.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.