Login

SAILI SE FAIAOGA AU TA’ITO’A 7 ATUNU’U

ausage@samoanews.com

O le aoauli ananafi na anata faia ai le faatalatalanoaina o le avanoa Faiaoga mo le au ta’ito’a 7 a le atunuu, le Talavalu, mo se tasi e avea ma faiaoga o le au fili a le atunuu i le taamilosaga ta’ito’a 7 a le Pasefika, lea ua faamoemoe e faia i Ausetalia i le masina o Aokuso o le tausaga nei.

I se faatalatalanoaga ma le Failautusi a le Iuni Lakapi a le atunuu ia Falefata Moli Lemana sa ia taua ai e faapea, e 5 tusi talosaga ua taunuu atu i le laulauafono a le Iuni, ma o le aoauli ananafi na amata faia ai le faatalatalanoaina o nei avanoa.

O nisi o manatu o loo tuu fesili ai le atunuu, pe o faasalalau i fafo le avanoa mo se faiaoga a le au taitoa 7.

“E le o faasalalauina i fafo le sailiina o se faiaoga mo le au ta’ito’a 7 a le atunuu, ae o loo saili mai lava i faiaoga o kalapu eseese i le atunuu se tasi e avea ma faiaoga atoa ai ma se faiaaoga lagolago,” o le saunoaga lea a Falefata.

O le susuga Tommy Elisara, lea o loo avea nei ma faiaoga o le kalapu lakapi a Avele Old boys sa avea ma faiaoga a le Talavalu ina ua masi’i atu la tatou au i le taamilosaga taitoa 7 a le Pasefika lea na faia i Apia ia Oketopa 2011.

O le ulua’i taamilosaga taitoa 7 lea a le Pasefika (Oceania Sevens Champion) ua masi’i atu i ai se au fili a Amerika Samoa, ma tatou mauaina ai le tulaga #6 mai au e 10 sa tausinio i lea taamilosaga.

Ua i ai le faamoemoe o le Iuni Lakapi e tatau ona oo atu i le aso Gafua o le vaiaso fou ua maea le sailiga o loo faia ae faalauiloa ai loa se tasi o le a ia mauaina lenei tulaga taua.

O le galuega o le faiaoga mo le au taitoa 7 e le o se galuega faigofie e pei ona saunoa le afioga Lilomaiava Taufusi Salesa, o se tasi sa avea ma sui o le au lakapi a le Manu Samoa mo le tele o tausaga, ae o ia foi le ulua’i faiaoga a le au taitoa 7 a Samoa na aumaia le Ipu autu o le taamilosaga taitoa 7 a Hong Kong i Samoa, ina ua manumalo le au sa faiaoga ai i le taamilosaga o le 1993.

I le tele ai o le tomai ma le silafia ua maua e Lilomaiava i lenei taaloga ma le galuega faa faiaoga, sa ia taua ai i le Samoa News e faapea, o le avea ma faiaoga e le o se galuega faigofie, ae o se galuega e manaomia le tuu atoatoa i ai o le mafaufau o se tasi ua filifilia ina ia manuia ma i’u lelei taumafaiga a lana au.

“E faamoemoe le lelei o le au i le faiaoga, o ia na te tuuina atu auala ma metotia eseese e faalagolago i ai gaioiga a le au, o ia foi na te faia fesuiaiga i tama taaalo i le taimi o loo vevesi ai le taaloga, ina ia iloa poo ai ua tatau ona alu i totonu a’o ai ua tatau ona malolo mai tua,” o le saunoaga lea a Lilomaiava.

O Lilomaiava, o Stan Toomalatai atoa ai ma Papalii Avia Tulou, o nisi ia o sui o le Iuni Lakapi a Samoa (SRU) na malaga faapitoa mai mo le faatinoina o aoaoga mo faiaoga ma laufali lea sa faataunuu i le vaiaso na tea nei, atoa ai ma le tuuina atu o ni a latou fautuaga i le tau sailiina o se au fili taitoa 7 a le atunuu.

Saunoa Lilomaiava e faapea, o le toatele lava o alii faiaoga ia o loo taitaia maia kalapu eseese i le atunuu, o nisi sa avea ma tagata taaalo muamua, ua malamalama i tulafono o le taaloga, ua iloa foi metotia ma auala e faatino ai le taaloga.

E i ai le talitonuga o Lilomaiava, o le tausaga lenei o le a sii ai le tulaga o le au a Amerika Samoa pe a fuafua atu i le maualuga lea ua i ai le faatinoina o le taaloga e tama taaalo.

“Feololo lava ni nai vaega e manaomia le fesoasoani i ai o le faiaoga i tama taaalo, e oo foi i au kalapu, e tatau ona matua tino u faiaoga e faaleleia a latou tama taaalo ma au taitasi, ina ia faafaigofie ai foi le galuega a le faiaoga mo le au fili pe afai e maea ona sailia ma faamautu mai e le Iuni,” o le saunoaga lea a Lilomaiava.

O nisi o fautuaga laiti na mafai ona momoli mai e Lilomaiava i le maea ai o uluai taaloga e saili ai se au i le amataga o le vaiaso nei, sa ia faamanino ai i tama taalo le tatau lea ona faaaoga le mafaufau i taimi uma o le taaloga, ma ia to’a foi le mafaufau o le tama taalo e faaaoga ai le polo.

O loo i ai le fuafuaga a le Iuni e tatau ona oo atu i le vaiaso fou ua mautu le filifiliga o le au fili a le atunuu, ma amata tuu faatasi loa mo ana tapenaga aua le faamoemoe e pei ona sauniuni atu i ai.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.