Login

Fagogo: Salu Vale le Lau Ta’amu a A’opo

[Malo le faitau, malo foi le onosai, ae alo mai loa o le toe sosooina lenei o la tatou tala faasolo, lea na gata mai i le vaiaso na tea nei i le taimi lea ua vaaia ai e Lumepa lona to’alua ua savavali  ane ma leoleo.]

E le’i tali Lumepa i le fesili a Iose sei vagana ai le lue atu i ai o lona ulu e faailoa atu ai o loo aumai lona ofu lelei, ae o ona loimata i le taimi lea ua pei o le timu to le maligi ifo ina ua ia vaaia si ona toalua o loo loka ona lima, ae o loo taitai atu e leoleo e toalua, pei o se tagata ua ia faia se mea matuia. O aiga uma o pagota ia ua faatulaga a latou faamasinoga i le aso lea, ua na o le laulaututu matamata a’o taitai atu i latou e leoleo i le potu faamasino maualuga lea ua faatulaga e valaauina ai a latou mataupu. Atonu o ni faiga masani lava ia e leoleo ma aiga o pagota, o le taimi lava e taunuu ai pagota i tua o le potu faamasino, ona agai atu loa lea o latou aiga e avatu a latou laei mama e faamaulu aua le taimi e tulai ai i luma o le alii faamasinoga.

“O a mai oe, o le a sau mea ga ai agapo?...” o le tau fai saputu atu lea o fesili a le fafine o Lumepa isi ona toalua ao ia tatala le ato o loo i ai le ofutino o Iose. “Kago mai i lou ofu lea ma avaku lau pulu lea e lamu e faamagogi ai ou guku ma e saugi loa i lou faamasigoga, lea o le a ou kakalo aku mo oe.” Na ona uma lava o tala a le fafine ona toe savali ese mai loa lea ma agai atu i totonu o le potu faamasino e faatali ai le taimi e amata ai le faamasinoga a lona toalua, ma o se taimi muamua lea ua ia ulufale ai i lenei potu. “Tula’i le fa’amasinoga,” o le alaga lea a le alii leoleo o loo tu i le faitoto’a e ulufale mai ai le faamasino sili, ma vaaia ai le tau fai tula’i uma o tagata e oo lava foi i pagota ia ua nonofo mai i totonu o le pa e faapitoa mo i latou o le a valaau a latou mataupu.

E na o Iose lava le pagota o lea faatoa valaau lana mataupu mo le taimi muamua, ae o isi pagota uma, o le aso lea e lau ai a latou faasalaga mai solitulafono ua maea ona latou tali ioe i ai. “Faamasinoga i le va o le malo ma Iose Filipo,” o le alaga lea a le alii Lesitala lea e fofogaina mataupu a le faamasinoga, ma vaaia ai le tu i luga o Iose ma savali atu o le pa, ona talanoa mai lea o le alii faamasino atoa ai ma le lauina o moliaga faasaga ia te ia, lea e aofia ai le fasioti tagata pa’ivalea ma le sola ese ma leoleo. O le maea ai o le uluai iloiloga a Iose na faia ai loa le poloaiga a le faamasinoga e tatala ai o ia i tua mai le falepuipui e faatali ai le isi ana  iloiloga ma le tuutuuga, e tatau ona oo atu i le aso lea ua maua sana loia atoa ai ma ni ana molimau e fesoasoani ia te ia. “Malo le ogosa’i ia ke oe le uso, o le mea sili o lea ua maea ma le maguia lau ulua’i iloiloga, ae kakou fekaui i uta pe a oo gagei, ae aua eke popole o a’u le isi molimau mo oe i lou faamasigoga,” o upu ia a le tamaititi o Fatu ao ia faatalofa atu ia Iose i fafo o le potu faamasinoga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.