Login

TOGIOLA: UA LE FALE UI AE UA FALE TAU FA’AFEFE

ausage@samoanews.com

Na taua e le alii kovana sili ia Togiola Tulafono e faapea, o se tasi o fale aiga sa alu i ai e faaaoga le latou fale ui, na matua faateia ai o ia i le tulaga faaletonu, ma ua le foliga mai ai o se fale ui ae ua o se fale tau faafefe.

Ui o lea, e le’i taumafai le alii kovana sili e alo i le ata o le laau pe taumafai foi e tu mo le malo, ina ua faaalia e nisi o le atunuu i luga o lana polokalame le tele o faasea, ona e le o lelei le faatinoina o tautua a nisi o ofisa a le malo, ae sa ia saunoa e faapea, “E tatau ona avea muamua le malo ma faataitaiga lelei mo le atunuu ma pisinisi.”

O ia faasea e afua mai i nisi o pisinisi tumaoti faapea ai nisi o Ofisa o le malo o loo asia e le atunuu ma maitauina ai tulaga faaletonu i nofoaga e uia e tagata, poo fale le taua aemaise ai foi totonu o Ofisa.

E le o se taimi muamua lea ua faaleo ai e nisi o le atunuu la latou faasea lea i luma o le alii kovana.

Fai mai le tomumu a le isi tina na valaau atu i le polokalame, o lana maitau lava lea i nisi o ofisa o le malo e masani ona asiasi i ai faapea ai nisi o pisinisi ma faleaiga, e maitauina ai  lava tulaga faaletonu i mea e uiga e tagata, poo nofoaga foi e agai i ai le atunuu.

“O totonu o nisi o faleoloa e maitauina le tulaga faaletonu ma e atagia mai ai iina e le o faatinoina galuega a le Ofisa o le malo o loo gafa ma lea faiga alofilima,” o le tomumu lea a le tina lea i luga o le polokalame.

O le lagona lava foi lea na taua e le isi tootoo i le isi polokalame na muamua atu a le alii kovana i le mataupu lava lenei, lea foi sa ia talosagaina ai le alii kovana ina ia toe silasila toto’a i  lenei faafitauli.

“O le isi faaletonu numera tasi o le malo i le taimi nei o fale uila,” o le saunoaga lea a le alii kovana e tali fuaitau atu ai  i le finagalo o le tootoo, “E tausolomua lava  foi i isi ofisa o le malo ona tulai mai ai faaletonu lea, atonu o le mafuaaga foi lena e faaletonu atu ai ma nisi o pisinisi ona o loo tau solomua ona latou vaavaai mai i faaletonu o le malo.”

E lei alo le alii kovana ae sa ia taua e faapea, o le isi lea mafuaaga autu na ia tuuina atu ai se tupe mai le vaega tupe a le ARRA e toe faaleleia ai nisi o fale i le maota o le malo o Utulei, le EOB, ona o le tele o le faaletonu sa ia maitauina mai ai.

“E i ai foi fale faleaiga sa ou alu i ai, sa lagona ai lava le fefe e alu i fale e ui ai le atunuu ona o le tulaga faaletonu, ma ua foliga mai ai e le o se fale ui ae o  se fale fefe,” o le saunoaga  lea a Togiola.

E talitonu le alii kovana, e le o pisinisi uma lea o loo aafia i le faafitauli lea peitai e taua le mataupu e toe avatu ai fautuaga i pisinisi faapea ai ma ofisa o le malo.

Na taua foi e le alii kovana sana fuafuaga ina ia toe tuuina atu sana fautuaga i le Matagaluega o le Soifua Maloloina lea e asia faleoloa, ina ia aua nei  gata a latou asiasiga i luga o fata o loo teu ai loa, a ia asiasi uma atu ai ma le faleoloa atoa i luma ma tua ina ia mautinoa, o loo soifua maloloina vaega e ui i ai le atunuu.

“A manuia ma soifua maloloina nofoaga e agai i ai le atunuu e pei o pisinisi ma ofisa o le malo,o le a faapena foi ona soifua maloloina le atunuu ma ola fiafia ona tagata,” o le saunoaga lea a Togiola.           



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.