Login

MOTUGAAFA O FA’AU’UGA

frostlehualani@yahoo.com

E tulaga ese tapenaga mo le faataliina o sui o le malo i  le faauuga a le vasega 12 a le aoga maualuga a Manu’a. E le gata na faafetai ina ua maea le latou fale taalo ae na faafetai faapitoa foi i le alii kovana mo galuega lelei o le tausaga aoga.

Peita’i, sa fa’alogoina la se isi vaega ole tala o le a’oga e fa’apea, “Na o’o mai le asiga o le A’oga Maualuga a Manu’a High, e le’i mae’a nisi o fa’afouga o potu a’oga. E o mai lava le asiga o va’aia le tutu solo o laupapa ma mea faigaluega e fa’atautaia ai galuega, fesili mai tagata nei, A’o a nei mea?”

Ae o le fesili ua toe tu’u mai nei, “E a o taulia ma pasia ea lenei a’iga i lenei asiga ua mae’a atu pe leai, ina ne’i taua’ao atu nei tusi pasi i le fanau fa’au’u, ae toe o’o i le tausaga a’oga fou fa’ailoa mai, ua le aoga nei tusi pasi?”

O se tasi mea taua lava, se na talisua lelei le ‘au malaga i le o’o atu ma le taimi o le a toe tu’ua ai. Piki fisi na saofafa’i ai le vaega lea, le toe migoi lava i le o’o mai i Tutuila nei. Fa’afetai Sega’ula i le mamalu o le PTA ma le Taupulega a le A’oga Maualuga, ua outou si’i si afioga le Kovana i lona nofoa vaevaeloloa i ona toe taimi ma outou, ia manuia lea fo’i tausaga ma ona fatiga, ae ia manatua, “O lo’o matauina lava, e tele lava Tutuila ae fa’ato’a tau fa’asinosino lima mai ai nai manuia mo le Sega’ula!”

O lafoga ia e aoga e fa’atupu manatu!

I le laumua o le Toa o le Vasa i Faga’itua, oka ua mumu fa’asolo atoa. Ioe le mafaufau, o le aso lava fo’i ua ula. O le tou fa’au’uga o se sauniga sili ona pu’upu’u lea, ma o se mea lava e ofo ai le agaga, e ta’alo mai lava sasa’e i le fika o le taimi e migoi ai le Toa o le Vasa! Ioe tulituli mai le malu o le tai taeao, e se’e lelei fo’i foe ona o ia fisaga! Peita’i na tula’i loa Papa ma faia lana lipoti o le PTA, uma loa ma le malu ae amata ona sousou le vasa!

“O outou matua, va’ai po’o e sau ua e iloa se mea i le a’oga a lau tama. Afai e leai, o lona uiga, o oe o se matua sili ona fa’atamala.” E le tele i se pito le lauina mai o taimi fa’atulaga mo le lesitala.

Ae ese ai le fa’ataotoga o galuega fuafua mo le isi tausaga o le a savalia a le PTA ma le A’oga maualuga i Faga’itua.

“Soso’o ia fa’aumi le faleta’alo, ma le fa’ataoto mai le ala savali e amata mai i le fale’ai e o’o mai i le lumafale o le soso’oga fou o le faleta’alo, ma toe aga’i atu i luga i le nofoaga o le ECE o i ai nei. E tatau na mae’a le galuega atoa lea, i le tausaga a’oga o lumana’i nei, ia faia le fa’au’uga o lea tausaga, ua mae’a lelei!”

 O uiga lava ia o le Toa, e tatau ona va’ai taimi ma le mea e fai ai! Fua la lea e alia’i, toetoe a uma le au Football o tufa i ai le fa’ailoga sikolasipi ma fa’ailo mai Iunivesite o le a auai i ai  e a’oa’o ai mo le isi tausaga a’oga o lumana’i.

Mea la lena, e ta’u “OK Fine!” E le faigofie le galuega tima’i mai a ta’ita’i o le PTA, aua e tofu lava fo’i le toa ma lona aiga ma le alamatagi e aga’i i ai. Ae ua iloga mai e aoga tele le taumafaiga i lenei tausaga ua te’a, ua manumalo fo’i tama o Malotumau ma Fatulegae’e i le filigamaea a le Football a A’oga Maualuluga uma o le teritori.

O mea na, o se fa’amoemoega ua taunu’u o le la’au lea o le soifua. Ae na fa’ai’u lava lea aso iloga, i le toe fa’asilasila mai fo’i o Koleniga a Toa o le Vasa, e faia fo’i i le aso To’ona’i nei ma fa’asolo atu ai i lea vaiaso!

Matagofie le to’atele na’ua o le fa’au’uga o le vasega fa’ai’uaso i Tafuna High. Oka se to’atele o le vasega fa’au’u fa’afetai Faia’oga ma le taupulega i lea a’oga, i lo outou onosa’i! Talofa e, o se tausaga e toe la’ititi ai se faitau aofa’i o vasega  fa’au’u a lea a’oga, o se fa’ailoga sili lea ua maua e nai faia’oga!

O se isi mea ua iloga le faigata, ona ua fa’aauau ai pea i lea a’oga le to’atele o i latou e tulaga muamua, ae ou te iloa e i ai lava sina kuata o le senitimita e mafai ai ona iloa e le faia’oga se mea e sili ai lava le isi tamaititi nai le tasi. Afai ua tatau ona saili i togi o su’ega mai fafo, o le isi lena mea e mafai ona fa’afaigofie ai lena tulaga, ona e leai lava lea o se tasi e toe gugulu, aua fo’i, o lena su’ega ua mae’a ona faia mai fafo, e le au fo’i i ai ni faiga a i tatou i inei. E pau lea o se isi mea ua iloga ai le matagofie o isi fa’au’uga, aua ua ta’ito’atasi mai lava sui ua maua ma ausia togi silia, ma ua tu’u fo’i i ai le faiva o le ‘lauga’ e fai ma sui o lana vasega fa’au’u, e fa’afetaia ai le mamalu o papa a’ao i lo latou fa’amoemoe.

 Mai le laumua o le A’oga Matata Ese’ese a le tatou Malo, sole na fa’alogoina ai se tusi na taua’aoina e le Pule A’oga e fa’amanuia mai ai le Fa’au’uga o le fanua fa’au’u o lenei tausaga, ona o lo’o tu’ua e ia le atunu’u ae fa’atasi atu i si ona alo o lo’o faia lona fa’au’uga i le A’oga Fa’amiliteri i West Point, ma o le tama fo’i lea sa fa’au’u mai fo’i i le Polytech ma sa avea fo’i ma Co Valedictorian o lona tausaga. Aulelei, pretty fo’i lea ‘Wildcat’ po’o le Pusi Aivao.’

Ia o’o loa i le folasaga a le fofoga fa’apitoa o le aso, “Isa la’ia, lelei na’ua le folasaga lea mo le lomiga, ae a o’o i luga o le lauga fa’apea, e tatau ona fa’ata’ita’i ia Tracy! Wild Cat in the house! Oka se mea ina a live, e leai se tasi e le’i toe ‘ata ma fiafia, o le aso ua tau momoe tagata ua toe o’o mai taimi malulu, ae fa’ate’i i faiga a Tracy! “Ae aisea ua le alu ai ia Sofia le la ua i Samoa mo le fa’aaliga o ona uiga!”

Matagofie le pese to’afa a le fanau sa usuina se tasi o pese o le latou fa’au’uga, e aulelei lava taumafaiga a le a’oga lea, aua e foliga mai, o i latou nei e ao ina muamua lava maua galuega e faigaluega ai, ona o a latou kosi o tau’avea i le a’oga, e agava’a ai i latou so’o se matata e faigaluega ai.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.