“O SAMOA UA AO”

Mo le Fa’atonu:

Muamua ave le viiga i le Tapaau i le lagi ona o lana pule fa’asoasoa i lea aso ma lea aso, i si o tatou atunu’u o Amerika Samoa.

Ae se’i faga sa’o atu ia se manatu ona o le tatou lomiga i le Nusipepa i le aso 24 o Me, 20212, o lo o fa’amuamua lava i luma o le tatou Nusipepa (front page), e fa’apea lona ulu tala i le fa’aperetania “High Court Orders ASG to set aside $260,000-for Siaumau Jr” Death Penalty Defense. (Ua fa’atonu nei e le Fa’amasinoga Maualuga le Malo e tu’uese le $260,000 mo Siaumau Jr. (Fa’asala i le oti) i seisi faaupuga o le “Fasioti”.

O se manatu ua fa’aosofia ai ni lagona o le tusitala, o ni manatu ua le talafeagai ma le tatou aganu’u po o le atunu’u foi.  O nei gaioiga uma lava, e mafua mai lava ia Mitzie Folau, mai i le amataga o le case a Siaumau Jr., o ia lava lea o lo o tu malosi i le “death penalty” mo Siaumau Jr.

O le manatu o le tusitala e tu’u sa’o lava ia Mitzie Folau, ona o ia lava lea mai le amataga.  O le fesili ua tula’i mai, afai ae ta’usala Siaumau Jr., ae fa’asala i le oti, lona uiga a oti lava se leoleo i se tagata, o le mea lava lea o le a fai e le malo i lea tagata?  Ailoga e talafeagai nei faasalaga, UA AO SAMOA, E FA’AVAE FOI I LE ATUA, SAMOA FAAMUAMUA LE ATUA.

O nei taumafaiga o lo o mana’o ai le loto o le tama’itai loia o Mitzie Folau, ua le talafeagai, o lo o i ai tagata fasioti tagata o lo o i le falepuipui i le taimi nei, ae aisea ua manatu ai Mitzie  e fai le ‘death penalty’ mo Siaumau Jr., ai ona fa’apea o le leoleo.

O le manatu o le tusitala, o le fa’ai’u o Siaumau, o lo o fai ai nei taumafaiga uma, ona o lenei ua tele cases a Mitzie Folau sa taumafai ma tu malosi ina ia fa’afalepuipui ia tagata nei, o le au Siaumau, ae le’i fa’amanuiaina ana taumafaiga:

1.  Solomona Samatua - Dismissed

2.  Smith Siaumau  -  Dismissed

3.  Eliota Siaumau Sr. - Acquitted

Aisea, Ona e mafua mai i ripoti po o tala tusitusia pepelo a leoleo.  Ua tatou malamalama uma lava ua soli le tulafono e Siaumau Jr., ae o Samoa, e leai ni ona fa’asalaga oti.

E i ai le mua gagana a si o tatou atunu’u e masani ai e fa’apea, e feololo le muamua i le lona lua.  Tatou fai fa’aeteete i ai.  Le tama’ita’i loia, Mitzie Folau, toe tu’utu’u le upega i le loloto, fagota i le tai loloto ae le o le tai papa’u.

O le fautuaga mo le aiga o Siaumau aua ne'i ia te outou le lagona ita ae ole filemu ole Atua ia maua, ia lava papale ma taofiofi mamau lagona fa'aletagata e manuia uma ai taumafaiga o lo'o alo atu iai le aiga ae maise fuafuaga ile fa'amasinoga o Siaumau Jr.

O le mea lea tatou mataala, mata poto, mafaufau lelei,ma vaai toto’a pe a tua ma ni a nei tauamfaiga uma o lo o alo atu i ai Mitzie Folau ma lana au loia.  Maimau nei tupe tele o le a fa’aaluina ona o le le fa’autauta lelei, tele manaoga o le atunu’u e fia fa’aleleia, falema’i, ofisa o le Customs, Immigration, o aitalafu a le malo e tatau ona totogia, ae o lea o le a maimau lenei tupe tele, ua atili ai ona matitiva le atunu’u.

Manatu mulimuli lava a le tusitala, Mitzie Folau ma lau au taupulega, toe liuliu le tofa ma le faautaga loloto.  Tatalo i le Atua, avatu mafaufauga lelei, avatu le filemu o le Atua i taimi e te tula’i ai i luma o le Fa’amasinoga mo au fa’ai’uga mo tagata lautele o le atunu’u.

Aua nei o’o i lagona o le atunu’u le fasi fuaitau o lo o fa’apea mai ai Ruth Risch Fuatagavi, “Because the government is trying to put our client to death” (O lo o taumafai le malo e fa’asala oti ia Siaumau Jr. (client).

Le atunu’u o Samoa, ia tatou mataala ma finau i mea lelei.  Alofagia e le Atua ma pulepule tutu so tatou manuia mo nei, taeao ma le lumana’i manuia o Samoa.  Fa’amalie atu aua lava ne’i tegaia se finagalo o se tasi i le tusitala.

Soifua,

Stella S.