Login

Fa’aalia agaga faafetai Soliai ina i’u manuia palotaga

ausage@samoanews.com

O le te’a o le itula e 2:00 i le vaveao ananafi na tuu aloaia mai ai se saunoaga a le Komesina o le Ofisa o Palotaga a le atunuu, le afioga i le Maopu ia Soliai Tuipine Fuimaono, e faafetai aloaia ai le atunuu e tusa ai o le sailiga tofi sa alo atu i ai mo lenei tausaga, ina ua maea le tolaulauina o faaiuga o le palota.

Na tomua le saunoaga a Soliai i lona faalauiloaina o le aso e faia ai le “Run Off” mo le tofi Kovana ma le Lutena Kovana, ia Novema 20, 2012, i le va o le paga a Lolo Matalasi Moliga/Lemalu Peleti Mauga, ma le paga a Faoa Aitofele Sunia/Taufetee John Faumuina.

O le faitauga aloaia o palota o le a faato’a maua mai i le fitu aso talu ona mae’a le palotaga, pe afai e leai se sui tauva e fa’atui’ese.  (Taga’i i le tatou nusipepa i le aso ananafi mo aofaiga le aloaia o le palota.

“E faafetai atu i le aufai tatalo a le atunuu sa faanono manu i le tele o aso, ona o le faamoemoe e pei ona alo atu i ai Tutuila ma Manu’a, lea ua i’u ma le manuia lo tatou faiva i lenei aso (aso Lua na te’a nei) e aunoa ma se tala faanoanoa,” o le saunoaga lea a Soliai.

Saunoa Soliai, e ui i le vevesi sa i ai le atunuu i le masina na te’a nei ina ua tu lalata mai i le aso tuupoina mo le faamoemoe, peitai na aumaia e le Atua le laolao e faatino ai le sailiga tofi a Amerika Samoa.

Na momoli lana faafetai i le afioga i le Komesina o le Matagaluega o le Puipuiga o le Saogalemu Lautele, i le tautua sa ofoina atu e ala lea i le puipuiga o le aufai palota tainane ai le naunau ina ia saogalemu le aso o le palota a le atunuu.

Na faafetaia foi e Soliai ia sui tauva uma sa tausinio i le palota o lenei tausaga, ona o le tulaga mataina sa i ai le faatinoina o le palota i komiti taitasi aemaise ai o nuu ma afioaga o le atunuu.

“Faafetai faapitoa atu foi ia i latou uma sa galulue i fale palota taitasi mo le faatinoina o lenei galuega taua, ua silasila le Atua i la outou tautua i lenei aso, faafetai ma faamalo atu i le galuega fita sa outou feagai ai.”

Na faaiu le saunoaga a le komesina o palota i lona faafetaia lea o le tapuaiga a taitai o le malo o Samoa e tusa ai o le tapuaiga, ao alo faia Amerika Samoa i lana sailiga tofi, ma faaiu ai loa lana saunoaga i lona faamanuia lea i sui uma ua faamanuiaina mo le palota o lenei tausaga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.