Login

Polokalama 4H mo Fanau Aiga Militeri

frostlehualani@yahoo.com

Ua mae’a fa’asalalauina i le gagana peretania se fa’asalalauga e fa’apito augafa i le vasega o fanau e tupuga mai i Aiga o Fitafita Amerika Samoa ma le Iunaite Setete mo le tu’uaga umi lenei o a’oga ua savalia.

Mai le tele o tausaga, sa fa’atautaia lava kosi nei a le 4H i le Fale Ta’alo o le tatou Kolisi Tu’ufa’atasi i Malaeimi, peita’i, o le tausaga nei ua suia ai foe o lea auaunaga aoga i a’oa’oga masani e mafai ona fa’a’au’upegaina ai le fanau a’o tuputupu a’e i totonu o le si’omaga saogalemu o lona aiga, nu’u ma le atunu’u atoa.

Ua fa’atulaga i le taimi lea auaunaga a le Polokalama 4H ua so’ofa’atasi ai ma le US Army Reserve i Tafuna ma latou faia ai lea ituaiga o a’oa’oga mo na’o o fanau uma a i latou o lo’o i totonu o le Militeri, po’o fitafita tuai fo’i ma latou fanau a fanau, pe fitafita fo’i ua maliliu ae o lo’o soifua i’inei a latou fanau.

O le lesitalaina o fanau e amata mai le 6 tausaga se’ia o’o i le 19 tausaga le matutua, e fa’atautaia lea e le SFC Pele Reserve Center, ae o a’oa’oga fa’atautaia, e saunia mae’ae’a lelei lea e le polokalama 4H o le ASCC- CNR Division.

Ua fa’ailoa mai o ituaiga polokalama e fa’atautaia i lenei vaitaimi o le taumafanafana e afua mai ia Iuni 18 se’ia o’o i le 22 Iuni, 2012, e aofia ai: A’oga o Galuega Alofilima fa’asamoa, saunia lelei o tomai fa’amalositino fa’afitafita, o tusiga ma vali ata, su’esu’ega o ituaiga o la’au e ‘aina fua ma la’au e o’ona i le vaomatua ma o tatou tuamaota, galuega fa’atino e fa’ailo ai lagona fiafia o le fanauiti, totoina o togala’au ‘aina ma togala’au mo fuala’au fa’atau atu, saunia o umu e fa’avela ai meataumafa a Samoa, polokalama fa’amalosi’au i le fanau i taimi fita, o le gaosiga o le elei ma le oloa tye dye, saunia mo koleniga fa’amiliteri a le vaega matutua, gaosiga o mea’ai suamalie e aoga i le tino, a’oa’oga fa’apitoa mo le gaosia o foliga e fa’aaoga ai paluni  ma le tapenaina o ituaiga o mea’ai samoa ‘ese’ese ma fua o fa’aeleeleaga.

E umi le lisi, ae o le a fa’aailoa ai e le 4H le tele o mea e ao ina agava’a ai alo o le atunu’u, ina ia tagolima i latou i so’o se taimi i totonu o latou aiga, ae maise o nisi fa’alapotopotoga e fa’atasi atu i ai i latou a’o gasolo ina avea ma tagata matutua.

Ua fa’ailoa mai, o lenei polokalama o lo’o i ai lona fa’atupega fa’atulaga mai e le US Department of Defense, ma ua fa’apa’aga a latou galuega ma le Iunivesite o Hawaii i a latou polokalama o le OMK; YES ma le CYSS  ma ua so’o tau’au atu i ai ma le 4HProgram a le ASCC-CNR.

O le igoa ua fa’aigoaina ai lenei polokalama so’ofa’atasi a nei totino uma ua lisia i luga mo le fanau Militeri a le atunu’u i le Taumafanafana 2012 ua fa’alauiloa mai: “Toa Fa’aleoleo: Fa’atasiga Fanau Militeri: Tolauapi Autalavou 4H.”

Pe afai e fia iloa patino pe agava’a lou alo i lenei a’oa’oga matagofie, ia e vala’au i le laina mo le US Army Reserve, ma ua alagatatau fo’i lea tulaga, ina ne’i le maua se avanoa o lou alo ona o le fa’atamala o i tatou.

Ua i ai numera ua fa’ailoa mai e lesitala ai lou alo pe afai o le a e manatu e auai i lea tolauapiga matagofie i lenei tu’uaga o a’oga: 699-9216 fesili mo Rachael Manning ma le numera 699-1575 Ext. 242 ma le 243.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.