Login

MASI’I ITUMALO ALATAUA MO LE PESE - SISIGAFU’A SAMOA TUTO’ATASI

frostlehualani@yahoo.com
[Samoa News]

E le tu’u mamaina e le itumalo o Alataua le vala’au fa’apitoa na o’o mai, e le o fa’ataga masi’i fo’i i le aso iloga o le pa’ia maualuga ia Tumua ma Pule, Itu’au ma Alataua, Aiga i le Tai ma ma le va’a o Fonoti.

“Ona o lenei fo’i vala’au fa’aaloalo e fa’ailo ai le ava fa’atamali’i i le va o i tatou o le Usoga, e le mala ‘ese Samoa i sisifo, mala ese i’inei. A tu’utu’u lava i le loloto, o ta’ua lava e tasi lo ta tupuga, e tasi fo’i lo ta amataga ma lo ta i’uga. E so’o toto so’o ivi i ta’ua, e le mafai ona ‘ese se lagona i’ina, e se i’inei.

O le agaga ia ta fiafia fa’atasi i le atoaga o lou 50 tausaga o lau faigamalo aua sa e le tu’ua fo’i i lalo se fa’atalau’ula atu a lou Usoga, ina ua atoa le 100 tausaga o lana faigamalo fa’ateritori o Amerika.

“O agaga tonu na e ala ai ona fegasoloa’i lenei atunu’u, o le ava fatafata ma le agaga fa’asamoa moni lava, ia tutusa mea e tate feva’aia’i ai, ou te va’ai atu ua e sau, e te va’ai mai fo’i ua ou fotua’i atu!” O se fa’apupulaga lea na fa’ailo ai lagona o ta’ita’i o Alataua i le masi’i fa’aaloalo atu i Samoa mo le fa’ailogaina o le atoaga o le 50 tausaga talu ona ia tuto’atasi e taumafai lona malo, ma ua iloga mai, ua matua tulaga lelei lea taumafaiga.

 I le aso Lua na masi’i ai le ‘ausiva o lo’o soa fa’atasi ma Alataua i lo latou sao mo le sisigafu’a a Samoa, le vaega a le SOFIA, i latou nei ua sisiva fa’apitoa mo Alataua.

Peita’i, ua mae’a fa’atonuina le malaga fo’i a le MV Lady Naomi, e malaga uma ai le isi to’atele o le itumalo o Alataua, fa’atasi ai ma le tele o le latou uta e tapena ai le latou nonofo ai i Samoa mo le fa’amoemoe.

Ua fa’ailoa mai o le a api i latou i Vaimoso, Faleata, ma ua fiafia lava i latou e avea fo’i ma sui o le mamalu o lo’o fa’atali atu i fanua o le tatou atunu’u ae a se sao o le tatou fo’i malo mo tatou uso i Samoa Tuto’atasi.

Ua fa’ailoa mai e amata lava i le ulua’i malaga a le va’alele se’ia o’o i lana malaga mulimuli o le aso a taeao, ua mae’a fa’atulaga ai avanoa mo le aufaipese a le Alataua.

“E le o nonofo lelei le tupulaga i le tausailiga o latou tupe fa’aagaaga ae a se to’ai taunu’u fo’i i Samoa e maimoaina lea fa’aili lauiloa, ma ua logologoa fo’i a latou pesega i le lalolagi.  O le isi mea o lo’o fiafia ai i matou, e molimauina nei le tu’uga fautasi, e ui lava ina ua le masi’i se tatou Sa, ae le tu’ua ai le fiafia e maimoaina lea fo’i fa’agatama i so’o se taimi e maua ai le avanoa i’inei po’o Samoa fo’i.” O se talanoa mai lea a le tofa le Tauto’oto’o Liua Pisamoa Taifane.

O upu o le pese, o le a le mafai ona fa’aalia, ae le o fa’atamala Alataua i le tulaga lea. Ona o le Itumalo o lo’o fa’atautaia mai e le afioga le FaleAlataua ma Nofo a Fa’asisina ma ua malupuipuia fo’i e le nofo a Tauto’oto’o, o le matua so’o lava le fau ma le fau i le fa’amoemoe lea e pei fo’i ona silamio le atunu’u i le latou fa’afiafiaga o le tatou sisigafu’a.

Ua fa’ailoa mai, o le toniga, ua faia le fa’ai’uga e fa’aaoga pea le toniga sa faia i le sisigafu’a i se fa’amoemoe e pei o le pese, ae o le aso e savavali ai i le savaliga, ua mae’a saunia le toniga ‘auro a le itumalo mo lea fa’amoemoe, aua e pei lava o se ‘fa’alelegalupe’ o le a faia i malae i Tiafau i lea taeao fa’a’auro a Samoa Tuto’atasi.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.