Ta’utino molimau o le leoleo na faatonu o ia e sui lana fa’amatalaga

I le toe faaauauina ai i le faamasinoga autu o se alii o lo o tuuaia i le sola ese mai i le toese i le 2010, ma latou osofaia ma nisi pagota se alii leoleopo a le faletupe o le ANZ bank i Tafuna, na taua ai e se tasi o molimau a le malo e faapea, sa faatonu o ia e le alii leoleo o Siaosi Aiono, ina ia sui lana faamatalaga, ma ia tu’ua’i uma mea sa tutupu ia Pati Lepou.

O le alii o Gasona Moemoe, o le molimau lona lua lea a le malo na valaauina i le faamasinoga autu o Lepou, lea o lo o tuuaia i moliaga o le sola ese mai le to’ese, faomea i le tulaga muamua, atoa ai ma le faaoolima i le tulaga muamua.

O ia moliaga na afua mai i se faalavelave na tulai mai i le aso 22 Ianuari 2010, ina ua sosola i tua mai le toese Lepou ma isi pagota e toatolu e aofia ai ma Moemoe, ma latou osofaia le leoleopo o le faletupe a le ANZ i Tafuna.

O isi pagota o lo o tuuaia i lenei mataupu e aofia ai David Maea ma Sefo Lemalu, lea foi ua maea  ona la molimau mo le itu a le malo.

Na taua e Moemoe e faapea, pe tusa o le 12:30 i lea aso, na tatala ai e Maea le potu e faaaoga ai le ki sa aumai i le fuifui ki a leoleo o le falepuipui, ma latou sosola ai, ona latou fepe’ei i luga o le pa ma ui atu ai i le itu o lo o i ai fale mautotogi a le malo, e saili le uo a Maea o loo nofo ai.

Ina ua le maua le uo a Maea, sa ia faia loa le tonu ina ia latou agai atu i le Lions Park latou te evaeva ai, ina ia faaaoga ai le taimi lea ua latou sosola mai ai i tua.

Sa latou vaaia le alii leoleopo a le ANZ o lo o moe nofo mai i luga o le nofoa, ona fai atu lea o Sefo latou te o e fasi le leoleopo ae aumai le ki o le taavale latou te o ai.

Na fesili Reyna ia Moemoe po o ai na faia le tonu latou te o e fasi le leoleopo, na tali Moemoe, o Sefo, ae o lana faamatalaga lea sa tuuina atu i leoleo, o lo o ia taua ai o Lepou sa faia le tonu latou te o e fasi le leoleo.

Na fesiligia Moemoe pe aisea ua ese ai lana molimau ma lana faamatalaga na tuu atu i leoleo, ae na tali Moemoe, o le alii leoleo o Siaosi Aiono na faatonuina o ia e sui lana faamatalaga faapea o Lepou na faia le tonu, ona o lo o tete’e Lepou i ona moliaga.

O le molimau lava foi lea a Moemoe ina ua fesiligia o ia e le loia a Lepou o Mark Ude i le mafuaaga ua eseese ai lana molimau ma lana faamatalaga tusitusia sa tuuina atu i leoleo.

“A’o tau tusi la’u faamatalaga, na sau le alii leoleo o Siaosi Aiono ma fai mai e una’i uma ia Lepou o ia na faia le tonu ae le o Sefo,” o le molimau lea a Moemoe i luma o le vaega iloilo iuga i le taeao ananafi.

Fai mai Moemoe, o Sefo na muamua tu’ia le leoleopo ma pau ai i lalo, ona oso atu loa lea o Lepou ma tatu’i, ae o ia na oso atu ma taofi vae o le tamaloa ina ia aua ne’i tu i luga, a’o fasi to’alua e Lepou ma Maea le leoleopo.

“Na ou faalogo o fai Pati ia Maea e tui le tamaloa i le naifi, o le taimi foi lea na ou vaaia ai ua tui e Maea le tamaloa ao taatiatia pea lava i lalo,” o le molimau lea a Moemoe.

O le maea ai o le fasiga e i latou nei o le alii leoleopo, na latou toe fo’i atu ai loa i totonu o le toese, pe tusa o le ta lea o le 2:30 i le vaveao.

O le ulua’i molimau a le malo i le taeao ananafi o le  alii leoleo suesue ia Det. Vaina Vaofanua, lea sa ia taua e faapea, o ia sa fesoasoani i le tamaitai leoleo sa faauluulu i ai le suesueina o lenei mataupu ua maliu, o Det. Faamoemoe Segi.

O se tasi o vaega na taua e Det. Vaofanua sa ia maitauina i le vaega na tupu ai le faalavelave, o se u’amea sa taatia e le mamao mai le vaega o loo to’a ai le toto, o ni seevae faapea ai ma ni ofu ua masaesae uma.

I le maea ai o molimau a le malo, na valaauina ai loa e le itu tete’e lana ulua’i molimau, o ia foi lea o loo faauluulu i ai le Ofisa Suesue a Leoleo, susuga Cpt. Lavata’i T. Sagapolutele, lea na ia taua i le vaega iloilo iuga e faapea, o ia sa faatonuina leoleo su’esu’e i o latou tiute tauave e tusa ai o le  suesueina o lenei mataupu.

O le taeao nei lea ua faamoemoe e toe faaauau ai lenei mataupu i luma o le faamasinoga maualuga.