Login

29 Sui Fa’au’u EMS mo Galuega Lavea’i

frostlehualani@yahoo.com

O le aso Sa na te’a nei, sa fa’atautaia ai i le itula e 3:30 i le afiafi se sauniga lotu fa’apitoa ma fa’aopoopo atu i ai ma le sauniga o le fa’au’uina o Sui e to’a 29 i latou, ua pasia lelei a’oa’oga fa’apitoa ma tomai e mo’omia mo i latou fa’atinoina galuega lavea’i mo tagata ua gasegase a le vaega a le EMS.

O le sauniga sa matua fa’atumulia lava, ma ina ua mae’a le sauniga lava latou masani sa fa’apea loa ona tomuli i taualumaga e fuafua patino i le fa’au’uga, ma le tufatufaina o tusi pasi o le vasega fa’au’u.

I pese ma vi’iga na saunia e le aufaipese a le Ekalesia Fa’apotopotoga Kerisiano i Faga’alu ma vi’iga fo’i sa saunia e le vasega fa’au’u a le EMS sa fa’aatagia ai lava le fita ituga o lea fo’i matata, o le taumafai e fa’auia atu e ala i a’ao ma galuega fa’atino a i latou le mana fa’aola o le Tama o i le lagi.

O le lauga sa saunia e le susuga le Faife’au Lalomauga Pa’au, sa fa’auia mai ai tima’iga mo i latou e fa’atinoina ia tiute aoga tele i le lavea’ina o le soifua o le mamalu fa’agasegasea o le atunu’u.

“Ae ou te le manatua se tasi lava mea, a’o lo’u lava ola ou te le manumanu i ai, se’i o’u fa’auma la’o momo’e ..” O upu tima’i ia a le pelofeta o Paulo aua ua ia iloa, e le o toe manumanu i lona ola i lona fa’atinoga o le galuega ma tofi ua tu’uina mai e Ieova ia te ia, na te faia.

Peita’i na toe fa’apea le failauga, “E ese le tofi, ae tatau ona i ai le agava’a e mafai ai ona e fa’atinoina galuega fai mo lea tofi.” E atili ona toe fa’apu’upu’u lea fuaitau ona  fa’apea lea, “E  le o le tofi, ae o tiute  o le tofi!”

E leai se faigofie o i ai i le tofi ua vala’auina ai outou tou te fa’atinoina, lea fo’i ua faia le tiute o le matagaluega EMS o le toe fa’aauupegaina outou i tomai mo’omia mo le fa’atinoina o la outou matafaioi tau’ave - galuega lave’ai o le soifua!

“Ia outou mata’ala ma ia fa’amaoni, e le o sina taimi o le aso e ao ina mataala ai, ae o le 24 itula o le aso atoa, e te mataala ai pe a o’o ina mo’omia mai loa lau fesoasoani.”

Ona o le malu ua matua fa’atumulia i le to’atele o le ekalesia, le vasega o aiga o e na fa’au’u, ae maise o uo ma e masani sa auai e fa’ailo lo latou naunauta’i, ia iloga ona patipatia faiva o nei fanau o le atunu’u, ua latou filifili e faia le galuega lavea’i o le soifua e ala i le auaunaga a le vaega o le EMS.

O nisi o tima’iga a le Fa’afeagaiga sa ia fa’apea ai, “Ia tinou i le tauivi, ia so’otau’au ma le Agaga Pa’ia e fesoasoani i faiva i taimi uma, usita’i i a’oa’oga ua mae’a fa’aauupegaina ai outou, ae o lou fa’amoemoe o lo’o i le Atua lea e alofagia fa’aola mai le ua mo’omia ona fa’asaoina lona ola!”

I le talanoa mai a le sui mai lea matagaluega, sa ia folasia ai le lu’iga tele i lana matagaluega, e le faigofie ona maua nisi ua mae’a a’oa’oina, ae ua fa’afetaia i lenei vasega atoa, ua atoa le tausaga atoa talu mai ona a’oa’oina fa’apitoa i latou i toma’i e mo’omia mo le galuega ma ua atoatoa le latou auaunaga e faia fa’atasi ma sui ua mae’a galulue tumau i le matagaluega, ua fefa’asoa’i ai le tomai ina ia mautu le latou iloa i galuega lavea’i.

Na a’oa’oina fo’i le vasega atoa lenei i tomai fa’afoma’i e ao ina mua’i faia i gasegase pe a latou o’o atu i ai, ma va’aia po’o a ni tulaga o lo’o ua i ai lo latou soifua. Ona o ia fo’i mataupu sa lautogia ai se tasi o le vasega atoa lenei i le togisilia, o lea sa maua ai e John Fereti lea fa’ailoga.

O le aotelega o mataupu uma na ‘ave ae maise o le fa’atinoina o tiute e fa’atautaia ai galuega e mo’omia mo le lavea’iga o le soifua o tagata mama’i, sa maua lea tulaga muamua e le ali’i o Tyrell Eugene J. Ah Kuoi. Na tolaulauina fo’i se tasi sa sili ona maoa’e lana taumafaiga, ona sa amatalia le a’oa’oga fa’apitoa lenei o maulalo lava ona togi, ae matauina i le fa’ai’uga ua ausia e ia togi e pasi ai i tiute fa’atino fa’atasi ai ma a’oa’oga masani. O ia lea o Mareko Antonio.

Na fa’afetaia e le susuga Galumalemana  Fuapopo Avegalio le Pule o le EMS, lona agaga fa’afetai tele i le fanau sa a’oa’oina i lenei vasega, aua o le to’atele o i latou na o’o atu ina ia auai i le vasega fa’apitoa ina ua tatala mai le avanoa, ae le o ni tagata faigaluega tumau. Sa le maua so latou totogi mo lenei taimi umi, ae le’i fa’avaivai ai o latou loto i le galuega, ona ua latou va’aia le mo’omia o lea auaunaga, ae maise o se galuega e faia ma le alofa tele.

Na i ai se avanoa e saunoa ai le CEO a le falema’i Maichael Gerstenberger, lea sa ia fa’apea ai, “E pau lana galuega e ao ina faia, ia mautinoa o lelei le nofoaga e avea ma ofisa tutotonu o le EMS, mautinoa o lava ta’avale e fa’aaogaina i latou galuega lavea’i, po’o ua i ai uma meafaigaluega mo i latou e fa’atino ai latou tiute fai i taimi uma e vala’auina mai ai mo se fesoasoani. E ui ina utiuti le fa’asoa a le LBJ peita’i, ua fa’afetai o lo’o mautu mai lea vaega o le tautua, ma ua fa’afetaia le Malo, aua sa latou tau’avea le matagaluega mo se taimi tele o lenei foi tausaga fa’ale-tupe.

O le saunoaga a le Sui Kovana e fai ai o ia ma sui o le la’ua va’a se’elua ma le afioga le Kovana Sili e patipatia fo’i le taumafaiga ua o’o nei a lea vaega o le malo. Sa ia fa’afetaia le fe’au tima’i a le susuga le Faifeau, ae maise o vi’iga ua fa’ailoga ai le aoga o lea tautua e fa’atino e lea vaega to’aititi o le atunu’u, fa’afetai fo’i ia i latou na tausaili le atamai fa’apitoa mo ia faiva, aua e mautinoa lava, “E sili ona mana’omia e le lautele o lenei auaunaga i taimi o pagatia.”

“E mautinoa fo’i le moni o le folasaga a le susuga ta’ita’i o le EMS, o nei tiute e ao ina fa’atino ae ua agava’a le sui o fa’atinoina i le tomai fa’apitoa mo le auaunaga, ia lavea’i le soifua o le ua mana’omia le fa’asaoina.”

O se tasi o ana saunoaga sa ia fa’apea ai, “Afai tatou te susu’e tusi fa’amaumau a le EMS, ona tatou fa’ato’a iloa patino lea o le tele o le mana’omia o lo’o i ai i le atunu’u lautele!”

“O nisi o ni lipoti fa’amaumauina, ua lisia ai le mamao mai o le fale o le aiga na fa’afafa mai ai le gasegase se’ia o’o mai i le ta’avale a le EMS, o ai na ia fa’atinoina na galuega, fa’afetai ia te outou le aufaigaluega i le agaalofa ina a tele, e faia ai le galuega, ae o lea, e le’i totogia outou e to’atele! E ala ona outou faia tiute na, ma fa’atino ma le tigaina tiute na, ona o le alofa ma lou va’ai ia fa’asaoina le ola o le ua gasegase. E mautinoa e taui e le Atua le galuega lena.”

Ina ua mae’a le sao o le afioga le Lutena Kovana Faoa Ipulasi Sunia i le sauniga mamalu, sa usuina loa e le Vasega fa’au’u le latou pese “Ave lou ola ia aoga, Le Ali’i e, i au fe’au...”

Na soso’o lea ma le tufatufaina atu o Tusi Pasi i le fanau fa’au’u ma sa tolaulauina i latou e le susuga Jonathan Mageo MICT a le EMS. Ina ua mae’a sa taua’aoina fa’ailoga fa’apitoa e pei ona fa’aalia i luga, ona fa’ato’a saunoa ai lea o le sui lautogia o le EMS e fa’afetaia le Susuga le Ta’ita’i o le sauniga sui mamalu na vala’aulia fa’apitoa mai le Malo ma lona fa’auluuluga, ae maise le Pulega a le Falema’i tele i Faga’alu ma le mamalu lautele ua sasao i le maota o le Atua i lea afiafi e patipatia le fa’ai’u ma le manuia o a’oa’oga a le fanau fa’au’u a le EMS.

Na fa’amae’a fo’i le afiafi i le fa’aulaga o e pele i matua ma aiga ae maise o uo ma e masani, ma le fa’asuamalie fo’i sa tapena i ai le EMS e fa’amalu atili ai le afiafi i malae o le Fetu o le Afiafi.

O igoa nei o i latou ua mae’a fa’au’u ia Me 20, 2012:

Tyrell Eugene J. Ah Kuoi, Alisi Mamea, Tautala Amituana’i, Christian James McCutchin, Mareko Antonia, Piliopo Mikaio, Erupi Emmanuel Autele, Roy Sae, John Fereti, Fitilagipupula Siveria Sima, Tumua’i Nofo Fiafia, Penu Ben Satele, Miles-Lance Europa Fisher, Sinaloa Lamosa Sokimi, Henry Tyrone Hudson 11, Pa’oivaoese Tautala, Souvenier Salanoa Ili, Atene  Tevaga, Kelemete Peni Kaio, Poyer Timoteo, Iopu Kaleopa, Tofinu’u Olive, Vaimoe Leaoa, Marcy Fa’asi’u Tuifatu, Madonna Anastasha Lemana, Fa’ai’u Tuiveta, Jonathan Raymond Letuli, Tuive’eve’e Afoa ma Uaealesi Karoline Malaga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.