Login

SOLA THAI QUEEN MA LE PALE - MS FUALA’AU!

frostlehualani@yahoo.com

Ua iloga mai e le’i faigofie lava le tauvaga a le Miss Flowers i lenei tausaga, ua matua una’i mai ma le malosi taumafaiga a tausala tauva e to’avalu sa taumafai  mo lea pale matagofie. Peita’i, o le vaega lea ua fa’alagi e le tofa Lopa Seti Lopa i le vaitaimi o le Sisigafu’a 2012 a Amerika Samoa, “o fanau a aitu ma tagata” ae atili ai ona latou fiafia i lea fa’alagiga.

“E le o se mea e afaina ai se loto, ae ua atili ai ona matou fiafia, aua o lele sky is the limiti i nei mea!” O se tala lea a Konshiki ina ia fesiligia fo’i lea fa’alagiga ma sona lagona fa’aalia i ai!

O le tauvaga i lea po, sa matua fa’atumulia le nofoaga o le vaita’ele a le Tradewinds i le mamalu na fia molimauina lea tauvaga uiga’ese. E ese mai lea, ae sa  auai le vaega o Televise mai Korea, au pu’eata a le tatou televise ma le vasega o nusipepa fa’asalalau aua le fa’alauiloga o le sui o le a sola ma le pine o faigamea i lea afiafi.

E ui ina tuai ona amatalia le fa’amoemoe, ae ua iloga le faigata ona tu’ufa’atasia o teuga a nei tama’ita’i ina ua gasolosolo mai e tofu sao i le tauvaga fa’atulaga mo le latou fa’aaliga taleni, le fa’aaliga o ofu ta’ele, le fa’aaliga o lau fugala’au o e tau’avea ma fa’alauiloa, ae maise ai le Puletasi, taliga o le fesili atofa sa e se’ia ma le siva Samoa e te sa’asa’a ai e avea ma taualuga o lou sao  i le Miss Flowers i lenei tausaga.

Sa mua’i tula’i mai le fofoga o le aso Mz Tracy Roe ma ia fa’alauiloa le gasolo mai o nei sui tauva i luga mo le maimoaga a i latou na auai. Na sosoo mai ma isi fa’afiafiaga a le Penina Tausala Dance Group lea e fuafua fo’i le latou malaga i le fa’ai’uga o lenei masina i Korea ina ia feso’ota’i a tatou fa’afiafiaga ma ituaiga o fa’afiafiaga a lea fo’i malo.

O le tama’ita’i na tausala tauva numera tasi o Mizz Rose -Jenida Taufete’e ma sa matagofie lona ofu pa’epa’e ua fa’asolo ai rosa mumu ma ua i ai moli, oka e matua uiga ese le tuufa’atasiga o nei mea uma e fa’aalia ai lana teu fugala’au.

O le tausala lona lua o Mizz Ginger ma sa ulufale mai ai o ia lana fo’i teu fugala’au ua fa’asolo atoa ai moli ae ua faia lona fa’aapa’au pe’a lanu auro, teuteuina lona la’ei i fugala’au. O le tausala tauva lona tolu o Miss Moso’oi ma sa latou saunia fo’i se ofu ma sona pulou matagofie ua matua maualuluga le fa’asologa o nei fuala’au, ae o se mea e ofo ai, o le mafai ona tau’avea i luga o latou ao.

O le lona fa o sui tauva, sa o’o mai ai le tama’ita’i o Tai Queen ma lona pulou silisili ona maualuluga laula’au ma ona fugala’au i’ila uiga ese i le va’ai. Oka i le taimi na tolaulauina ai fa’ailoga, sa numera muamua ai lana lea taumafaiga i le tauvaga atoa.

O le lona lima e le’i fa’avaivai, oka sa tatau lava ona tatou o uma e maimoaina lea fo’i ituaiga o taleni. O’o lava i le sui lona ono savali mai loa ma le ulupo’o ua mae’a teuina i fugala’au eseese Oka, ua tau fai leiloa e tagata filifili le ua sili. O’o mai le lona fitu o le lanumoana, ae savali mai le ofu la’ititi ma le fagu ua fa’atu ai le teu i lona ao, aua, ua uma upu.

O’o fo’i i le lona valu latou, ae sau ma sioti mumu ma le ie auro e fa’alavalava mai ai, ae o le teu fugala’a felefele ua fa’atuina i lona ao. Matagofie le taumafaiga uma a sui i lenei itu ma le maimoa atu i ai.

O le isi mea na ege ai le to’atele ua tu’i le talie, o ofu ta’ele! Sa sili ai ona savavali mai tama nei i ni latou ofu laiti, ae ua tago fua i ofu o teine, lea ua va’aia le masoa tele, ae moni ai le tala, “o le tauvaga le mea lea e fai!”

E leai se ma ae na’o le siou mai o le vaega lea, ua sili ona fefefe tama’ita’i e va’ai i o latou sui ua sili atu mea latou te mafaia ona fai! Ina ua o’o i le tauvaga puletasi, o i’ina sa iloga ai le isi o latou tomai o natia, aua o le aiaiga, ia mafai ona su’i fa’atasi ma latou fugala’au o lo’o tau’avea i lenei tauvaga.

O le ofu pa’epa’e o Jenida sa ia la’eia ae su’ia i ai rosa mumu, ma lana fa’apo teurosa mumu ua matagofie lava, o le puletasi mumu a le tama’ita’i o Anse sa laei ae faia ona teuteuga i le fugala’au o le ginger pa’epa’e.

O Aruni ma lana fugala’au o le Moso’oi sa ia teuteuina ai lana puletasi lanumeamata vaivai i’ila lava, ua matagofie fo’i i lana sa’asa’a. O le tausala manumalo o Tai na ia laeia le puletasi piniki ua mae’a su’ia i ai le teuila i ona petale ua su’i fa’amamanu mai ai le teuila ma ona lau.

O le ofu o Miss Tana o le Lilly sa su’ia i ai ma ua fiafia i le malamalama o le lalolagi i ana fugala’au ia, o le tausala lona ono o Cheyanne sa ia fa’aalia lana Oketi ae o le tausala o Samaya na matua lanumoana malosi mai lana silika ae su’i ia i pua i lona lea ofu.

O le tama’ita’i sa manumalo lana puletasi i le tauvaga o le numera 8 i le fa’asologa o Rayven Armani Taylor lea sa keke mai luga lana puletasi lanu uliuli ae samasama mai ana bird of paradise  e mamanu ai lona ofu.

Matagofie a latou taleni, peita’i, na sola fo’i Tai ma lea fa’ailoga, ona o lana taleni. O le taleni a Jenida sa ia matua lui ai ma faia le siva a le Manu Samoa. O se suiga na toe patipatia i lea afiafi aua ua toe tutu mai tama o le itu’au malosi i o latou tino moni.

I le fa’ai’uga, sa matagofie taumafaiga uma, e le manumalo uma fo’i ae tusa ai o le fa’ai’uga mai fa’amasino tofia o lea lava tauvaga, ua tatou patipatia ai le ua tulaga muamua. I le fa’alogo a le tusitala e tusa ai o fesili, sa fesiligia le tausala tauva numera 7 i se fesili e fa’apea, ‘Ua maua mai le tala ua maua oe i le AIDS, o le a sau fautuaga i le aofia lea e potopoto mai pe afai ua tofia oe e te tautala i ai e tusa o lea fa’ama’i?”

O le tali sili lea ia te a’u lava ia, na fa’apea ai le sui tauva Samaya Jackson, “Fautua atu ia te outou matua ia a’oa’oina fanau ia fa’aaoga pa’u mo feusua’iga i taimi uma e oso fa’afuase’i ai ni lagona fa’aleituaiga, ia mautinoa o malu puipuia oe ma le fanau ma tagata uma mai lea fa’ama’i leaga tele!”

O Fa’ailoga sa taua’aoina:

Jenida sui tauva numera tasi sa ia mauaina le fa’ailoga fa’apitoa o le Miss Charity.

Aulelei i ata na tapu’eina ua maua lea e sui tauva numera 8 o Rayven Armani. Sui Tauva na mauaina le fa’ailoga fa’apitoa mo le teuteuga matagofie o latou Teu, na maua e le #4 Tai Queen, O le Ofu Taele sili ona matagofie na maua lea e le numera 3, Aruni - Miss Moso’oi.

O le sui na mauaina le tali o le fesili na maua lea e le #4 Tai Queen, toe maua fo’i e le sui lava lea ma le Taleni i ana siva ese’ese sa fa’aalia, ae o le Puletasi sa mauaina lea e le sui numera 8 o Rayven Armani.

Tulaga fa i le tauvaga sa maua lea e Aruni Miss Moso’oi, Tulaga tolu sa mauaina lea e Samaya Jackson Miss Plumeria ma o le sui numera fitu. Tulaga lua sa maua lea e le sui tauva numera 5 Miss Lilly po’o Tana Faumuina. O le na manumalo o Tai Queen mai Leone ma Faga’alu.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.