Ads by Google Ads by Google

Fa’afetaia aiga o fitafita ua maliliu le fa’atauaina ...

O a latou tautua

O le agaga o le faafetai na momoli mai e matua, uso ma tuafafine o nisi o Toa o Samoa ua maliliu ao tautua ai i vaega au a le malo tele, ona o le sauniga lea na faataunuuina i le faaiuga o le vaiaso na tea nei, e faamanatu ma faataua ai le tautua a Fitafita i totonu o vaega au a le malo tele, atoa ai ma i latou sa tautua ae ua malolo, aemaise ai i latou sa tautua ae ua maliliu.

Mai le toatele o Toa o Samoa ua maliliu ao tautua ai i totonu o le taua, e toatolu fitafita na mafai ona fesiligia e le Samoa News nisi o latou aiga, i ni o latou lagona ina ua faatasi atu i le sauniga o le ‘National Armed Forces Day’, lea na faataunuuina i le maota o le Lee Auditorium i le po o le Aso Toonai na te’a nei i Utulei.

O alii fitafita na mafai ona fesiligia o latou aiga e aofia ai le susuga ia Sgt. Raymond S. Sevaaetasi, Sgt. Malaefou M. Heather, ma le susuga Army Spc. Farao K. Letufuga.

O le susuga ia Sgt. Raymond S. Sevaaetasi na maliu i le aso 11 Aperila 2007, a’o tautua ai i totonu o vaega au a le malo tele o Amerika. Sa galue o ia i le Army mo le vaega a le 15th Brigade Support Battalion, 2nd Brigade Combat Team, 1st Division, Fort Hood, Texas.

Na maliu Sgt. Sevaaetasiina uai manu’a lona tino i ni aafiaga tuga e mafua mai ina ua oso lana taavale i luga o se pomu sa tatao solo e vaega faatupu faalavelave ae tautua ai i totonu o le tafa o taua i Iraq.

Na taua e le tuaa a Sgt. Sevaaetasi o Tuala Sevaaetasi e faapea, e ui e misia si ona atalii peitai e pito sili atu ai le misia o ia ona ua motusia le mafutaga, ae o le agaga faafetai ina ua faataua le tautua a Toa o Samoa i soo se tafa o taua.

Na faafetaia e Sevaaetasi sauniga lotu o loo faia e Tama Tuai a Malisi i faaiuga o masina  taitasi, ona ua avea lea sauniga ma auala e faamalosia ai loto ma lagona o matua ma aiga o fitafita o loo tautua, ina ia maua e i latou le lototele pe a feagai ma faafitauli o le olaga.

O le susuga Tuala Sevaaetasi o se tasi o fitafita ua malolo litaea mai i vaega au a le malo tele, e pei ona tautua mo le tele o tausaga.

Na taua e Sevaaetasi e faapea, o lona tuaa foi sa malolo litaea mai i le Maligi a le malo tele, ma ua masani foi lagona e faafetaiai taimi faigata e oo mai e pei o si ona atalii, ona o le tautua e ofo atu ai le soifua mo le atunuu ma le lalolagi.

O Sgt. Malaefou Matthew Heather na maliu i le masina o Aokuso 2009 i se faalavelave tau taavale, a’o faatino ai ona tiute i totonu o vaega au a le malo tele o Amerika. O le 2004 na ulufale atu ai o ia i vaega au a le malo tele i totonu o Fort Hood, Texas ina ua maea aoaoga sa feagai ai o ia.

O Sgt. Heather na uluai valaauina i le taua i le 2008, i totonu o le vaega o le HQ, 2nd BN, 8th Inf. Regiment, ma sa galue o se tagata na te ofoina atu se tautua faapitoa i le tulaga tau soifua maloloina (Health Care Sepcialist).

Na taua e le uso o Sgt. Heather ia Tolfie Heather lona misia o si ona uso i totonu o le mafutaga a lona aiga, aemaise lava ina ua faataua lana tautua atoa ai ma isi Toa o Samoa i se sauniga sa faia i le vaiaso na tea nei.

“E lagona lava le misia o le uso i le mafutaga faaleaiga ina ua misia o ia, peitai e faagaeetia le loto ona o lana tautua mo le atunuu faapea ai tagata, e ala i le puipuiina o le filemu  ma le saolotoga o tatou tagata, ou te talitonu foi e misia uma foi e lo’u aiga si o’u uso talu mai lava le aso na maliu ai seia oo mai i le taimi nei,” o le saunoaga lea a Tolfie e fai ai o ia ma sui o lona aiga e auai i le faamanatuina ma le faatauaina o le tautua a Toa o Samoa i le faaiuga o le vaiaso na tea nei.

“Ta fia vaai atu lava isi o’u uso a’o laei mai lona toniga ma auai i polokalame a Toa o Samoa e pei ona i ai lenei po (po o le aso Toonai na te’a nei), ae paga lea ua le o toe vaaia o ia ona o lana tautua sa ofoina atu mo le atunuu ma tagata uma,” o saafiafiaga ia o le susuga Tolfie mo si ona uso ua maliu.

O le susuga a Army Spc. Farao K. Letufuga, o le ulua’i Samoa lea na maliu mai i le taua i Iraq i le aso 5 Aokuso 2003 i le 20 o ona tausaga. O Army Spc. Letufuga na maliu ina ua pau mai o ia mai luga o se fale a’o tautua ai o ia i le aai o Mosul, Iraq.

Na taua e lona tuafafine o Senerita Heather lona misia o ia aemaise lava ina ua toe faamanatu lana tautua faatasi ai ma isi Toa o Samoa i le  sauniga sa faia i le faaiuga o le vaiaso na te’a nei.

“Ou te misia pea si o’u tuagane, ae ou te faafetaia le Atua ona o le faamafanafana mai o lona Agaga Paia, lea ua mafua ai ona maua e i lo matou aiga le loto tele e faafetaia’i ai aso faigata faapenei,” o le saunoaga lea a le tamaitai o Senerita e fai ai o ia ma sui o nai ona tuaa, e uiga i le tautua sa ofoina atu e le susuga Army Spc. Letufuga.

Na faafetaia e i latou nei le pulega a le Samoa News, ona o le avanoa na ofo atu ai e le Samoa News le laulau sa fuafua mo lana pulega, e faaaoga e matua o nai fitafita na maliliu mai i le taua.