Login

Tama’ita’i 4 Susu - Tagatanu’u Amerika Samoa

frostlehualani@yahoo.com

Ua fa’aalia mai se teineititi talavou, 13 tausaga i le taimi nei, sa fanau i Amerika Samoa, peita’i, e ese mai o ia i le to’atele o tamaiti na soifua a’e i lenei atunu’u, ona o ia e ‘fa ona susu!’

E le’i manatu foma’i e faia fua se ta’otoga o lenei alo tama’ita’i i le taimi na soifua ane ai, aua e tatau lava ona tatalia, pe o le a ni fa’ailo e mafai onaalia’i mai i lona soifuaga a’o tuputupu a’e, peita’i, ua malaga atu ona matua i Samoa Tuto’atasi ma avatu ai ma ia, lea la ua toe manatu matua, o le a toe autova’a mai i lona malo, ina ia taumafai e sailia se mea e faia ia te ia, aua ua fetaui tonu ma le vaitaimi na fa’ailoa atu e le foma’i i lona tina, ina ia tatalia pe o le a ni fa’ailo e alia’i mai ai!

Ua va’aia i lona tino mai e tolu ona susu ua tutupu ma ua amata ona popona e pei o nei itutino i taimi uma o le olaga talavou o fanau teine. Ua le mafai lava ona fa’aalia lona suafa, po’o le igoa o ona matua, ina ne’i afaina ai lagona o lenei tama’ita’i talavou, ma solituina ai fo’i nisi ala o le tulafono.

Peita’i, o le fautuaga a le vasega o foma’i sa latou fa’afanauina ma va’aia muamua lenei tama’ita’i i lona fanau mai ma avea ai ma pepe meamea i le tatou atunu’u, sa latou fa’ailoa ai i ona matua, e taoto lea fa’ai’uga i sona taotoga po’o so’o se tasi lava mea e faia ia te ia, se’ia o’o ina va’aia se suiga i ona susu e fa. Ae o le isi lava mea sa fa’ailoa i ai e foma’i, “O le to lenei sa tatau ona lua pepe e te fanaua maia, ae o lea e tasi lava, ma ua le mafai ai ona iloa patino ai e lenei tama’ita’i i nisi o ni ona uiga e alia’i mai i le tele o taimi, e lotoa ma faigata ona taofiofia lona ita, ia lua nofouta i lea tulaga ia te ia!”

Ua mafua ona toe fa’ailoa mai lenei mea, ona ua matua a’e lava le tama’ita’i ma lona faigata, ma ua fa’apea ai se taofi o lenei tina, e sili le toe o mai e tausaili se vaifofo i le olaga o lenei tama’ita’i, a’o le’i faifai pea e ia le tulaga lenei o le ita vave ma le lotoa!

Ona o tulaga nei e le’i mo’omia ai ona lauiloa le fa’aletonu o i ai i le tino o lenei talavou, ua mafua ai ona manatu nai matua, ua tatau loa ona faia se fa’ai’uga a i la’ua ina ia taumafai e toe fa’aleleia lona tino, aua e le o mailoa patino e i la’ua, ai o lagona e ia se fa’alagona maasiasi e afua ai ona tiga vave o ia, ae o’o mai i le taimi nei, e le o iloa tele e nisi lea tulaga, se’i vagana ai si ona aiga.

Ua atoa le 13 tausaga o lenei talavou, peita’i, ua ia natia lenei fo’i fa’aletonu ia te ia, ae o le malosi ia o si ona tino. E i ai le fa’apapalagi o lea ituaiga suiga ua maua ai lenei talavou mai lona fanau mai, ua fa’aigoaina lea o le ‘supanumeri’ ma e le na’o ia ua tupu ai lea mea, ua to’atele isi tama’ita’i ua tutupu mai ma lea ituaiga o suiga i lona tino mai lona soifua mai.

Ua fa’ailoa mai e mafai ona ‘ave’esea  isi ona susu e lua, e le o mea e le’i faia muamua, e tele lava taimi ua faia ai taotoga fa’apea i fafo, ma o lo’o soifua maloloina lelei lava isi sa faia ai taotoga fa’apea. O le isi la lea ala o lo’o ua manatu ai le tina ina ia toe o mai ma si ana tama teine. O le fia faia lava o le taotoga lea e toa ‘ave’esea ai le isi lua o ona susu.

Ua fa’afaigata nei i le tina le toe faia o lea fa’ai’uga, ona ua talanoa atu i si ana tama, ae foliga mai, e le o mana’o ai o ia, ona ua foliga mai e fefe i le taoto o ia ae ave’ese isi ona susu e lua. Peita’i, i le taimi o le talanoaga ma le sui o le nusipepa i Samoa, sa mana’o le tama’ita’i talavou e pu’ea le ata o ona susu e fa, ma toe fa’aalia e ia, e leai e mana’o e faia lona taotoga. Ua fa’ailoa mai fo’i,  ua mae’a ona va’aia e le foma’i Solomona le tama’ita’i lea ma lona fo’i fa’apitoa, ma e le’i fa’ao’o maia se lagona o lea ali’i foma’i, pe mata e mafai ona faia le taotoga i Samoa pe leai.

O le foma’i Solomona lea, sa ia toe fa’amatalaina fo’i mea sa fa’ailoa mai e le foma’i i Amerika Samoa, ae sa ia fa’ailoa mai, e tatau ona faia le taotoga, ae ailoga e mafai ona faia i Samoa ma ituaiga masini o i ai i le falema’i.

O lo ua matauina nei, e tupu le susu i lona itu taumatau, susu uma e lua o i ai, ua popona fa’atasi lelei lava ae o le susu i lalo ane o lona susu masani i le itu tauagavale, e matua le tupu lava, ma ua foliga mai le matasusu o se ila tele.

E ese mai lea tulaga ua fa’ailoa atu, e leai lava se mea o eseese ai si ana tama ma le to’atele o teineiti, e aulelei lava o ia i fofoga o nai ona matua ma lona aiga. Peita’i, e i ai le tulaga e va’aia ma matauina e lona aiga atoa lava, e matele ina vave tele le to’atama’i ma le lotoa o lenei talavou.

E ui ina faigata lea tulaga, ae fiafia si ona tina e una’i si ana tama i le lotu ia a’oa’oina atili lona mafaufau ina ia mafai lava e ia ona taofiofia ma fa’autauta lelei ana amioga e fai, ae maise ia mafai ona taofiofia lona ita oso vave ma fa’aletonu ai ana fa’ai’uga e faia i so’o se taimi e omia ai ona lagona.

Ina ua fesiligia le tama’ita’i e tusa ai o ona totoga fa’aopoopo, ae ua fa’ailoa mai e ia, “Ua ou mana’o e ave’ese le isi susu lea, e tiga tutui i le tele o taimi, ma afai ae fautuaina mai a’u e se foma’i e mafai ona faia se taotoga e ave’esea ai le isi, ou te loto i ai!”

Ua sailia nei e lenei tina ma si ana tama ni alamanuia e mafai ona fesoasoani ia i la’ua mo lea fa’amoemoe, ma afai e te iloa se tasi po’o se auala e fesoasoani ai i lenei tama’ita’i, ona vala’au lea i le numera i Samoa 011-685-775-4520.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.