Login

TUUAIA TOEAINA 93 TAUSAGA FAIA UIGA MATAGA ALUALUTOTO 4 TAUSAGA

ausage@samoanews.com

“O LO’O SILASILA LE ALI’I OU KE LE’I FAIA SE MEA LEAGA FAAPEGA”

Atonu e te’i lau faafofoga i le saoasaoa ua i ai ituaiga mataupu faapenei i luma o le faamasinoga, ae o le vaiaso nei, na tulai ai i luma o le faamasinoga faaitumalo se tama matua e 93 tausaga, ona o tuuaiga i lona faia lea o ni uiga mataga faafeusuaiga i se alualutoto e na o le 4 tausaga le matua.

O moliaga e lima ua tuuaia ai lenei tama matua e aofia ai moliaga mamafa e fa o lona faia o amioaga faasotoma, faia o uiga mataga i fanau laiti, faaoolima mataga, tagofia o itutinosa o se teineititi, atoa ai ma le moliaga mama e tasi o lona faia lea o ni gaioiga e ono lamatia ai le saogalemu o se alualutoto.

O le to’alua ai lea o tama matutua ua tutula’i i luma o le faamasinoga i lenei  vaiaso, ona o tuuaiga lava i le faia o uiga mataga i fanau teine laiti.

O le isi tama e 65 tausaga le matua, o ia foi o le grandfather o le teineititi e 13 tausaga o loo aafia, ma, o loo tuuaia o ia i lona tagofia lea o itutinosa o le teineititi o loo aafia i lenei mataupu.

Ae i le mataupu a le toeaina e 93 tausaga le matua o loo taua ai i faamaumauga a le faamasinoga e faapea, o lenei mataupu na afua mai ina ua taunuu le teineititi i le falemai mo togafitiga, ma faila ai loa le ripoti i le Ofisa o Leoleo i le masina o Fepuari.

O le aso 24 Fepuari na taunuu ai le alualutoto i le potu tigaina a le falema’i mo togafitiga, ina ua maitauina e lona tina le alu o le palapala i lona itutinosa (tulou).

Na taua i se ripoti a le falemai e faapea, e tusa ai ma ripoti mai le aiga o le teineititi, sa pau o ia i luga o se tuugamau ma’a a’o taalo ai i le aso lea, ae i le faaiuga o suesuega a le falemai na manino ai, e le o se manu’a mai se pau o loo  aafia ai lenei alualutoto, ae foliga mai sa faia i ai ni gaioiga e fesootai ma faiga faasolitulafono.

O le faaiuga o le suega sa faia e le fomai, na faamaonia ai le aafia o le itutinosa o lenei alualutoto ma e atagiamai ai se taumafaiga e faia ni uiga mataga ia te ia.

O le aso 28 Fepuari na tuu atu ai i aao o leoleo lenei mataupu ma faagasolo ai loa e le alii leoleo suesue o Det. Poutoa I’amanu Jr suesuega o lenei mataupu.

Ina ua fesiligia le teine o lenei alualutoto e leoleo, sa ia faailoa i ai e faapea, o le taimi na ia faataeleina ai si ana tama sa ia maitauina ai tulaga faaletonu e pei ona maitauina e foma’i, atoa ai ma le augani atu o si ana tama ia te ia i le tiga o lona itutinosa, ma mafua ai loa ona auina atu o ia i le falema’i.

Ae ina ua fesiligia e leoleo le alualutoto na aafia ao i ai ma lona tina, sa ia faailoa ai i leoleo, o lona grandfather, le ua molia na tagofia lona itutinosa.

Na faailoa e lenei alualutoto e faapea, o le aso lea na pau ai i le tuugamau ao taalo ai, o le aso lava lea na tagotago atu ai lona grandfather ia te ia.

Ae ina ua fesiligia e leoleo le ua molia sa ia matua teena uma ai tuuaiga faasaga ia te ia. Na taua e le ua molia i leoleo, o mea ia sa ia faia i aso ua mavae.

Ina ua valaauina le mataupu a lenei tama i luma o le faamasinoga, sa vaaia ai le  tau ta’ita’i atu o ia i le nofoa ua faapitoa mo i latou ua molia, ma lana tootoo e uu i lona lima taumatau.

Seiloga e matua leotele le tamaitai faaliliu upu a le faamasinoga ona faatoa manino lea i le faafofoga a le toeaina o taualumaga o lana mataupu, peitai ina ua faailoa atu i ai e le faamasinoga taualumaga o le faaaoga i le faagasolo ai o lana mataupu, sa faailoa atu ai e le toeaina i le faamasinoga, na te le iloaina le mafuaaga ua ala ai ona avatu o ia i luma o le faamasinoga.

“Ou ke le’i faia se mea leaga faapega, o loo silasila le Akua ou ke le’i faia se mea sese faapega...” o upu ia na saunoa i ai le tama matua ina ua maea lana uluai iloiloga i le aso Tofi na te’a nei, ma poloaina ai loa le taofia o ia i le toese sei vagana ua totogi le $10,000 e tatala ai i tua.

E $25,000 na ulua’i faatulaga e le faamasinoga e totogi ona faatoa mafai lea ona  tatala le ua molia i tua, peitai o lea ua faaitiitia i le $5,000 ina ua talia e le faamasinoga se talosaga fai faatasi a le malo ma le tamaitai loia ia Sharron Rancourt o loo tula’i mo le ua molia.

O poloaiga ua tuuina atu e usitai i ai le ua molia pe afai e mafai ona tatala e aofia ai le faasa lea ona ia taumafai e faafesootai le alualutoto lea o loo aafia i lenei mataupu, poo nisi foi o lona aiga, ae ua poloaina foi e le faamasinoga le aiga o le teineititi ina ia mautinoa e vava mamao nofoaga e nofo ai le teineititi ma le toeaina ua molia.

O le aso Tofi o le vaiaso fou lea ua faatulaga e faia ai le uluai iloiloga o lenei mataupu i luma o le faamasinoga faaitumalo, ma iloilo ai loa e le faamasinoga mau a le malo, pe lava mau e faamaonia ai sa soli se tulafono, ae poo le foi ua molia o loo tuuaia i le soliina o le tulafono.

Afai ae faamaonia e le faamasinoga mau a le malo, ona tuuina atu loa lea o le mataupu a le ua molia i luma o le faamasinoga maualuga e faaauau ai lana iloiloga, poo le faia foi lea o se maliliega ma le malo e faamuta ai lenei mataupu.

O le vaiaso foi na tea nei na tuuaia ai e le malo se tama e 75 tausaga i lona faia lea o ni uiga mataga i lona granddaughter, ma o loo taofia pea i le toese lea tama e faatali ai le isi ana iloiloga lea ua faatulaga i le aso 22 Iuni.

E lua foi isi mataupu faapea o loo tuuaia ai ni tama matutua se toalua i lo la faia lea o uiga mataga i ni tamaitai se toalua.

O loo taofia foi i le toese tama matutua ia e faatali ai a laua iloiloga lea ua toe faatulaga e le malo.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.