Login

FA’AGASOLO TA’ALOGA LAKAPI AUNOA MA SE TALITA

frostlehualani@yahoo.com
O se va’aiga ia Pamata Letuligasenoa Malae ina ua taliu mai ua mae’a taua’aoina lona tusi pasi. [ata: Leua Aiono Frost]

Pamata Letuligasenoa Malae

O le a atoa lava le 65 tausaga o le soifuaga, ua amata ona po’ia le tino i ma’i fita, peita’i, e le moe ai le tagata saili i mea lelei ae maise o fa’amanuiaga a le Atua e ala i le ‘poto ma le atamai.’ O le isi lea peresona o le Atua Silisili e matua sili ona malosi, ma e leai se tasi e soifua e na te le fia maua lea ituaiga o fa’amanuiaga mai lo tatou Tama.

Lea ua loa ona tu’ua le potu a’oga, ina ua amatalia le a’iga, ae ua le mae’a ai le sailiga o le fa’ailoga o le tina i lona avanoa sikolasipi sa ofoina ia te ia, ina ua mae’a lona fa’au’uga i le a’oga mai le Samoana i le vasega fa’ai’uaso o le tausaga 1965.

“O la’u vasega sa matou vasega ai ma Afoa Moega Lutu, lele ua mautu lona fa’amoemoe e fia tauva e avea ma le Kovana o Amerika Samoa. E mulimuli atu le vasega a le ali’i Kovana o i ai nei, Togiola Talalelei Tulafono, ia matou.”

O se tala lea na toe fa’atepa ai e Pamata Letuligasenoa Malae le tusitala i lona vaitau i le a’oga maualuga i le tatou nei malo. O lea ua ia umia nei lona fa’ailoga Associate of Science Degree i mataupu amata fa’aloia Criminal Justice. Ou te fa’afetai ua ou mafaia, ua le motu le fa’amoemoe ona ua fa’atuai ona toe faia le fa’aiuga, ia fa’amae’a se mea e le’i mae’a a’o talavou.

Lona lua o lona manatu, sa ia fa’apea ai, “Aisea e ala ai ona e manatu e le toe mafaia pe a matua le tino? O le tauga lelei lea o le fa’ato’ato’a lelei o mafaufauga o le tagata matua, pe a fuli e fa’apopo lelei a’oa’oga fa’aonapo nei.” 

O le mea na tupu sa muamua lesitala o ia i le tausaga e 2006 ina ua taliu mai ma le aiga e toe fa’atumau i Amerika Samoa nei, peita’i, na sologa lelei le tausaga a’oga e tasi, 2007 ae o’o loa i le 2008, ua feto’i ona o ma’i o le tino. Na alu atu e tau togafitia lona fatu, ae tele isi mea na mapuna a’e ai o le soifua maloloina lava, ma toe fa’atuai ai pea le fa’amoemoe e fa’amae’a le a’oga latou.

E le’i i ai lava se ala fita e le’i uia e le tina, ae sa tamau lona fa’amoemoe, e fa’afouina fo’i lona fiafia e fia maua le atamai ma ia mae’a lava lana vasega na amata, ma ia fa’au’u e pei ona ia savalia ai laumua o le Kolisi Tu’ufa’atasi o Amerika Samoa i le aso ananafi.

O le ma’i fatu na fa’alelei, o le tuli ua mae’a ta’oto, o fofoga fo’i latou ua mae’a faia le taotoga sa mo’omia, ae maise ai lava le ma’i suka e fealua’i solo lava ma tau’ave, tata mai ai ma le toto maualuga, ae le mapu ai le fa’amoemoe lelei.

“Ua malie ia te ia le atamai, ma ua mau le poto i lona mafaufau,” ua moni la’ia upu a le poto o Solomona, ua tasi le mea ua aga’i atu i ai, ua fa’apaleina i le ta’uleleia, ma ua fa’aea fo’i le tina matua i lona olaga tausaili i tomai o le Atua.

O lona toe taotoga lava o le 2009 ona taliu mai loa ua tau le mafai lava ona savali, ae fa’auma lava le a’oa’oga, ave uma lava vasega e 7 e fa’au’u ai i le aso ananfi. E le’i galo ia te ia le fa’afetai tele i le Atua, sa tu’u avanoa ma fa’amanuia i le sailiga mau. Ua ia fa’afetaia faia’oga, sa latou tima’i i aso ta’itasi, ia le fa’avaivai, ae alu pea. Lona aiga, i le tama o Tito Malae, o le fitafita tuai a Amerika Samoa i le Vaega Au o le Army, e le’i mapu i lana lagolagosua, ua tini taunu’u le fa’amoemoe o le tina o le aiga, ua fa’au’u.

Le fanau, ia fa’afetai tausi, fa’afetai fa’aavanoa o outou taimi e fesoasoani ai i le tou tina, lea ua mapu mai ma ua a’e manumalo ona faiva, ua tu’u taimi le Atua i so’o se fa’amoemoe lelei sa ia taumafai i ai.

O ona faia’oga sili ona fa’amama’i i ai le tina o Leupolu ma Dennis, “Fa’afetai le lua tima’i! E ui ina fealua’i le tina i le scooter aua ua faigata le nofoa fa’ata’avalevale, ae ua fai ma ua mafai!”

I lona toe taotoga i le fatu ia Ianuari 2012, na toe fa’anoi lava ole a amata le a’oga, ae ua uma ona lesitala, lele e tasi le vaiaso ae toe sau e fa’aauau le a’oga! Anusa fo’i se loto ina a tele! Peita’i , e talanoa i tatou i le tino, ae silasila le Atua e mafaia e le loto o Pamata ona aulia lona fa’amoemoe lelei lenei.

E moni o lea fa’ato’a mae’a le tusi ASc a Pamata Malae, ae ua so’o le Iunaite Setete ma atunu’u tetele sa tautua ai le tama, o ola ma faigaluega ai e fesoasoani i le tausiga o le aiga. Ona o le tama o le Fitafita Tau a le Army, ua litaea nei, e le’i fa’aletonu fo’i lana tausiga i le tina ma le aiga, mai le amataga se’ia o’o ina toe taliu ane i Hawaii, fai le tausiga mulimuli i le tuagane o si ona tina - Rev. Pita Malae i le CCCAS Moanalua.

E i ai fo’i manuia o na galuega lelei, aua e le’i fa’avaivai fo’i i le auaunaga i le Atua e ala i lena Ekalesia ma o lea ua fa’aauau mai i le CCCAS i Iliili i le Fa’afeagaiga ma le faletua Rev. Hollister ma le Faletua.

O Pamata Malae, o lona tua’a o le afioga le Fa’amasino Iosua Letuligasenoa mai Iliili ma lona tina o Ituala Kuresa -Letuligasenoa. O si a la fanau ua me’a a’oa’oga a nisi ma ua fa’ato’a maua fo’i le fa’ailoga Masters of Education a se tasi o la’ua tama teine i le Co Hort 24 o lenei tausaga ae o isi o lo’o faigaluega i fafo ma i’inei fo’i. E to’atasi si ana tama teine matua ua faia le faiva fita o le tausiga o matua ona e le o toe tutusa fo’i le malosi, ma e mo’omia lava se tasi e to’omaga i ai i le fale i le tele o taimi o le aso.

O nisi o ana galuega sa faigaluega muamua ai Pamata a’o alaala i latou i setete i fafo, na ia maua lava ona o le sogasoga ma le fa’amaoni a’o tautua le tama i le militeri. O nisi o atali’i o Amerika Samoa sa latou tautua fa’atasi i Hawaii o le susuga lea Ietitaia Yandall ma le susuga a Ben Laussen.

I sona lagona fa’aalia e tusa o lenei taumafaiga, “Fa’afetai i le Atua ua ou maua lo’u tusi pasi, ua mafai ona ou fa’amae’a se galuega sa le’i mae’a ona faia! Ae silisili lava, fa’afetai i le tama o le aiga ma le fanau, ae maise o faia’oga sa latou fesoasoani malosi ia te a’u i lenei taumafaiga!”

“Malo le fa’amalosi Pamata Letuligasenoa Malae, ia fa’amanuia fo’i le Atua i nisi lu’iga o le soifuaga e toe alofaiva i ai i le lumana’i.”



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.