Login

FA’AGASOLO TA’ALOGA LAKAPI AUNOA MA SE TALITA

ausage@samoanews.com

Tomumu nisi o sui o kalapu a le Iuni Lakapi a le atunuu ma faamatala le tulaga faaletonu o loo feagai ma le latou kalapu i le taimi nei, i le faagasolo ai lea o le liki taitoa 15 a le Iuni i le taimi nei e aunoa ma se talita, e ui o le taaloga mulimuli i aso Toonai uma lava e faai’u lava i le taaloga o le talita.

O le vaiaso nei la na faamanino ai loa e le Failautusi o le Iuni Lakapi a Amerika Samoa (ASRU) le mataupu o loo gugulu ai nisi o kalapu, i le faagasolo lea o le taamilosaga mo le fa lenei o vaiaso e aunoa ma se talita o i ai, ae o lea lava o loo faagasolo taaloga o le talita i aso Toona’i uma lava.

O lea mataupu na alia’e mai i le masina na te’a nei, ina ua tatala aloaia le taamilosag ta’ito’a 15 a le Iuni ma manino mai ai le tulaga o le talita o loo faagasolo ai taaloga, i le leai lea o se tino o le talita o avatu i taimi o taaloga, sei vagana ai lava le igoa ‘talita’ o loo ta’u ma faalogoina i soo se taimi e faia ai taaloga o le talita.

E le gata la i sui o nisi o kalapu lakapi i le atunuu na valaau mai i le Samoa News i le fia malamalama i lenei mataupu, ae oo lava foi i le mamalu o le atunuu o loo autovaa atu e maimoa i taaloga lakapi i faaiuga o vaiaso, sa valaau mai foi ma fesili mai i lo latou fia iloaina lea o le mataupu i le talita, ma le mafuaaga ua leai ai se talita e faatino ai taaloga lakapi a le Iuni.

O le faasea na alia’e mai i le taaloga a Avele ma Fagatogo i le lua vaiaso talu ai i le talita, lea na se’i ai e Fagatogo le talita mai ia Avele, peitai ina ua maea se iloiloga sa faia e le Komiti e uiga i se faasea faasaga ia Fagatogo, na toe liliu ai le faaiuga a le Iuni ma toe tuuina atu

“O fea ni taaloga e fai ae leai se talita, faatoa ou tau foi leai se Iuni lakapi ua faagasolo se taamilosaga o se talita ae leai se talita o i ai,” o  le faasea lea a se tasi o tama na valaau atu i le Samoa News.

Na taua e se tasi o alii taalo lakapi na valaau mai foi i le Samoa News e faapea, e na o le igoa lava o le talita lea e faalogo ai au uma o loo ta’u ae leai se tino o latou vaaia i taimi o taaloga.

Na faamaonia mai e le Failautusi o le Iuni lakapi i le Samoa News e faapea, e le o  i ai se talita a le Iuni o loo faaaoga i le taimi nei, ae ua toeitiiti lava maea ona fau le talita fou a le Iuni.

“E leai se talita o i ai i le taimi nei, ae o le mea moni, o loo fau le talita fou i le taimi nei ma le faamoemoe, atonu o se taimi o le vaiaso nei e tatau ona mae’a ai, ona tuuina atu loa lea e faagasolo ai taamilosaga a le Iuni,” o le saunoaga lea a Falefata Moli Lemana, le failautusi a le Iuni Lakapi.

O le au a Avele na mau ai le talita a le Iuni ina ua maea le taamilosaga o le tausaga na te’a nei. O lea faaiuga na faia ina ua faaleaoga le manumalo a le au a Nuuuli i le la taaloga ma Avele, e mafua mai ina ua fasi e nisi o le au a Nuuuli le alii laufali sa faafoeina le taaloga.

O lea vevesi na i’u ina tofu atu ai le mataupu i luma o le faamasinoga, ma faia ai loa le faaiuga a le Iuni e see le manumalo ia Avele e ui na faia le faaiuga a le alii kovana, o le taitaifono foi lea o le Iuni Lakapi i le tausaga na te’a nei, e le toe manaomia e le Iuni le talita lea na vevesi ai, ae o le a toe fau e le Iuni se isi talita fou.

“E faamalulu atu i le atunuu aemaise ai nisi o loo fia malamalama i lenei mataupu, ae o le tulaga lava ia o le talita ma le mataupu i kalapu lakapi, o le a toe faamanino atili atu nisi o mataupu nei i nisi o fonotaga o loo mulimuli mai a le Iuni,” o le saunoaga lea a Lemana.

O loo faaauau pea ona umia e le kalapu a Avele le talita a le Iuni i le taimi nei, talu ona amata mai le taamilosaga taitoa 15 i le masina na te’a nei.

Na taua e se tasi o alii sa avea foi ma tagata taalo i lenei taaloga i aso ua mavae, afai o lea ua laa Amerika Samoa i le isi laasaga e pei ona talia ai e le IRB le talosaga ma ua avea nei  ma totino tumau a le IRB, o lona uiga o isi nei vaega e ao i le Iuni ona silasila mamao i ai, ina ia atagia mai ai le agai pea lea i luga o le atina’eina o le taaloga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.