Login

“Manu fa’aifo mai Lagi”

frostlehualani@yahoo.com
O se va’aiga i sui o le Ofisa o Tupuola Kalolo Iosefo sa auai atu i lon ulua’i sauniga ma sa latou molimauina fo’i lona tagata i le galuega. [ata: Leua Aiono Frost]

Tupuola Kalevu Kalolo Iosefo

 Ua lagia le lotoifale sa tafili saunoa ai lana auauna e tausi mea lelei, fai mea lelei mo lana ekalesia, ae tainane si ona aiga, sa fa’amama’i i lana auaunaga e le fa’atafatafa pe faifa’apa’ole, ae mauta fai ona o lona talitonuga, o lona lea avanoa e faia ai le mea sili mo le Atua.

Lele ua to’ai taunu’u mai o ma o, aua ua logo le nai ama ua logo fo’i le nai atea, ua lagona le leo o Rama i le Aiga, ae amia i latou sa avea ma poutu i so’o se mea e fa’atino a aiga, “ aue! ua tu i tatou i le E!”

O molimau na fa’afofogaina e le to’atele i le po o le ulua’i sauniga o le afioga le Taitaifono a le Ekalesia Katoliko i Fatuoaiga, na iloga ai, e le tau sulaina le toga lelei, e soifua lava ia ma tusia ai lona tala’aga.

O fasaga a lona aiga e momomo ai le loto, aua ua iloga mai, sa maualuga lana matati’a i lana auaunaga i le pa’ia o Aiga, e le’i fa’atua’oia fo’i lana foa’i i so’o se Auauna a le Atua i lana Fatafaitaulaga fa’atasi ai ma isi i so’o se afioaga e feagaa’i i ai lana afioga. O le tagata lava sa ia le taofia na’o ia manuia o le Atua sa ia maua, ae sa ia fa’asoa ma tufa atu!

Tau ina ia pa’u se Toa ae toe tu mai se Toa!

O le pa’ia fo’i o le Ofisa o A’oga i lana itu sa Tautua ai, lea e toe fa’aa’e mai ai le Gagana Samoa i soifuaga ma’ale’ale o le fanau, ua loa e le o toe va’ai  pe ola i le olaga moni fa’asamoa! Talofa, e le’i fa’avaivai, ae sa ia faia le mea e gata ai lona tomai, malosi ma le tautua ina ia toe fafaga fanau a Samoa i lana upu o le gagana!

O le molimau sa saunoa i ai le tama sa la’ua tautaia lua lo la’ua sa i le galuega, ae maise le la’ua fanau e to’a fitu lea e fa’auluulu i ai a’oa’oga fa’asamoa a le Matagaluega o A’oga.  Oka o se galuega lelei sa ia faia, e le’i fa’ataga faia ae ua sunu’i le pogati tonu o loto ma finagalo o faia’oga i potu a’oga, ina ia le toe fa’atalale i le a’oa’oina o fanau ia tautala ma tusitusi ae maise o le mafai ona fa’aleo lagona i le Gagana Samoa.

Itiloa a tu’u i ai e le ta’ita’i o le Matagaluega o A’oga lea faiva, o se tama lava ina galue malosi, e le alo fo’i i le fa’ailo o le mea sa’o ma le fa’ata’otoga o le alafua e fa’atino ai le a’oa’oina o le gagana samoa i le fanau, ae ia maua’a fo’i i loto o faia’oga, le latou faiva ia fa’atino ma i’u lelei, ia popoto fanau a Amerika Samoa i le Gagana Samoa ma tusitusi ai!

I le molimau mai le Mafutaga a Sagato Iosefo ma le Malisi i Amerika Samoa, “O ia lava o se tasi o poutu toa o lea fa’amoemoe.” O se tala amata lea a le susuga Ao Manupo Turituri, o se uo mamae fo’i a Tupuola Kalolo.

“I so’o se mea e fa’aluaina e Tupuola o ana tusaga uma, ina ia mautinoa e ia ua lava ma totoe! E tima’i i le fealofani o sui totino uma o le mafutaga. E le tu’u e ia se mea e fa’alagolago e faia e nisi sui, ae sau ma si ana fanau e fa’atino uma mea e ao ina faia, e le fa’ava’ava’ai vale i isi pe o a ni mea o fai!”

“Talofa, le Mafutaga e, ia ola pea Tupuola i o tatou agaga pe afai tatou te tutumau i lea manulauti, o le fealofani ma le le faia se mea ma le feva’ava’aia’i.”

I le molimau a faia’oga sa latou galulue a’o avea Tupuola Kalolo ma latou pule i Midkiff Elementary i Leone, sa latou misia o ia, ma o ona uiga e tausi tagata e le ai’u ae matamau i so’o se mea e mo’omia e i latou, e pei o mea’ai, le fia o atu ae leai se ta’avale, o mea na e mafai uma e le latou tama ona fai. Ua latou tusia ai se solo e momoli ai o latou alofa’aga ia te ia, ae fa’amaise ai i le tina loto fa’avauvau ma le fanau: Makerita Iosefo ia loto tele ma ia tumau pea i le fa’atuatua e alofagia oe ma le fanau e le Atua.

Alofa’aga mo Tupuola Kalolo Iosefo

Ua fa’ai’ui’u le vaitau o le totogo a’e o la’au,

A ua tatou savalia nei taimi oe mafanafana o le tau.

Peita’i, o se asoa auro sa ula ua motu ma ua salalau,

Ua tau fa’aletonu ai nei lo ta mafaufau.

 

O le afioga Tupuola o se toa ua aoga i le atunu’u,

Ua le gata i lea o le Ekalesia, o aiga ma nu’u.

Talofa i au’upega sa fa’aaoga i le taua,

Ua tafea nei i le aupeau e le toe maua.

O nai ona uiga tausa’afia i le va ma tagata,

Afai atu i ai ulaga, ae tali lava i le ata.

E usu atu lava i aso uma i le galuega ma si ana tama’i solo afu,

E ula ai lava faiaa’oga, “E o le tama fai solosolo lale alu atu.”

 

O se tama e fautua alofa i le galuega’

Ina ia lava tapena ma sauniuni le aufaigaluega.

A i ai la se mea e atugalu ai si ona mafaufau,

E masua mai lava e pei o la e ote i lana fanau.

 

O se tasi nei o fetu pupula a le Ofisa o A’oga,

Na sulugia ai fanau i tausaga ua sola.

Le ua fa’amanavaina ana galuega e le Atua,

Talofa i le tautai matapalapala ua afu le tautua.

 

O nisi nei o fa’amatalaga e manatua ai pea Tupuola,

Sole, A leai ni tupe a le DOE e totogi ai oe,

E totogi mai e le Atua lou fa’amoemoe!

O si ana tala masani fo’i e fai ae le’i oti,

Aua tou te le fia o i Seoli.

 

Tupuola, o le a le galo oe le Tama,

O au uo masani i le galuega.

Ia manuia tele lau faigamalaga,

Alofa Le Atua fa’aavanoa sou nofoaga.

 

Fa’amaise le Atua i le tina Makerita  ma le fanau. Ia outou loto tetele  ae ia manuia lau malaga Tupuola Kalolo Kalevu Iosefo.

O le molimau a lona uso moni, ae ua avea ma Fesoasoani Pope i le nu’u o Iva, Fa’asalele’aga, sa ia fa’ailoa ai lona uso, “o se tasi e fa’asoa na’ua, ae le misi fo’i, o i ai ona vaivaiga!”

Na ia fa’ailoa o le suafa Tupuola o lona igoa ipu o “Manu fa’aifo mai Lagi,” ma ua agatonu lea ma le soifua fai uso, tausi aiga, alofa ma e le fa’atua’oia lana fa’asoa! O se tasi e fa’amoemoe tasi i ai le matou aiga, aua ua fa’aifo i ai manu mai lagi, i lona loto foa’i ma le a’ao mafola i so’o se tasi, ae maise ai o Auauna a le Atua i taimi uma.

Le aua ala ai ona fa’apea se upu a le ta’ita’i o le sauniga, ua ola lava Tupuola i le uiga o lona igoa ipu, ma ua tuli’ausolo ai le Ipu a le Tamaloa mai Si’umu. Fa’afetai i le Atua mo lana meaalofa, ae fa’afetai o lo’o ua toto i lona aiga ma lana fanau se agaga, e tulimata’ia manuia o le tama.

Ina ua mae’a le sauniga sa tutula’i se tasi o le fanau, ma ua iloga ai, e moni lava, e le o vale tu’ulima meaalofa a le Atua i le tina ma le fanau ua totoe nei ma aiga!

O le fatu sa ia totoina i loto ma agaga o faia’oga, sa le misia e Kalolo ona ia mua’i totonu i loto o lana fanau, ia mausali lona fa’amoemoe, e soloa’i i latou i galuega lelei mai le Atua, ma ia le motusia le falaoa i le kate po’o le u’u i lona fagu.

“Ia fa’amaise le Atua  le tina loto fa’avauvau ma le fanau loto momomo ona o le mafutaga motusi i le alofa ma le fa’amaoni i totonu o le li’o o si ona aiga!”



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.