Login

128 Fa’au’u mai le Kolisi Tu’ufa’atasi

frostlehualani@yahoo.com

O le fa’au’uga ese lenei ua alofaiva i ai le Kolisi Tu’ufa’atasi, aua ua i ai nei le vasega fa’au’u ua atoa le 4 tausaga o a’oa’oina i le Kolisi ma ua taua’aoina i ai o la’ua fa’ailoga BEd in Elementary Education. O i la’ua nei ua fa’atinoina le miti sa umi se taimi o afuafu mai, talu mai le amataga o le nofoa’iga a Kovana Tauese ma Lt. Kovana Togiola Tulafono.

O le fa’afetai, ona ua o’o mai i le si’ui o le nofoa’iga a le afioga Kovana Togiola Tulafono ae ua tino lea miti, ma ua fa’amanuia fo’i le Atua i le taumafaiga sa fau ao fau po i ta’ita’i o le atunu’u, ae maise o le Komiti Fa’afoe o A’oa’oga Maualuluga i le Teritori o Amerika Samoa.

O nei sui e to’alua o faia’oga i la’ua, ma o le faia’oga mai Fitiuta Manu’a Selutoga Me’i Fuiava ma le faia’oga tina mai Aua Elementary o Tasia Misipati Luafalealo Kurene Talamoni.

E to’atasi fo’i le sui na savali i lenei fa’au’uga sa taua’ao i ai lona fa’ailoga Masters of Art in Forensic Psychology, o ia lea o Paulia Journey Pa’o -Pelenato ma le isi Masters of Science in Non Profit Management na taua’aoina lea ia June Fa’amalieloto Paogofie Sitala Tagomailelagi.

O le isi to’a 124 o i latou sa taua’aoina i ai fa’ailoga o le Associate of Arts ma Associates of Science Degrees i a latou kosi eseese na tau’avea i le kolisi i lenei tausaga a’oga ua mae’a lelei ai.

I le sauniga o le fa’au’uga sa mua’i tula’i ai le fa’afeagaiga Rev. Elder Elia Titimaea Ta’ase mo le tatalo amata, ina ua mae’a le saunoaga fa’afeiloa’i a le susuga le Sui Peresetene  Mikaele Etuale, ma sisiina fo’i tagavai a le malo tele ma le tatou malo ina ia aloaia le amataga o le fa’au’uga lona 56 lenei o le tatou Kolisi.

O le tofa Uta Tagoilelagi, o le Taitaifono o le Komiti fa’afoe o A’oa’oga Maualuluga a le tatou malo, sa ia fa’afeiloa’ia le aofia, ae maise o lona fa’alauiloa o le sui ua filifilia e le vasega fa’ai’uaso o lenei tausaga, e tima’ia le latou folauga ta’ito’atasi o le a alofaiva i ai e afua i le aso ananafi.

O ia lea o le afioga le Kovana o Amerika Samoa, Hon. Togiola Tulafono. O se fe’au taua sa ia fa’anofo i finagalo o le au fa’au’u, aua ua ia fa’ailo ai se paso ma ona vaega ta’itasi, pe mata ua e mafaia ona tu’ufa’atasia, ua maua ai le atoaga o le ata a’o e savali atu aga’i i le lumana’i?

Sa ia fa’amanino atili fo’i i le fanau, “E i ai le tatou sao fa’atupulaga e ao ina mautinoa ua faia, ae a tupulaga o le a soloa’i mai o Amerika Samoa. E ao ina mautinoa e le tou tupulaga, ua faia lou tou lea sao ae le’i uma la outou folauga.”

Le Sa lena o le tatou malo, e fa’amoemoe i ana augatupulaga ia so’o le fau ma le fau, ia le motusia le ula, ia soloa’i mai tupulaga o fai mai, ae o lo’o tatou tufa atu pea manuia mo i latou, e le tatau ona tatou manatu, na’o i tatou e mauaina manuia.

O lana fa’afetai fo’i aua ua tino se fa’alepo a le Kolisi, le Komiti fa’afoe o a’oa’oga maualuluga, ae maise o ta’ita’i o le Malo, ina ia mafai lava e le tatou Kolisi ona a’oa’oina fanau ma maua mai ai tusi pasi e aoga e saili ai galuega i fafo ma i’inei e o tatou tama fanau.

O se fe’au aoga, ma e tatau ona fa’aaoga e le tupulaga lea ua fa’au’u mai nei tima’iga aoga, ia le motusia manuia mo tagata uma o le atunu’u, ona ua vale tu’ulima le tiute fai o lenei augatupulaga.

O pese ma vi’iga o le sauniga atoa, sa fofogaina lea e le Aufaipese fa’apitoa a le Kolisi, ma sa fa’afetaia fo’i e nisi o failauga fa’apitoa o lea aso, lea sao matagofie ua maualuga ai le fa’amoemoe o le vasega fa’ai’uaso.

Ina ua mae’a taua’aoina fa’ailoga ma tusi pasi, sa tutula’i le susuga le Taitaifono o le Komiti Fa’afoe o A’oa’oga Maualuluga Uta Tagoilelagi ma talia uma i latou ua taua’aoina o latou tusi pasi, aua o le Kolisi ua mae’a pasia e i latou le asiasiga fa’apitoa a le komiti o Kolisi ma Iunivesite i le itu i sisifo o le Malo tele.

Na toe tula’i fo’i o ia e talia le to’alua ma o la’ua fa’ailoga Bachelors of Education in Elementary Education ua atoa lelei le ta’i 4 o tausaga o a’oa’oina i le Kolisi Tu’ufa’atasi, ma ua avea ai i la’ua nei o le amataga lea o fa’alauteleina o a’oa’oga a le fanau i le Kolisi i Mapusaga.

O Sikolasipi na ofoina mai e le McDonalds sa taua’aoina lea i le tama’ita’i sa sili lava ona togi i le vasega ma ua avea o ia ma Summa Cum Laude e 3.98 lana GPA, o Teuilafestival Lemisio. O le tama’ita’i fo’i sa avea ma Magna Cum Laude o ia lea o Rosseanne Denise Felise e 3.89 lana GPA.

Peita’i o le to’atele sa avea ma sui totino o le Phi Pheta Kappa e amata mai latou GPA i le 3.50 i le 3.74 e to’a 22 i latou.

Mai sikolasipi a le Malo sa maua ai le to’afitu fa’ailoga Sikolasipi e ta’i 2 tausaga e a’oa’oina ai i se Univesite i fafo atu ma le atunu’u ma sa maua lea e Roseanne Felise, Donna Maifala, Toetu Peau, Miracle Sene, Angel Vaimauga, Caleb Scanlan ma Saipele Tofiga.

I le vaega o Nogatupe e fesoasoani mai le Ofisa o Sikolasipi mo le totogia o a’oga a le fanau e to’a 19 le aofai o fanau sa latou mauaina lea avanoa.

Teuilafestival Lemisio, Elaine Tago, Kristina Vailolo, Tautino Passi, Eric Roe, Metotagivale Meredith, So’onafai Lagai, Josephine Afoa, Anetelea Lalotoa, Afeafeaupitoaluga Filemoni, Victoria Fano, Queeniemary Otemai, Evette Pua’auli, Liliatupu Asotau, Amy Rebelukag, Kristine Jamison, Josephine Tupua, Norlene Afalava ma Leeandra Hala.

O le tatalo mulimuli ma nisi toe fa’amalosi’au mai le Tusi Paia na saunoa i ai le susuga le Fa’afeagaiga Rev. Dr Elia Titimaea Ta’ase ma fa’amae’a ai le fa’amoemoe o le fanau fa’au’u ma le pa’ia maualuga i Aiga, uo ma e masani fa’apea le auvala’aulia mamalu sa fa’atasia i le Fale Ta’alo o le Kolisi Tu’ufa’atasi i le aso ananafi.

[Va’ai le lomiga o le Samoa News i le Aso Gafua o le a fa’asalalauina atu ai le tala o fa’ailoga na maua e le fanau.]



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.