Login

Talia e le IRB le talosaga a Amerika Samoa

ausage@samoanews.com

E ui e le’i tuuina mai se tusitusiga aloaia mai le Faalapotopotoga o Taaloga Lakapi a le lalolagi, le IRB e faamaonia mai ai lana faaiuga e tusa ai o le talosaga a Amerika Samoa, peitai ua faamaonia mai e le Peresetene o le Iuni ma nisi o sui o lana taupulega le taliaina lea o le talosaga sa tuu atu a Amerika Samoa, e avea ai o ia ma totino tumau a le IRB.

“O se lagona fiafia ma le faagaeetia ina ua talia aloaia le talosaga sa taumafai atu i ai le Iuni Lakapi a Amerika Samoa (ASRU), aemaise ai le taitaifono, le afioga i le kovana sili ia Togiola Tulafono, aemaise ai i latou uma sa gapatia i le taumafaiga o lenei faamoemoe, e le faigofie,” o le saunoaga lea mai le alii peresetene o le ASRU, le afioga Te’o J. Fuavai, lea ua silia ma le 42 tausaga o auai i le faagaioiga o le taaloga lakapi i Amerika Samoa.

Saunoa Te’o, ina ua ia maua le tala e faatatau i le taliaina lea e le IRB o le talosaga a Amerika Samoa, sa maligi ona loimata ma ia faafetai i le Atua, ina ua ia tatala mai le isi faamalama i le atina’eina o le lakapi i Amerika Samoa.

“E le mo le ASRU poo se tagata se toatasi, ae mo tupulaga lalovaoa a Amerika Samoa ma tagata uma o Amerika Samoa,” o le saunoaga lea a Te’o.

O le fonotaga i le aso ananafi a le IRB i Aialani (Ireland) na faia ai lea faaiuga, i le maea ai lea ona tuuina atu o le talosaga a Amerika Samoa i le masina o Oketopa 2011.

E lei maua mai se pepa o faamatalaga mai le ofisa o le alii kovana, o ia foi lea o le taitaifono o le Iuni Lakapi a le atunuu e tusa ai o lenei tulaga maualuga ua ausia, peitai i se faatalatalanoaga male Failautusi o le Iuni ia Falefata Moli Lemana, sa ia faamaonia mai ai foi le tulaga lava lea e tasi.

Saunoa Falefata, o se imeli na tuuina mai i le afioga ia Lefau Tauiliili Harry Schuster ia te ia ma le kovana, sa faamaonia mai ai lenei tala fiafia mo Amerika Samoa.

“O le taimi lava na ou mauaina ai le imeli mai ia Harry, na ou le iloa le ituaiga lagona na oo ia te ia ona o lenei tala fiafia, ma e ui e lei tuuina mai se tusi aloaia mai le IRB e faamaonia mai ai la latou faaiuga, ae o lea ua momoli mai e le Harry le tulaga sa i ai le fono ananafi (aso Lua na te’a nei),” o le saunoaga lea a Falefata.

Na faafetaia foi e le afioga Te’o le afioga ia Lefau ma le Iuni Lakapi a Samoa, i lo latou unaia malosi o lenei faamoemoe, ina ia mafai ona laina tutusa Samoa e lua i le tulaga maualuga ua i ai le taaloga i le lalolagi.

O le 2005 na avea ai Amerika Samoa ma totino le tumau a le IRB, ae avea ai ma totino tumau a le Faalapotopotoga o taaloga Lakapi i le Pasefika (FORU), lea ua toe filifilia i ai le afioga ia Lefau e avea ma Peresetene mo le isi 4 tausaga.

O le afioga i le alii faipule ia Lefau, o ia foi lea o le sui o Samoa i totonu o le IRB, lea foi e pei ona avea ai o ia ma totino a se tasi o komiti a le IRB.

I lana malaga maii Amerika Samoa i le vaiaso o le sisigafu’a, sa ia taua ai lona faanaunauga o loo i ai, e fia vaai i se au fili a Amerika Samoa i taamilosaga taitoa  7 a le IRB o loo faagasolo, e manao foi ina ia avea Amerika Samoa ma totino tumau o le IRB.

I se tasi o fonotaga a le Iuni lakapi a le atunuu ao lumanai le taamilosaga taitoa 7 o le fu’a na mavae atu nei, na faalauiloa ai e le alii kovana ia Togiola Tulafono lona faanaunauga o loo i ai, ina ia talia e le IRB le talosaga a Amerika Samoa.

O nisi foi o ana polokalame i faaiuga o vaiaso, e talanoa mai ai le alii kovana i le tulaga  o le atina’eina o le lakapi i le atunuu, aemaise  ai totonu o aoga e pei ona i ai le taamilosaga taitoa 7 a tama ma teine o aoga maualuluga, lea ua faamoemoe e tatala i le aso Faraile o le vaiaso nei ma le aso Toonai.

(Read English version of this story in today’s Sports section)



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.