Login

Tala o Faamasinoga

ausage@samoanews.com

SIAMUPENI LEFAOSEU

O le alii talavou lea na ia faaaogaina se agaese e faaoo ai ni manu’a i se isi alii, ona o le fasiga ona o le fasiga o lona uso la’ititi, ua manatu le faamasinoga o le a le toe i ai se isi faasalaga faafalepuipui e tuuina atu ia te ia, ae ua lava le umi lea sa loka ai o iai le toese ao faagasolo lana mataupu e avea ma ona faasalaga.

O le alii o Siamupeni Lefaoseu lea na uluai tuuaia e le malo i le moliaga mamafa o le faaoolima i le tulaga muamua, ua tausalaina nei i le moliaga feololo ane ai o le faaoolima i le tulaga lua, i lalo o se maliliega sa ia sainia ma le malo ma talia e le faamasinoga.

Ao lei tuuina mai le faasalaga a le faamasinoga maualuga i le vaiaso na tea nei faasaga ia Lefaoseu, na maua le avanoa e faafofoga ai le faamasinoga i faafinauga a loia, o le faatoesega a le alii ua molia, atoa ai ma le molimau a le alii na aafia.

I nei faamatalaga uma na tuuina atu i le faamasinoga, na taua ai e le alii faamasino sili ia Michael Kruse le faamalieina o le faamasinoga i tulaga uma na uia e le ua molia ma lona aiga, e pei ona molimauina e le faamasinoga.

O nisi o ia tulaga e aofia ai le ifoga na tapena e le aiga o Lefaoseu, o le faaleleia a aiga e lua, o le latou totogiina lea o le pili o le falemai mo le alii na aafia, aemaise ai le faasalaga a le nuu sa faia lea foi ua maea ona faatinoina.

Saunoa Kruse, o se tasi o itu taua ua maitauina e le faamasinoga i lenei mataupu, o le tutu faatasi lea o aiga i le faaiuga o le faalavelave na tulai mai, ma o se ata manino lea e ta’u atu ai i le faamasinoga le lava tapena o le ua molia ma lona aiga mo lenei mataupu.

Na fa’afofoga foi le fa’amasinoga i le molimau a le ali’i na a’afia, lea na ia fa’ailoa ai i le fa’amasinoga le mae’a lea ona toe teuteu o le fa’alavelave na tula’i mai, ma ua ia fa’amagalo fo’i i le alii o Siamupeni e tusa ai o se feeseeseaiga na tula’i mai i lo la va.

I le mae’a ai la ona iloiloina e le fa’amasinoga o fa’afinauga uma e uiga i lenei mataupu, na faia ai loa le faaiuga, o le a fa’anofova’ava’aia o ia mo le 3 tausaga, ae ua lava le umi lea ua maea ona ia tulina i le toese e fai ma ona fa’asalaga i lenei mataupu.

O nisi o tu’utu’uga o le fa’anofova’ava’aia a le alii ua molia e aofia ai le faasa lea ona ia toe soli se tulafono, a ia auai i ni a’oa’oga fa’a faufautua e fesoasoani ai i le tulaga o le ita, ua poloaina foi o ia ina ia asiasi i le Ofisa Faanofovaavaai i masina taitasi, mo le mataituina o lana faanofovaavaaia.

(English version of this story appear in “Court Report” in today’s issue.)

ARTHUR ‘AFA’ BLAKE

O le aso 15 Iuni lea ua faatulaga e lau ai le faasalaga a le alii o Arthur ‘Afa’ Blake i luma o le faamasinoga maualuga, ina ua faamaonia e le faamasinoga le moliaga o le faaoolima  i le tulaga lua faasaga ia te ia, i lalo o se maliliega na sainia e le ua molia ma le malo, lea foi na talia e le faamasinoga i le taeao ananafi.

I le tali ioe ai o le alii o Blake i le moliaga muamua lea ua toe teuteu e le malo, sa ia tautino ai e faapea, i se taimi o le aso 25 Tesema 2010, sa ia taumafai ai e faaoo ni manu’a i le alii o Keti Lisala, e ala i lona tuliina o ia i se agaese ma le faamoemoe na te taina ai o ia.

Ina ua talia e  le faamasinoga le tali ioe a Blake, na solofua ai loa isi moliaga e lua sa totoe ai, lea e aofia ai le taumafai e fasioti se tagata ma le faatupu vevesi i nofoaga faitele.

O le faalavelave na tupu na alia’e mai i le taimi ao faia se taaloga volipolo o le  kerisimasi, ae faafuasei ona agai atu Blake ma se agaese ma tuli ai le alii na aafia.

Ua malilie loia o le a faatali le tuuina atu o ni a laua faafinauga sei maea ona la faitau i le ripoti a le Ofisa Faanofovaavaaia, peitai ua malamalama Blake, tusa lava pe talosaga loia i le faamasinoga mo se faasalaga mama mo ia, e pule le faamasinoga pe talia pe teena.

Ua ia iloa foi, e le mafai ona toe  suia lana tali ioe ua tuuina atu i le faamasinoga pe afai e tuuina mai se faasalaga a le faamasinoga ae le tusa ai ma lona manao.

O loo  taofia pea Blake i le toese e faatali ai le aso lea ua faatulaga e lau ai lona faasalaga.

(English version of this story appear in “Court Report” in today’s issue.)



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.