Login

TOE LAGONA FO'I MUIMUI ATUNU’U I PILI FALEMA’I

ausage@samoanews.com

O lea fo'i ua toe saputu mai le tele o fa'asea mai le atunu'u fa'asaga i le falema'i o le LBJ, ina ua fa'alauiloa e le pulega a le falema'i a latou si'itaga fou i totogi o ni isi o ana tautua, lea ua fa'amoemoe e amata fa'amamalu i le aso 21 Me.

O ni isi o ia fa'asea sa tu'u sa’o atu e le atunu'u i le ali'i kovana, e fa'atatau i le fa'aletonu o le tautua a le falema'i o lo o tu'uina atu i le atunu'u, ae maise lava i le Fale Talavai.

O se tama matua pe a ma le 60 tausaga ma ona tupu le matua, na vala'au atu i le polokalama a le ali'i kovana ma fa'aleo atu lona le fiafia, i le fiu lea e fa'atali le taimi e piki ai lana vaila'au ina ua alu atu e talosaga mo le toe fa'atumuina.,

O le isi to'oto'o na fa'asea umi o le taimi e fa'atali ai le taimi e va'ai le foma'i, ae maise lava  pe afai o se gasegase tigaina o lo o vave mana'omia se togafitiga, ae o le isi tina talavou na fa'asea i le  polokalama fou lea ua mamafa ai si'itaga i tagata mai fafo ae sa tatau ona laugatasia tagata uma e aga'i atu e va'ai le foma'i mo pili e totogi.

Na taua e le tama matua na valaau atu i lana talavai, sa na o le tasi lava le itula e faatali ai le toe faatumuina o fagu fualaau a tagata matutua e aofia ai ma ia ae toe piki, peitai o le suiga fou lea ua faia nei, e tolu itula e faatalitali ai le tagata matua faatoa toe piki lana fagu fualaau.

Na ta'ua e le tama lea i lana fa'asea e fa'apea, e foliga mai o lo o aga'i lava i luga totogi o pili a le falema'i, ma fa'afuase'i atu ai lava ona sui ma ana faiga e tautua ai le atunu'u, ae sili ai le matuia, e le o i ai se avanoa e maua ai e tagata matutua se fesoasoani.

“E fa'apefea oga ou fa'akali i legei kolu ikula e mamao i kua le mea ou ke sau ai, ou ke koe fia vave alu i le aiga, ou ke le lava fo'i gofogofo umi i legei kolu ikula e fa'akalikali legei fagu vaila'au,” o le fa'asea lea a le tama lea.

Na ta'ua e le tama matua lea i le ali'i kovana, na umi se taimi o la finau ma se tama'ita'i o le Fale Talavai e uiga i lana fagu fuala'au, ma i’u ai lava ina toe alu i le fale e le i fa'atumuina lana fagu fuala'au, e ui o lo o matua mana'omia e ia fuala'au ia.

O isi to'oto'o e lua ia fo'i na fa'aleo a la'ua fa'asea fa'asaga i le falema'i, na fautuaina e le ali'i kovana i la'ua ina ia fa'afeso'ota'i atu lona ofisa i le aso Gafua na te’a nei, mo le toe fa'apupulaina atili o a la'ua fa'asea, ina ia mafai ai ona tau sa'ili se auala e fesoasoani atu ai lona ofisa ia te i la'ua.

“Afai fo'i e silafia e le atunu'u ni fa'aletonu o lo o matauina i le tautua a le LBJ pe a outou aga'i atu i ai, po o ni isi lava fo'i Ofisa o le malo, ou te fautuaina le atunu'u ina ia tusi sau tusi ma avatu i lo’u ofisa, fa'ailoa atu i ai lou suafa, o le numera o lau telefoni fa'atasi ai ma le nu'u e alala ai, ona fa'amatala atu lea i lalo ma le mafua'aga o lau fa'asea, ina ia mafai  ai ona maua se auala matou te su'esu'eina ai fa'aletonu e pei ona ta'ua,” o le fautuaga fa'alauaitele lea a le kovana ina ua tele fa'asea ua tu'uina atu fa'asaga i le falema'i.

E mae'a le vala'au a le tama matua ae maua le avanoa o se tagata faigaluega a le Fale Talavai a le LBJ e fa'amanino ai le fa'afitauli e pei ona ta'ua e le tama matua.

Na ta'ua e le ali'i lea, ua mafua suiga i le umi e fa'atali ai fuala'au mo tagata e toe fa'atutumu a latou fagu fuala'au, ona ua le lava tagata faigaluega, e mafua mai i le suiga ua faia e fa'aitiitia ai itula faigaluega a le pulega atoa a le falema'i.

Fai mai le ali'i lea, o se tasi o mafua'aga ua faia ai le suiga lea ina ia suia mai le lua itula i le tolu itula e fa'atali ai le fagu fuala'au e toe fa'atumu ona fa'atoa mafai lea ona toe piki, ina ia mafai ai ona tu'u atu le avanoa i le mamalu o le atunu'u ua leva  ona fa'atali mo le pikiina lea o a latou fuala'au mai a latou talavai.

Na fa'amanino e le ali'i lea, e le o faia e le Fale Talavai lea suiga ona o le fa'atauagavale i le mamalu o le atunu'u, ae ua mafua ona faia ona ua le lava le 'aufaigaluega.

Na fa'afetaia e le ali'i kovana le sui o le Fale Talavai mo le vala'au e fa'amanino le mata'upu, fa'apea ai ma lana fa'afetai i le fa'alogologo atu i le polokalama.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.