MANANA’O NI ISI E TOE TAUVA TOGIOLA I LE TOFI

E to’atele ni isi o le atunu'u ua valavala'au atu i le kovana i luga o lana polokalama i fa'ai'uga o vaiaso, ma latou talosagaina o ia pe mafai ona toe tauva i le tofi mo le 4 tausaga o lo o soso’o nei.

E le o mautinoa pe taufa'ase'e nei vala'au aua o lea ua silafia e le atunu'u, e le toe agava'a le matua ia Togiola Tulafono ona toe tauva i le tofi kovana mo se isi nofoaiga, ona o lea ua mae'a le taimi fa'atulagaina e tatau ai ona tauva mo le tofi.

E o'o lava fo'i i ni isi sa fesiligia e le Samoa News i ni o latou finagalo, sa latou ta'ua lo latou lagolagoina o le ali'i kovana ia Togiola ina ia toe tula'i mai i le tofi kovana.

“O a’u lava ia ou te lagolagoina le ali'i kovana pe ana fa'apea e toe tula'i mai i le tofi, ua tele galuega lelei ua ia faia mo le atunu'u, ae maise lava i auala ma taligalu i ni isi o nu'u ma afio'aga, e aofia ai ma lo’u  nu’u, o le molimau lea a le ali'i o Tafega mai Vatia.

E to'alua isi to'oto'o na vala'au atu i le polokalama a le ali'i kovana i le vaiaso na te'a nei, ma o la talosagaina le ali'i kovana pe mafai ona toe tauva mo le tofi.

Fai mai le isi tama matua na vala'au atu i le polokalama a le kovana, “o a’u ou te lagolagoina lava lou toe tula'i mai i le tofi Togiola, e moni  lou alofa i le atunu'u ma ua va'ai fo'i le atunu'u i au galuega.”

Saunoa Togiola, “ua uma lo’u taimi, ua tatau ona ou malolo, ua o'o i le taimi ua tatau ai ona sui se isi ta'ita'i mo Amerika Samoa.”

O le amataga o le tausaga nei na fesiligia ai e ni isi o le atunu'u le kovana pe moni ua sauni e tauva mo le tofi faipule i le Konekeresi, peita'i na saunoa Togiola, e  le mafai ona ia tauva mo le tofi faipule i le konekeresi, se i vagana ua mae'a lana tautua mo le  tofi kovana na filifilia i ai o ia e le atunu'u.

E ui e le o toe tauva le ali'i kovana, ae ua ia fautuaina le mamalu o le au palota ina ia taofi le toe fa'alavelave i taumafaiga a isi sui tauva o lea ua taufetuli mo le tofi, atoa ai ma le taumafai e  fa'avevesi taumafaiga a isi paga.

Saunoa Togiola, o le tutupu ai o uiga nei mai le atunu'u, o le a atagia atu ai i atunu'u i fafo, e le ’i matua lava Amerika Samoa i tulaga fa'avaomalo atoa ai ma le ta'ita'iina o lona malo.

Sa fa'aigoa fo'i e Togiola gaoioiga a i latou o lo o faia mea fa'aletonu i taumafaiga a isi sui tauva, o ni uiga le mafaufau o lo o faia e tagata e vaivai o latou mafaufau.

O ni isi o fa'aletonu sa matauina i ni nai vaiaso e le i mamao atu nei, o le fa'aleaga lea e ni tagata o saini a ni isi o paga tauva o lo o tutu solo i tafatafa o le alatele.